Azo mingi azia lege ti guengo na eglize ngbanga ti so kâ a kaï nzara ti ala ti aye ti yingo pëpe wala a dë bê ti ala pëpe. Ka ngbanga ti nyen a yeke nzoni mo ga na abungbi ti aTémoin ti Jéhovah? Anzoni ye wa la mo yeke wara kâ?

Terê ti mo ayeke nzere ti duti na popo ti azo so abi bê na mba na so aye terê. Na ngoi ti abazengele, a kangbi yâ ti aChrétien lani na acongrégation, so na yâ ni ala yeke voro Nzapa, ala yeke manda Mbeti ti Nzapa na ala wa terê na popo ti mba (aHébreu 10:24, 25). Ala ye terê lani, na ye so asara si ala bâ terê tongana atâ kamarade, wala aita na lege ti yingo (2 aThessalonicien 1:3; 3 Jean 14). E nga kue e sara tongana ala, nga oko ngia so ala wara lani, ni la si e wara nga laso.

Mo yeke hinga tongana nyen ti sara ye so Nzapa ahunda. Tongana ti so a fa tapande ni na yâ ti Bible, azo kue abungbi oko, akoli, awali na amolenge. Ambeni ita so ayeke fa ye nzoni ayeke fa na e na lege ti Bible tongana nyen ti sara ye ague oko na aye so Bible ni afa na yâ ti fini ti e ti lâ oko oko. (Deutéronome 31:12; Néhémie 8:8) Azo kue alingbi ti mû mbage na alisoro nga ti he bia ti fa mabe ti ala na gigi.​—aHébreu 10:23.

Mabe ti mo ayeke kpengba. Na mbeni congrégation lani, bazengele Paul atene tënë so: “Mbi yeke na nzara mingi ti bâ ala, . . . ti tene e wa terê na popo ti e, na lege ti mabe ti mba, mabe ti ala na ti mbi nga.” (aRomain 1:11, 12). Warango terê lakue na aita na abungbi ayeke kpengba mabe ti e nga ayeke sara si e ye lakue ti sara ye so Nzapa aye.

Mo yeke ga ande na abungbi ti e ti peko? tongaso si mo bâ ni na lê ti mo wani? Aita ayeke yamba ande mo na ngia. Mo lingbi ti gue dä senge, a yeke ro nginza na maboko ti azo kâ pëpe.

• E yeke sara abungbi ti e alingbi na tapande ti azo wa?

• Guengo na abungbi ayeke ga na e anzoni ye wa?

Atâa gango na abungbi ti e ahunda na e ti tambela na yâ ti gbako wala ti tambela na gbe ti ngu wala na gbe ti lâ so azö zo zongo, e aTémoin ti Jéhovah e yeke ga lakue na abungbi. E yeke tingbi nga na akpale, wala e fatigué kue na peko ti kua. Me ngbanga ti nyen e yeke sara kue ti bungbi oko na aita ti e?

A sara si e yeke hon ndö ti akpale ti e. Na azo so aga na abungbi ti e, Paul atene: “[Ala] bi lê na ndö ti mba.” (aHébreu 10:24). Tënë so aye ti tene “ti pensé na ndö ti mba mingi,” wala ti gi ti hinga mba nzoni. Tongaso, Paul awa e ti bi bê na ndö ti amba ti e. Tongana e gi ti hinga aita ti e ti yingo, e yeke bâ so ambeni awara mara ti akpale so e wara ni me ala hon ndö ni nzoni na ala lingbi ti mû maboko na e dä.

A sara si e lë akpengba songo ti kamarade na aita ti e. Azo so e na ala e sara abungbi ayeke azo so e na ala e hinga terê nzoni, me pëpe azo so e hinga ala gï tongaso awe. E yeke wara nga ka terê na ambeni ngoi nde ti sara ngia. Tongaso, anzoni ye wa e yeke wara ka na bungbingo oko na aita ti e? E yeke ne mba, nga songo ti e ti ndoye ayeke kpengba. Nga, tongana aita ti e atingbi na akpale, hio e yeke mû maboko na ala ngbanga ti so e ye ala tongana atâ kamarade ti e (aProverbe 17:17). Sarango songo na azo kue ti yâ ti congrégation ti e apusu e ti ‘bi bê na mba.’​—1 aCorinthien 12:25, 26.

E wa mo ti sara kamarade na azo so asara ye so Nzapa aye. Mo yeke wara ala na popo ti aTémoin ti Jéhovah. Zia si mbeni ye akanga lege na mo ape ti sara songo na e.

• Ti gue na abungbi ayeke ga na e anzoni ye ngbanga ti nyen?

• Lawa si mo yeke to nda ti gue na abungbi ti e na ti hinga aita?

Ândö, na ngoi so akozo Chrétien awara terê ti sara abungbi, ala yeke he abia, ala yeke sambela, ala yeke diko Mbeti ti Nzapa nga ala yeke gi ndani (1 aCorinthien 14:26). A yeke nga oko tongaso na abungbi ti e.

Afango ye ni alondo na yâ ti Bible nga amû maboko. Na samedi wala dimanche, a yeke mû ka mbeni diskur ti penze-ngbonga 30 na yâ ti acongrégation kue. Adiskur ni ayeke fa tongana nyen ti sara ye ague oko na atënë ti Bible nga afa kamba so ayeke na popo ti atënë ti Bible na aye so asi na ngoi ti e. Na ngoi ni so, a wa azo kue ti zi Bible ti ala na ti mä dikongo aversê ni na yâ ni. Na peko ti diskur ni, teti ngbonga oko a yeke sara ye so a iri ni Mandango “Tour ti Ba Ndo.” Na ngoi ni so, a yeke manda mbeni article ti Tour ti Ba Ndo so ayeke ti mandango ni, na azo kue alingbi ti mû mbage na yâ ti lisoro ni. Lisoro ni so ayeke mû maboko na e ti sara ye so Bible afa. A yeke manda oko article ni so na yâ ti acongrégation kue, so wungo ni ahon saki 110 na ndö ti sese kue.

A fa na e tongana nyen ti maï akode ti e ti fango tënë. E yeke sara nga ka mbeni bungbi na milieu ti yenga ni, na peko ti midi wala na lakui. E sara ni na lege ti Mbeti ti bungbi: Kusala ti e nga na gigi ti e ti Chrétien so ayeke sigi nze oko oko. A kangbi yâ ti bungbi ni ota: Iri ti kozo mbage ti bungbi ni so ayeke “Anzoni ye so ayeke na yâ ti Bible.” A yeke mû maboko na e ti hinga aversê so aita adiko ni na yanga-da kozo awe. Iri ti use mbage ni ayeke “Maï akode ti fango tënë ti mo.” Na mbage so, a yeke sara adémonstration ti fa tongana nyen ti sara lisoro na ndö ti Bible na azo. Mbeni ita ayeke bâ tongana nyen la e sara ni ti mû maboko na e ti maï kode ti e ti dikongo mbeti nga na ti sarango tënë. (1 Timothée 4:13). Iri ti ota mbage ti bungbi ni ayeke “Gigi ti e ti Chrétien.” Na yâ ti mbage so, a yeke fa na e tongana nyen ti sara ye alingbi na amama-ndia ti Bible na yâ ti fini ti e ti lâ oko oko. Na ngoi ni so, a yeke hunda tënë nga azo ayeke kiri tënë na ni, na ye so asara si e gbu nda ti Bible nzoni.

Na ngoi so mo yeke sara abungbi ti e, mo yeke bâ so fango ye so e yeke wara kâ ayeke tâ nzoni mingi.​—Ésaïe 54:13.

• Afango ye wa la mo lingbi ti mä na abungbi ti aTémoin ti Jéhovah?

• Bungbi wa la mo ye ti gue dä ti peko?

Mo bâ na yâ ti afoto ti brochure so tongana nyen aTémoin ti Jéhovah ayü bongo pendere na ngoi ti abungbi ti ala? Ngbanga ti nyen e yeke sara ka tongaso?

A yeke ti mû nengo na Nzapa ti e. Ti tâ tënë ni, Nzapa ayeke bâ pëpe gï yungo bongo ti zo (1 Samuel 16:7). Me, tongana e gue na bungbi ti voro lo, ye so e ye ayeke ti ne lo nga ti ne aita ti e. Na tapande, tongana e ye ti bâ mbeni gbia ti kodro, e yeke yü bongo pendere ti fa so e ne lo, ni la ape? A yeke nga tongaso na abungbi ti e. Lege so e yeke leke na terê ti e ayeke fa so e ne Jéhovah Nzapa, lo so ayeke “Gbia ti lakue lakue,” nga na ndo so e voro lo dä.​—1 Timothée 1:17.

A yeke ti fa so e yeke na anzoni sarango ye. Bible awa aChrétien ti ‘yü bongo so ayeke nzoni, nga ti sara ye ahon ndö ni pëpe’. (1 Timothée 2:9, 10). Zo so ‘ayü bongo nzoni’ ayeke zo so ayü bongo ti pika lê ti azo ape, wala ti zingo nzara ti terê ti ala wala ti tene azo abâ lo na yâ ni ape. Nga, zo so asara ye ahon ndö ni pëpe ayeke yü bongo gï tongaso ape, wala so akono ahon ndö ti lo wala so a gbu lo ngangu. So aye ti tene ape so zo alingbi ti yü bongo ti bê ti lo ape, ên-ën. Me tongana e yü bongo pendere ndali ti abungbi ti e, a “lingbi ti sara pendere ti fango ye ti Nzapa, Sauveur ti e” na ti ‘mû gloire na lo’. (Tite 2:10; 1 Pierre 2:12). A yeke sara nga ye na ndö ti bango ndo so azo ayeke na ni na ndö ti vorongo so e yeke voro na Jéhovah.

Zia si yungo bongo ti mo akanga lege na mo ape ti gue na Da ti Royaume. Ti yü bongo nzoni nga so alingbi na abungbi ti e ahunda pëpe ti vo gï angangu bongo wala so apika lê.

• Yungo bongo ti e ayeke sara nyen na ndö ti vorongo so e yeke voro na Nzapa?

• Aversê wa afa na e ti leke terê pendere ndali ti abungbi?

Tongana mo yeke manda Bible na aTémoin ti Jéhovah, peut-être mo oko kozoni mo yeke leke ka mbage ti mbeti so ala yeke manda ni. Ti wara aye ti nzoni na guengo na abungbi, a yeke nzoni ti leke nga abungbi ni kozo. Me, a yeke nga nzoni mingi ti zia na sese mbeni nzoni kapa ti mandango ye.

Soro ndo so mo yeke manda ye ni dä nga na ngoi ni. Na ngoi wa la mo lingbi ti manda ye nzoni? A yeke na yanga ti ndapre? kozo ti to nda ti akua ti mo, wala na lakui na peko ti so amolenge alango awe? Même tongana mo lingbi ti manda ye aninga ape, bâ ngoi oke la mo lingbi ti mû ndali ni, na zia si mbeni ye nde amû ngoi ni so ape. Gi mbeni place so ayeke kpô, na kanga aye tongana radio, télé nga na téléphone. Sambela kozo si mo manda ye ni tongaso si mo zi agingo bê ti lango ni so na li ti mo na mo zia li ti mo gï na ndö ti Mbeti ti Nzapa.​—aPhilippien 4:6, 7.

Sû kamba na gbe ti atënë ni na leke tere ti mû mbage na abungbi ni. Ti to nda ni, gi ti hinga mbeni ye na ndö ti ye so mo yeke manda ni. Tongaso, gbu li na ndö ti mama-tene ti article ni wala chapitre ni. Bâ kamba so atingbi akete li ti tënë ni kue na mama-tene ni. Bâ afoto ni nga na ahundango tënë ti dango bê so agboto lê na ndö ti angbongboro tënë ti yâ ni. Na pekoni diko aparagraphe ni oko na oko nga na ahundango ndo ni, na gi akiringo tënë ni. Gi aversê ni na yâ ti Bible ti mo na diko ni, nga gbu li na ndö ni ti bâ tongana nyen la ala gue oko na atënë ti yâ ti paragraphe ni (Kusala 17:11). Tongana mo wara akiringo tënë ni, sû kete kamba na gbe ti akota tënë ni ti dabe ti mo na ni. Na bungbi ande, tongana mo ye mo lingbi ti yô tïtî mo ti kiri tënë nduru na lege ti atënë ti mo wani.

Tongana mo yeke manda aye nde nde so a yeke manda yenga na yenga na bungbi, yeke na yeke hingango ye ti mo na ndö ti Bible ayeke kono.​—Matthieu 13:51, 52.

• Kapa wa mo lingbi ti zia na sese ti leke na abungbi?

• Mo lingbi ti leke tere tongana nyen ti mû mbage na abungbi?

Ngbene ye giriri, Jéhovah aye ti tene sewa oko oko amû ngoi ti duti place oko ti kpengba mba na lege ti yingo nga na popo ti ala (Deutéronome 6:6, 7). Ni la si aTémoin ti Jéhovah ayeke mû ka mbeni ngoi yenga oko oko ti bungbi na sewa ti voro Nzapa na mbeni lege so anzere na azo kue. Na tapande, ala yeke sara lisoro na ndö ti mbeni tënë ti yâ ti Bible so alingbi na bezoin ti sewa ni. Atâa mo yeke gï mo oko, mo nga kue mo lingbi ti mû mbeni ngoi ti kpengba songo ti mo na Nzapa na mandango mbeni tënë ti yâ ti Bible so mo wani mo soro ni.

A yeke mbeni ngoi ti kpengba songo ti e na Jéhovah. “Ala ga nduru na Nzapa, lo yeke ga ande nduru na ala.” (Jacques 4:8). E yeke hinga Jéhovah nzoni mingi tongana e manda anzene nzene ye na ndö ti asarango ye ti terê ti lo nga na ndö ti akusala ti lo so ayeke na yâ ti Bible. Mbeni pendere lege ti to nda ti vorongo Nzapa na yâ ti sewa ayeke ti mû mbeni ngoi ni ti diko Bible ala kue na kota go. Ala lingbi peut-être ti mû peko ti kapa ti dikongo Bible so a yeke sara ka ni yenga na yenga na bungbi ti “Kusala ti e nga na gigi ti e ti Chrétien.” A lingbi ti kangbi ambage ni na zo oko oko ti yâ ti sewa ni, na peko ti dikongo ni awe zo kue alingbi ti fa ye so lo manda dä.

A yeke mbeni ngoi ti kpengba songo na popo ti mba. Akoli na awali, ababâ na amama nga na amolenge, ayeke kpengba songo na popo ti ala na ngoi so ala manda Bible na sewa. Zia si ngoi ni aduti ngoi ti ngia, ti siriri nga ngoi so zo kue aku ni kungo. Ababâ na amama alingbi ti soro atënë ni alingbi na ngu ti amolenge ti ala, peut-être na yâ ti Tour ti Ba Ndo nga na Réveillez-vous ! wala na ndö ti site, www.pr418.com. Ala lingbi nga ti sara tënë na ndo ti mbeni kpale so amolenge ti ala awara na ekole na ti bâ ye so ala lingbi ti sara ti hon ndö ni. Ala lingbi ti bâ mbeni programme ti JW Télédiffusion (tv.jw.org) na pekoni ala sara lisoro na ndö ni. Ala lingbi ti he abia so a yeke he ande na bungbi na yenga ni so. Tongana ala hunzi vorongo Nzapa ni awe, ala lingbi ti nyon mbeni ye wala ti te kete ye na pekoni.

Ti mû ngoi yenga na yenga ti voro na Jéhovah na yâ ti sewa ayeke sara si azo ni kue aye mandango Bible mingi, na Nzapa ayeke sara tufa mingi na ndö ti effort ti ala.​—Psaume 1:1-3.

• Ndali ti nyen e yeke mû ka mbeni ngoi ti voro na Nzapa na yâ ti sewa?

• Ababâ na amama ayeke sara tongana nyen ti tene ngoi ni so anzere na azo ni kue?

Ndali ti nyen lê ti azo so kue ayeke na ngia tongaso? A yeke ndali ti so ala yeke na mbeni oko ti akota bungbi ti e la. Tongana ti so Nzapa ahunda ândö na awakua ti lo ti bungbi fani ota na yâ ti ngu oko, a nzere ka na e mingi ti bungbi oko tongaso nga (Deutéronome 16:16). Ngu oko oko, e yeke sara ka akota bungbi ota: kota bungbi ti lango oko, fani use, nga na kota bungbi ti lango ota. Aye ti nzoni wa e yeke wara ka na akota bungbi so?

Abungbi ni ayeke kpengba songo ti e na aita ti e ti yingo. Legeoko tongana ti so lani a nzere na azo ti Israël ti gonda Jéhovah “na popo ti azo so abungbi”, e nga kue a nzere na e ti bungbi oko ti voro lo na angoi tongaso (Psaume 26:12, kete tënë na gbe ni; 111:1). Abungbi ni so azi lege na e ti wara terê na aTémoin ti ambeni congrégation nde wala même na ala ti ambeni kodro nde. Na ngoi ti wungo terê, e yeke te kobe ndo oko na place ti kota bungbi ni, na ye so asara si zo abâ terê ti lo dä nzoni (Kusala 2:42). Kâ e yeke bâ na lê ti e wani ndoye so abungbi “sewa ti e ti aita kue” na yâ ti dunia.​—1 Pierre 2:17.

Abungbi ni asara si e maï na lege ti yingo. Azo ti Israël awara nga lani aye ti nzoni ngbanga ti so a zi nda ti Mbeti ti Nzapa na ala nzoni si ala “mä yâ ti tënë” ni (Néhémie 8:8, 12). E nga kue afango ye so e yeke wara na ngoi ti akota bungbi ti e ni anzere na e mingi. Akapa ni oko na oko aluti na ndö ti mbeni versê so ayeke mama-tene ni. Na lege ti apendere diskur, so ambeni ayeke na ambage mingi, nga na lege ti adémonstration, e manda tongana nyen ti sara ye so Nzapa aye. E yeke mä nga ka atapande ti ambeni Chrétien so agbu ngangu na yâ ti akpale so ala wara na ngoi ti nda ni so. Atapande tongaso akpengba ka e mingi. Na akota bungbi ti lango ota, a yeke sara ka asenète, ti fa ambeni ye so asi ândö so Bible asara tënë ni, na asenète ni so afa na e aye so e lingbi ti manda dä. Na ngoi ti akota bungbi ni, a yeke batize ka azo so aye ti fa na lê ti azo kue so ala mû terê ti ala na Nzapa awe.

• Ngbanga ti nyen akota bungbi ayeke ka angoi so azo kue ayeke na ngia?

• Aye ti nzoni wa mo lingbi ti wara na guengo na mbeni kota bungbi?

Kete kozo ti tene Jésus akui, lo tene: “A yeke fa ande nzoni tënë ti Royaume so na ndö ti sese kue so azo ayeke dä tongana mbeni tënë ti témoin ndali ti amara kue. Na pekoni, nda ni ayeke ga.” (Matthieu 24:14). Me a yeke sara kua ti fango tënë na ndö ti sese kue ni tongana nyen? A yeke sara ni tongana ti so Jésus asara na ngoi so lo yeke lani na sese ge.​—Luc 8:1.

E yeke gi ti wara azo na yanga-da ti ala. Jésus afa lani na adisciple ti lo ti fa nzoni tënë da na da (Matthieu 10:11-13; Kusala 5:42; 20:20). A-Chrétien ti ândö nga kue ayeke lani na ando so a mû na ala ti fa tënë dä (Matthieu 10:5, 6; 2 aCorinthien 10:13). Laso nga, a leke yâ ti kusala ti e ti fango tënë tâ nzoni mingi, na congrégation oko oko ayeke na ando so a mû na lo ti fa tënë dä. Ye so amû lege na e ti sara ye so Jésus atene lani, so ayeke “ti fa tënë na azo na ti fa nda ti tënë ni kue”.​—Kusala 10:42.

E yeke sara kue ti wara azo na ndo kue so e lingbi ti wara ala dä. Jésus nga kue azia tapande ni na lege so lo fa lani tënë na ando so gbâ ti azo ayeke dä, na tapande, na ayanga ti ngu wala na tere ti adungu so azo ti kodro ni ayeke gue ti tö ngu dä (Marc 4:1; Jean 4:5-15). E nga kue e yeke sara lisoro na ndö ti Bible na azo na ndo kue so ala yeke dä, so ti tene na ndö ti lege, na aplace ti kango ye, na yâ ti aparc wala na téléphone. E yeke fa nga tënë na avoizin ti e, na azo so e na ala e sara kua ndo oko, wala e na ala e sara klase oko, nga na afami ti e tongana lege azi na e. A-effort so kue asara si a “fa nzoni tënë ti salut” na azo kutu mingi na yâ ti dunia mobimba.​—Psaume 96:2.

Mo hinga ambeni zo so mo lingbi ti fa nzoni tënë ti Royaume ti Nzapa na ala? na nga ti fa na ala nzoni ye so ala lingbi ti wara na pekoni? Bata pendere beku so gï ndali ti mo oko ape, me fa ni na ala. Mo ku ape.

• “Nzoni tënë” wa a lingbi a fa ni?

• A-Témoin ti Jéhovah ayeke mû tapande ti Jésus na fango tënë tongana nyen?

“Pionnier” ayeke zo so ayeke zi li ti mbeni ye. Jésus ayeke lani mbeni pionnier teti so Nzapa atokua lo na sese ge ti fa tënë na ti mû fini ti lo ndali ti azo si lege azi na ala ti wara salut (Matthieu 20:28). Laso, adisciple ti lo ayeke sara tongana lo na lege so ala yeke mû ngoi ti ala mingi ‘ti sara adisciple.’ (Matthieu 28:19, 20). Ambeni awara lege ti sara ye so a iri ni kua ti pionnier.

Pionnier ayeke zo so amû ngoi ti lo mingi ti fa tënë. A-Témoin ti Jéhovah kue ayeke fa nzoni tënë. Me, ambeni aleke kapa ti ala ti fa tënë tongana pionnier permanent, so ti tene ala yeke fa tënë teti angbonga 70 nze na nze. Ti sara ni, mingi ti ala akiri na wungo ti angbonga ti kua ti nginza ti ala na gbe ni. Ti ambeni, a tokua ala na ando so kota bezoin ti awafango tënë ti Royaume ayeke dä ti fa tënë tongana pionnier spécial. Ala yeke fa tënë teti angbonga 130 wala ahon ni nze na nze. Apionnier ayeke gi ti duti na gbâ ti ye na yâ ti fini ti ala pëpe, ala hinga so Jéhovah ayeke mû na ala aye so ala yeke na bezoin ni (Matthieu 6:31-33; 1 Timothée 6:6-8). Ala so dutingo ti ala amû lege na ala ti sara akua ti pionnier ni so ape alingbi ti mû kua ti pionnier auxiliaire, so ti tene na yâ ti nze oko wala ahon ni, ala lingbi ti soro ti fa tënë teti angbonga 30 wala 50.

Zo aga pionnier ndali ti so lo ye Nzapa nga na amba ti lo. Tongana ti Jésus, e kue e bâ so laso azo ague yongoro mingi na Nzapa (Marc 6:34). Me hingango ye so e yeke na ni alingbi ti mû maboko na ala laso laso, na ye so ayeke sara si ala wara mbeni kpengba beku ndali ti gigi ti kekereke. Ndoye so mbeni pionnier ayeke na ni na mbage ti amba ti lo azo ayeke pusu lo ti mû ngoi ti lo mingi nga na ngangu ti lo ti mû maboko na ala na lege ti yingo (Matthieu 22:39; 1 aThessalonicien 2:8). Ye so asara si mabe ti lo akpengba, songo ti lo na Nzapa nga akpengba nga lo yeke na ngia mingi.​—Kusala 20:35.

• Ti mo, kua ti pionnier ayeke nyen?

• Nyen la apusu ambeni zo ti mû kua ti pionnier permanent wala spécial?

Teti angu mingi, a hinga aTémoin ti Jéhovah na sigingo na a-ekole so ayeke fa ye na aChrétien. A sigi na ambeni ekole ni nde ndali ti azo so amû ngoi ti ala kue teti kua ti fango tënë ti Royaume, tongaso si ala ‘sara kusala ti ala ni kue.’​—2 Timothée 4:5.

Ekole ti apionnier. Tongana mbeni pionnier asara ngu oko na yâ ti kua ti lo ti pionnier awe, a yeke zia iri ti lo na mbeni ekole so ayeke ninga lango omene. Mingi ni, a yeke sara ekole ni so na yâ ti Da ti Royaume so ayeke nduru na ndo so pionnier ni alango dä. A sara ekole ni so ti mû maboko na pionnier ni ti ga nduru mingi na Jéhovah, ti tene lo wara anzoni akode na yâ ti ambage nde nde kue ti kua ti lo ni nga ti tene lo ngbâ lakue ti sara kua ti lo ni nzoni.

Ekole ti awafango nzoni tënë ti Royaume. Ekole ni so ayeke ninga nze use, na a sara ni ndali ti apionnier so aninga na yâ ti kua ti ala na so ala lingbi ti yeda ti dö ndo ti ala ti zia ti gue na mbeni ndo so bezoin ayeke dä. A yeke mo bâ mo tene ala tene, “Mbi lâ! Tokua mbi!”, ti gue oko na tapande ti Jésus Christ, so ayeke lani kota Wafango tënë so ahon atanga ni kue na sese (Ésaïe 6:8; Jean 7:29). Ti tene ala dö kodro ti ala ti zia a hunda peut-être na ala ti changé dutingo ti ala. Asarango ye ti azo ti ndo ni alingbi ti duti nde na ti ala, peut-être dê wala ndowa ayeke na ndö ni so mingi nga kobe ti ndo ni apeut ti duti nde na ti so lo yeke te ka. Peut-être ala bezoin nga ti manda mbeni fini yanga ti kodro. Azo so ayeke gue na ekole ni so ayeke aita-koli nga na aita-wali kumbamba na aita so asara mariage awe, so ngu ti ala ayeke na popo ti ngu 25 ti si na ngu 65. Ekole ni so ayeke mû maboko na ala ti duti na apendere sarango ye na yâ ti akua ti ala nga ti wara akode so alingbi ti sara si Jéhovah na bungbi ti lo asara kua mingi na ala.

Ekole ti Galaad ti Mandango Bible ti Société Watchtower. Na yanga ti Hébreu, tënë “Galaad” ague oko na tënë “Témoin.” Depuis so a zia gere ti Ekole ti Galaad so na sese na ngu 1943, a tokua amissionnaire ahon 8 000 tongaso, so asara ekole ni so, ti tene ala fa tënë ti témoin “juska na nda ti sese.” (Kusala 13:47) Na tapande, tongana amissionnaire ti e asi lani kpâ na Pérou, congrégation oko ayeke lani dä ape, me fadeso e yeke na ni ahon 1 000. Nga, tongana amissionnaire ato nda ni ti fa tënë na Japon, aTémoin asi nga lani bale-oko ape na ngoi ni kâ, me fadeso ala hon 200 000. Ekole ti Galaad ni ayeke ninga nze oku. Na ngoi ti mandango aye ni, azo ni ayeke mû ngoi ti ala ti manda aversê oko na oko kue ti yâ ti Mbeti ti Nzapa. Azo so ayeke gue na ekole ni so ayeke apionnier spécial, amissionnaire, aBéthelite wala asurveillant ti circonscription. Ekole ni so ayeke leke ala ti mû maboko mingi na yâ ti kota kua so e yeke sara na ndö ti dunia kue, tongaso si kua ni aluti nzoni.

• A zia Ekole ti apionnier na sese ngbanga ti nyen?

• Ekole ti awafango nzoni tënë ti Royaume ayeke ndali ti azo wa?