Koya ti Paul asara lani ye na mbeto ape

Zia e bâ tënë kete na ndo ti mbeni molenge-koli so asara lani si ita ti mama ti lo angbâ na fini. Ita ti mama ti molenge-koli ni so ayeke bazengele Paul. E hinga iri ti lo ape, me e hinga so lo sara mbeni ye so afa so lo yeke na mbeto ape. Mo ye ti hinga ye so lo sara lani?—

Paul ayeke lani na da ti kanga na Jérusalem. A kanga lo ndali ti so lo fa tënë ti Jésus na azo. Me ambeni sioni zo ake lo na bê oko, tongaso ala mä tere ti sara sioni na lo. Ala hunda na mokonzi ti aturugu ni ti tene aturugu ti lo aga na Paul si a fâ ngbanga ti lo. Ala yeke honde tere ti ala na lege si tongana Paul aga ti hon, ala gbu lo, ala fâ lo.

Molenge ti ita ti Paul ni, so ayeke koya ti lo Paul ni, amä tënë ti ye so azo ni aye ti sara so. Fade lo yeke sara tongana nyen? Lo gue na da ti kanga ni, lo sara tënë ni na Paul. Ni la, gi na lê ni lê ni, Paul atene na lo ti gue ti sara tënë ni na mokonzi ti aturugu. So koya ti Paul adoit ti gue ti sara tënë na mokonzi ti aturugu so, a yeke kete ye la?— A yeke kete ye ape, ngbanga ti so mokonzi ni ayeke kota zo mingi. Me koya ti Paul ni asara mbeto ape, lo gue lo sara tënë ni na lo.

Mokonzi ti aturugu ni asara mbeni ye. Lo mû yanga na aturugu 500 tongaso ti bata Paul. Lo tene na ala ti gue ti zia Paul na kodoro ti Césarée gi na bï ni bï ni. Paul asi lani nzoni na Césarée ni?— En, lo si nzoni. Asioni zo ni so awara lege ti fâ lo ape. Ye ti ala ni alï ngu.

Mo yeke sara tongana nyen ti fa so mo sara ye tongana koya ti Paul so?— Mo kue mo lingbi ti sara ye na mbeto ape tongana ti lo. Tongana e ye ti fa tënë ti Jéhovah na azo, a yeke nzoni e duti na mbeto ape. Mo kue mo ye ande ti ngbâ ti fa tënë ti Jéhovah na mbeto ape?— Tongana mo sara tongaso, peut-être mo nga kue mo yeke mû ande maboko na mbeni zo ti wara fini.