YE TI MANDA 7
Élie abâ so lo yeke gi lo oko nga mbeto asara lo
Bâ kete molenge-koli so na lê ti foto so. Lo yeke gi lo oko nga mbeto ahon ndo ti lo. Mo kue, a si na mo awe ti sara mbeto?— E kue a si na e awe so e bâ so e yeke gi e oko. Bible asara tënë ti ambeni kamarade ti Jéhovah so ala nga kue abâ lani atene ala yeke gi ala oko si mbeto asara ala. Mbeni oko ti azo ni so ayeke Élie. Zia e mä ambeni tënë na ndo ti lo.
Jézabel aye ti fâ Élie
Élie ayeke zo ti giriri. Ade ti dü Jésus na tango ni so ape. Élie alango lani na Israël, nga Achab la ayeke gbia ti Israël ni. Achab avoro Jéhovah lani ape. Lo na wali ti lo, Jézabel, ayeke voro Baal, mbeni nzapa ti wataka. Azo ti kodoro ni mingi amû peko ti ala, ala nga kue avoro Baal. Gbia-wali Jézabel ayeke sioni mingi na lo ye ti fâ azo kue so ayeke voro Jéhovah, même Élie kue. Tongaso, Élie asara nyen?—
Élie akpe! Lo gue yongoro na ndo so lâ asu dä ngangu na ahule. Lo gue lo honde tere ti lo na yâ ti mbeni dû ti tênë. Lo kpe ngbanga ti nyen?— Ni la, mbeto asara lo. Me a lingbi lo sara mbeto ape, ngbanga ti so Jéhovah alingbi ti mû maboko na lo. Na mbeni ngoi lani, Jéhovah afa ngangu ti lo na Élie. Tongana Élie asambela lani ti tene wâ alondo na yayu aga agbi sandaga ti lo, Jéhovah atokua wâ ni. Ye so afa biani so Jéhovah alingbi ti mû maboko na Élie na yâ ti kpale ti lo ni.
Jéhovah amû maboko na Élie tongana nyen?
Na yâ ti dû ti tênë ni, Jéhovah ahunda Élie, lo tene: ‘Mo sara nyen ge?’ Élie akiri tënë, atene: ‘Gi mbi oko la mbi ngbâ ti voro mo. Azo ni kue, gbia afâ ala awe, na ti peko a yeke duti ande mbi.’ Élie apensé so a fâ amba ti lo kue awe, ala so avoro Jéhovah. Me Jéhovah atene na lo: ‘A fa ala kue ape. Ambeni 7000 angbâ na fini na ala ngbâ ti voro mbi. Sara mbeto ape. Mbi yeke na mbeni kua ti mû na mo.’ Tongana Élie amä tënë so, tere ti lo anzere? wala anzere ape.—
Mo yeke sara tongana nyen ti fa so mo sara ye tongana Élie?— Pensé ape so mo yeke gi mo oko, nga sara mbeto ape. Mo yeke na akamarade so aye Jéhovah nga so aye mo. Mbeni ye ni nga ayeke so Jéhovah ayeke ngangu mingi, na lo yeke mû lakue maboko na mo. So mo hinga so mo yeke gi mo oko ape, a nzere na mo?—