Jésus amä ka yanga

Mo mä ka yanga ti babâ na mama ti mo?— Me, a si ka so a yeke ngangu. Ti mo, Jésus ayeke mä ka yanga ti Jéhovah?— Lo mä ka lani yanga ti babâ na mama ti lo?— Tapande ti lo alingbi ti mû maboko na mo ti mä yanga ti babâ na mama ti mo, même si a yeke ngangu na mo. Zia e bâ ye so Jésus asara lani.

Kozo si Jésus aga na sese ge, lo yeke lani na yayu, na tere ti Babâ ti lo, Jéhovah. Me Jésus ayeke nga lani na babâ na mama na sese ge. Iri ti ala ayeke Joseph na Marie. A sara tongana nyen la ala yeke babâ na mama ti lo so?—

Jéhovah amû lani Jésus na yayu kâ, lo sara si lo ga kete, na lo zia lo na yâ ti Marie, so ayeke ti lo na sese ge. Na pekoni, Marie adü lo. So miracle! Jésus akono yeke yeke na yâ ti Marie tongana tanga ti abébé kue. Nze gumbaya tongaso na pekoni, Marie adü Jésus. A yeke tongaso la si Marie aga mama ti Jésus, nga Joseph, so ayeke koli ti Marie, aga babâ ti Jésus na ndo ti sese ge.

Tongana Jésus awara ngu 12, lo sara mbeni ye so afa so lo ye Babâ ti lo, Jéhovah, mingi. A yeke lani na ngoi so Jésus na babâ na mama ti lo nga na aita ti lo ague na Jérusalem ti sara Matanga ti Pâques kâ. Lege ayo. Me tongana ala hunzi ti sara Matanga ni awe si ala yeke kiri, Joseph na Marie abâ so Jésus ayeke na popo ti ala ape. Jésus ayeke na ndo wa la?—

Joseph na Marie akiri hio na Jérusalem. Ala gi Jésus na ndo kue, gbä. Bê ti ala ayeke gi na nduzu nduzu. Me lango ota na pekoni, ala wara lo na yâ ti temple. Jésus asara nyen kâ na yâ ti temple ni?— Lo yeke manda ye na ndo ti Babâ ti lo, Jéhovah. Lo ye Jéhovah mingi, ni la si lo ye ti hinga tongana nyen ti zia ngia na bê ti lo. Même na ngoi so Jésus akono lo ga koli, lo mä ka yanga ti Jéhovah lakue. Jésus amä yanga ti Jéhovah même tongana a si so a yeke ngangu na lo. Jésus amä nga yanga ti Joseph na Marie kue?— Bible atene lo mä yanga ti ala nga.

Mo yeke sara tongana nyen ti fa so mo sara ye tongana Jésus?— A lingbi mo mä yanga ti babâ na mama ti mo, même si a yeke ngangu. Mo yeke mä ande yanga ti ala la?—