MBAGE 4
Hinga ti bata nginza ti mo
“Tongana azo abungbi apika patara, ye so ala ye ti sara ayeke ga nzoni.”—aProverbe 20:18, FD
E kue e yeke na bezoin ti nginza ti mû na sewa ti e aye so ala yeke na bezoin ni (aProverbe 30:8). Ti bâ ni nzoni, “nginza ayeke ye ti bata zo”. (Zo-ti-fa-tene 7:12). Peut-être a yeke ngangu na mo na wali wala koli ti mo ti sara tënë na ndo ti nginza, me a yeke nzoni ala zia pëpe si nginza aga na akpale na yâ ti mariage ti ala (aÉphésien 4:32). A yeke nzoni ala use kue aduti na confiance na mba nga ala mä tere na ndo ti desizion so ala mû ti vo aye na nginza ti ala.
1 LEKE KOZONI AYE SO MO YE TI VO
YE SO BIBLE ATENE: “Zo wa na popo ti ala, tongana lo ye ti sara mbeni tour, lo yeke duti kozoni pëpe ti diko ngere ni, ti bâ wala ye so lo yeke na ni alingbi ti tene lo hunzi na tour ni?” (Luc 14:28). A yeke nzoni ala use kue aleke kozoni aye so ala ye ti vo na nginza ti ala (Amos 3:3). Ala bâ ye so ala ye ti vo ni nga oke la ala yeke mû ti vo na ni (aProverbe 31:16). So mo yeke na nginza ti vo na mbeni ye aye pëpe ti tene so mo doit gi ti vo ye ni. Sara kue ti kpe bon. Vo ye gi na nginza so mo yeke na ni.—aProverbe 21:5; 22:7.
YE SO MO LINGBI TI SARA:
Tongana tanga ti nginza angbâ na hunzingo ti nze, zia ala use kue abâ ye so ala yeke sara na ni
Tongana nginza amanke, zia ala leke ti zi ambeni ye so ala yeke vo ka. Na tapande, a hon ti vo kobe na yanga ti lege, tö ye mo wani
2 HONDE YE NA MBA TI MO APE
YE SO BIBLE ATENE: “E leke na bê ti e ti sara ye kue mbilimbili, gi na lê ti Jéhovah pëpe, me na lê ti azo nga.” (2 aCorinthien 8:21). Honde ape na wali wala koli ti mo oke la mo yeke wara na nze nga oke la mo yeke vo na ye.
Kozo ti mû mbeni desizion na ndo ti nginza, hunda lakue wali wala koli ti mo ti hinga pensé ti lo (aProverbe 13:10). Ti sara tënë polele na ndo ti nginza ayeke mû maboko na ala ti bata siriri na yâ ti mariage ti ala. Bâ nginza ti mo tongana gi nginza ti mo wani ape me tongana nginza ti sewa ni kue.—1 Timothée 5:8.
YE SO MO LINGBI TI SARA:
A yeke nzoni ala mä tere na ndo ti nginza so zo oko oko ayeke vo na ye sân ti hunda mba ti lo
Ku pëpe ti tene kpale asi awe si ala sara tënë na ndo ti nginza