Sara ye na lege ni na yâ ti aye kue

Zo kue aye ti tene akamarade ti lo asara ye na lege ni. Jéhovah nga kue ahunda ti tene akamarade ti lo asara ye na lege ni. Me a yeke kete ye ape na yâ ti dunia so, so azo mingi asara ye na lege ni ape. Anzoni ye wa la zo ayeke wara tongana lo sara ye na lege ni na yâ ti aye kue?

1. Kota raison wa la ndali ni e yeke sara ye na lege ni?

Tongana e sara ye na lege ni na azo, e yeke fa na Jéhovah so e ye lo nga e ne lo. Bâ tënë so si: Jéhovah ahinga aye kue so e pensé na ni nga e sara (aHébreu 4:13). Tongana e soro ti sara ye na lege ni, lo yeke bâ ni na a nzere na lo. Bible atene: “Jéhovah ake zo so asara ye na handa, me akota kamarade ti lo ayeke azo ti mbilimbili.”​—aProverbe 3:32.

2. Ambeni ye wa la e yeke sara ti fa so e sara ye na lege ni lâ oko oko?

Jéhovah aye ti tene e “tene tâ tënë na mba”. (Zacharie 8:16, 17). Tënë so aye ti tene nyen? Atâa e yeke sara tënë na azo ti sewa ti e, amba ti e ti place ti kua, amba ti e aChrétien wala akota zo ti kodro, e yeke tene mvene ape wala e yeke tene pëpe atënë so ayeke na lege ni ape. Azo so asara ye na lege ni ayeke nzi ye ti amba ti ala ape wala ala yeke mû ye ti ala na likisi ape. (Diko aProverbe 24:28 nga na aÉphésien 4:28.) Ala yeke futa nga a-impôt kue so ala doit ti futa (aRomain 13:5-7). Na yâ ti aye so nga na ambeni nde, e yeke “sara ye mbilimbili na yâ ti aye kue.”—aHébreu 13:18.

3. Anzoni ye ti peko ti sarango ye na lege ni ayeke nyen?

Tongana azo ahinga e tongana zo so ayeke sara ye na lege ni, ala yeke sara confiance na e. E yeke mû maboko na azo kue ti yâ ti congrégation ti bâ so ala yeke nzoni, tongana ti so azo ti mbeni sewa so aye terê ayeke sara. E yeke duti na nzoni conscience. Tongana e sara ye na lege ni, a lingbi nga ti “sara pendere ti fango ye ti Nzapa, Sauveur ti e” nga ti pusu ambeni zo ti sara na Jéhovah.—Tite 2:10.

GI TI HINGA AYE MINGI

4. Sarango ye na lege ni anzere na Jéhovah

Diko Psaume 44:21 nga na Malachie 3:16, na pekoni kiri tënë na ahunda so:

• Ngbanga ti nyen la mo pensé so a yeke na lege ti ndara ape ti mä na bê so e peut ti honde tâ tënë?

• Mo pensé a yeke sara Jéhovah tongana nyen tongana e soro ti tene tâ tënë atâa a yeke ngangu na e ti sara ni?

5. Sara ye na lege ni na ngoi kue

VIDÉO: Nyen la asara si mo yeke na ngia?: Mbeni nzoni conscience (2:32)

Diko aHébreu 13:18, na pekoni bâ tongana nyen la e peut ti sara ye mbilimbili, wala na lege ni . . .

• na yâ ti sewa ti e.

• na place ti kua wala na ekole.

• na yâ ti ambeni ye nde.

6. Sarango ye na lege ni ayeke ga na e anzoni ye

Sarango ye na lege ni apeut ti ga na e ambeni kpale. Me tongana ngoi ayeke hon, e yeke bâ so tâ nzoni ye la e sara so. Diko Psaume 34:12-16, na pekoni kiri tënë na hunda so:

• Tongana nyen la sarango ye na lege ni asara si gigi ti mo aga nzoni?

1. Akoli na wali so asara ye na lege ni ayeke kpengba songo ti mariage ti ala

2. Azo so asara ye na lege ni, patron ti ala ayeke sara confiance na ala

3. Amolenge ti kodro so asara ye na lege ni, akota zo ti kodro ayeke tene nzoni tënë ti ala

NA NDURU TËNË

Jéhovah aye ti tene akamarade ti lo asara ye na lege ni na yâ ti aye kue so ala tene nga ala sara

Dango bê

• Ambeni lege ti sara ye na lege ni ayeke so wa?

• Ngbanga ti nyen la a yeke na lege ti ndara ape ti pensé so e peut ti honde tâ tënë?

• Ngbanga ti nyen la mo ye ti sara ye na lege ni na ngoi kue?

GI NDA TI YE

Tongana nyen la ababâ na amama apeut ti fa na amolenge ti ala ti sara ye na lege ni?

Tene tâ tëne (1:44)

Ngbanga ti nyen la a yeke nzoni ti sara ye so e mû zendo ti sara?

Sara ye alingbi na azendo ti mo na wara anzoni ye (9:09)

Bâ wala e doit ti payé a-impôt même tongana a sara kua na ni nzoni ape.

“Mo doit ti payé a-impôt?” (Tour ti Ba Ndo ti lango 1 ti septembre 2011)

Nyen la apusu mbeni koli so ayeke sara ye lani na lege ni ape ti changé ti sara mbeni kua so ayeke na lege ni?

“Mbi hinga so Jéhovah ayeke sara nzoni bê na zo nga lo yeke pardonné zo” (Tour ti Ba Ndo ti lango 1 ti mai 2015)