4 Zi kite na bê ti mo

“Mo zo ti kete mabe, ngbanga ti nyen mo zia si kite ahon ndo ti mo?”​—Matthieu 14:31.

KPALE NI AYEKE SO WA? Même adisciple ti Jésus na ambeni ngoi ayeke na kite na bê ti ala (Matthieu 14:30; Luc 24:36-39; Jean 20:24, 25). Ti tâ tënë ni, Bible atene so dutingo na mabe pëpe ayeke “siokpari so alingbi ti gbu e hio”. (aHébreu 12:1). Bazengele Paul atene: “Mabe ayeke ye so azo kue si ayeke na ni pëpe.” (2 aThessalonicien 3:2). A ye pëpe ti tene so ambeni zo alingbi pëpe ti duti na mabe. Me, azo mingi agi pëpe ti duti na ni. Nzapa ayeke iri tënë nzoni na ndo ti azo so asara ngangu ti duti na mabe.

TONGANA NYEN TI HON NDO TI KPALE SO? Gi ti hinga aye so asara si mo yeke na kite. Na tapande, disciple Thomas adë kite so a zingo Jésus na kuâ, atâa so ambeni disciple atene so ala bâ lo. Thomas aye ti bâ na lê ti lo wani aye so afa so a zingo Jésus. Ye ti pekoni ayeke so wa? Jésus afa na lo aye so lo yeke na bezoin ti bâ ni si mabe ti lo akpengba.​—Jean 20:24-29.

Na lege ti Bible, Jéhovah Nzapa afa na e aye so e yeke na bezoin ni ti zi kite na bê ti e. Na tapande, azo mingi azia ti mä na bê na Nzapa ngbanga ti so ala bâ ti ala atene Nzapa la asara si azo atiri bira, asara aye ti ngangu na amba ti ala nga lo la lo sara si azo abâ pasi wala lo la lo zia lege na aye so ti si. Bible atene ti lo nyen na ndo ti tënë so?

Nzapa akomande pëpe na lege ti angorogbia ti azo. Jésus atene so Satan, mbeni yingo so azo alingbi ti bâ lo pëpe, ayeke “mokonzi ti dunia so”. (Jean 14:30). Satan atene na Jésus so ni yeke mû na lo komandema na ndo ti aroyaume kue ti sese tongana lo voro ni. Satan atene: “Fade mbi yeke mû na mo komandema so kue nga na gloire ni, ngbanga ti so a mû ni na mbi awe, na mbi yeke mû ni na zo so bê ti mbi aye.” Jésus ake pëpe so Satan ayeke na komandema so. Me lo tene: “A sû na Mbeti ti Nzapa a tene: ‘A yeke gi Jéhovah Nzapa ti mo si a lingbi mo voro lo, na a yeke gi lo oko si a lingbi mo sara kusala so ayeke nzoni-kue na lo.’ ” (Luc 4:5-8). A yeke Satan na angorogbia ti azo la ayeke na gunda ti apasi so azo ayeke bâ, me Nzapa pëpe.​—Apocalypse 12:9, 12.

Jéhovah Nzapa aga nduru awe ti zi aye kue so asara si azo ayeke bâ pasi. Lo leke awe ti tene Royaume, wala ngorogbia so Molenge ti lo Jésus Christ ayeke gbia ni akomande na ndo ti azo (Matthieu 6:9, 10; 1 aCorinthien 15:20-28). Mbeni prophétie ti Bible ayeke ga tâ tënë laso na lege so a yeke fa nzoni tënë ti Royaume na ndo ti sese kue (Matthieu 24:14). Na yâ ti ngoi kete, Royaume so ayeke futi ande azo kue so ayeke kanga lege na ni nga ayeke zi ande aye kue so ayeke sara pasi na azo.​—Daniel 2:44; Matthieu 25:31-33, 46; Apocalypse 21:3, 4.

NZONI YE TI PEKONI AYEKE SO WA? Azo so ayeke na kite ayeke tongana amapo ti ngu so ayengi na lege so “apupu ti fango ye kue ague na ala kirikiri na lege ti handa ti azo”. (aÉphésien 4:14; 2 Pierre 2:1). Me ti azo so awara anzoni kiringo tënë na ahundango tënë ti ala, ala lingbi ti “luti ngangu na yâ ti mabe”.​—1 aCorinthien 16:13.

A-Témoin ti Jéhovah, so asigigi na Tour ti Ba Ndo so aye ti mû maboko na mo ti wara akiringo tënë na ahundango tënë so asara si a yeke ngangu na mo ti duti na mabe. Ala tisa mo ti bungbi oko na ala nga ti gi mo wani ti hinga afango ye so mabe ti ala aluti na ndo ni. Tongana mo sara tongaso, a yeke sara ande si mabe ti mo na Nzapa akpengba mingi.

Ti hinga ambeni tënë na ndo ni, bâ buku Bible afa nyen biani?,a chapitre 8 so li ti tënë ni ayeke: “Royaume ti Nzapa ayeke nyen?” nga na chapitre 11 so li ti tënë ni ayeke: “Ngbanga ti nyen Nzapa azia si azo abâ pasi?”

[Kete tënë na gbe ni]

[Foto na lembeti 9]

Azo so awara anzoni kiringo tënë na ahundango tënë ti ala, mabe ti ala ayeke luti nzoni