Bible ayeke tënë ti yanga ti Nzapa?

“Atënë kue ti yâ ti Mbeti ti Nzapa, a sara ni na mbeti na gbe ti yingo ti Nzapa, na a yeke nzoni ti fa na ye na zo, ti suku na zo, ti kiri na aye na nzoni lege, ti se na zo na lege ti mbilimbili, si zo ti Nzapa alingbi na yâ ti ye kue, na a mû na lo aye kue so lo yeke na bezoin ni ti tene lo sara nzoni kusala kue.”​—2 TIMOTHÉE 3:16, 17.

ATËNË ti bazengele Paul so afa so mbeni ye ti hon fango ye ti Bible ayeke dä pëpe. Biani, lo yeke sara lani mbilimbili tënë ti mbage ti Bible so ayeke dä na ngoi ti lo, mbage ti Bible so azo airi ka ni Testament ti Giriri. Me ti tâ tënë ni, atënë ti lo so andu abuku kue ti Bible so wungo ni ayeke 66, so na popo ni a yeke wara nga ati so adisciple be-ta-zo ti Jésus asû ni na ngoi ti akozo aChrétien.

Mo bâ Bible na nene ni mingi tongana ti so Paul abâ na ni? Mo pensé so azo so asû Bible asû ni biani na gbe ti yingo ti Nzapa? Akozo Chrétien abâ ni lani tongaso. Angu ngbangbo mingi so aga na pekoni, aChrétien angbâ lakue ti mä na bê na tënë so. Na tapande, na ngu 1300-1400, John Wycliffe, mbeni mokonzi-nzapa ti kodoro ti Angleterre, abâ Bible tongana “tâ tënë so zo a lingbi ti zia bê ti lo dä”. Mbeni bakari (The New Bible Dictionary) asara tënë na ndo ti atënë ti Paul so ayeke na nduzu ge atene so a “sû Bible na gbe ti yingo ti Nzapa amû lege na zo ti duti na kite oko pëpe so atënë kue so Bible atene ayeke tâ tënë.”

Bango ndo ti azo na ndo ti Bible agbian

Ye oko, na yâ ti angoi so ahon ade ti ninga pëpe, azo mingi azia bê ti ala na Bible tongana ti kozo pëpe. Mbeni buku (The World’s Religions) atene so “aChrétien kue angbâ ti tene so Bible la ayeke fa lege na ala nga atënë ti mabe ti ala aluti na ndo ni.” Me sarango ye ti ala ayeke ti lo nde. Fadeso azo mingi abâ Bible tongana “mbeni buku ti tënë ti akotara so zo alingbi ti zia bê ti lo na ni pëpe.” Atâa so ala hinga so azo so asû Bible ayeke azo so amä na bê ngangu na Nzapa, ala bâ azo ni so gi tongana asenge zo so ayeke gi ti fa nda ti atâ tënë so alï, me so ahinga pëpe aye so e hinga laso.

Ti tâ tënë ni, laso azo so azia bê ti ala na Bible ti fa lege na ala ayeke mingi pëpe. Na tapande, fani oke la mo mä azo na tenengo so aye so Bible afa na ndo ti nzoni sarango ye aga ngbene ye awe na alingbi ti mû maboko na e laso pëpe? Azo mingi abâ so ala lingbi ti fa na azo gi ambeni ndia ti Bible so azo ni aye tënë ni, wala ala lingbi ti sara sanka ni tongana ala bâ so na sarango tongaso ala yeke bâ nzoni na pekoni. Na mbana, ambeni zo so atene ala yeke aChrétien akanga lê na ndo ti ye so Bible atene na ndo ti lango-sioni, gingo koli wala wali nde, sarango ye ti likisi nga na nyongo sämba ahon ndo ni.​—1 aCorinthien. 6:9, 10.

Ngbanga ti nyen tongaso? Na tongo nda ti ngu 1900, Charles Marston, mbeni zo ti gingo aye ti akotara na gbe ti sese, afa mbeni raison ni oko na yâ ti buku ti lo (The Bible Is True). Lo tene so “azo ayeke nduru ti yeda hio tongaso na atënë so azo ti kasango Bible asû.” A yeke nga tâ tënë laso? Abibe nga na afango ye ti azo so aye pëpe si zo azia bê ti lo na Bible so, a lingbi mo bâ ni tongana nyen? Bâ ye so article ti peko atene na ndo ni.