Bible ayeke biani tënë ti yanga ti Nzapa

BAZENGELE Paul aye lani mbilimbili ti tene nyen tongana lo tene so a sû Bible “na gbe ti yingo ti Nzapa”? (2 Timothée 3:16). Paul aye ti tene so Nzapa asara kusala na yingo ti lo ti fa na azo so asû Bible ti sû gi aye so lo ye ti tene ala sû ni.

Bazengele Pierre atene so azo so asû Bible “asara tënë ti ye so alondo na Nzapa tongana yingo vulu afa lege ni na ala.” (2 Pierre 1:21). Ni la, bazengele Paul atene nga lani so abuku ti yâ ti Bible ayeke ‘aMbeti so ayeke nzoni-kue, so alingbi ti sara si zo awara ndara ti wara na salut na lege ti mabe na Christ Jésus’.​—2 Timothée 3:15.

Azo mingi ade kite ngangu so Bible ayeke tënë ti yanga ti Nzapa pëpe. Azo ti kasango ndo ake na kurugo so zo alingbi ti zia bê ti lo pëpe na atënë ti Bible. Charles Marston, mbeni zo ti gingo aye ti akotara na gbe ti sese, atene so azo tongaso ayeke “azo so abâ na nene ni pëpe aye so Bible asara tënë ni”. Ambeni zo atene so Bible ayeke gi “mbeni ngbene buku ti apande na ti atere”.

Bâ aye so afa so Bible ayeke tënë ti yanga ti Nzapa

Tongaso, zo alingbi ti zia bê ti lo na Bible? A yeke kota ye ti tene mo mû nzoni desizion na ndo ti tënë so. Ngbanga ti nyen? Ngbanga ti so tongana atënë ti yâ ti Bible alondo biani na Nzapa, ti sara sanka ni a yeke ye ti buba na a lingbi même ti ga na ye ti sioni na zo. Tongana mo bâ Bible tongana tënë ti yanga ti azo me ti Nzapa pëpe, yeke na yeke Bible ayeke sara ngangu mingi pëpe na ndo ti asarango ye ti mo nga na aye so mo mä na bê na ni.​—1 aThessalonicien 2:13.

Kozoni ti zia bê ti mo na Bible wala ti ke ni, a lingbi mo sara nyen? Biani, kozoni si mo zia bê ti mo na ambeni zo, mo yeke sara nyen? Ti tâ tënë ni, a yeke ngangu ti zia bê ti mo na mbeni zo so mo hinga lo nzoni pëpe. Mo yeke hinga wala mbeni zo ayeke nzoni zo na a lingbi ti zia bê na ndo ti lo gi tongana mo mû ngoi mingi ti gi ti hinga lo nzoni. Ti hinga Bible a lingbi mo sara nga tongaso. Yeda gi hio tongaso pëpe na atënë so azo atene wala asioni tënë so a sigigi na ni ti sara si zo azia bê ti lo na Bible pëpe. Mû ngoi ti bâ aye so afa so a sû Bible na “gbe ti yingo ti Nzapa”.

Azo so atene ala ye Bible akasa ni

Londo hio pëpe ti ke Bible ndali ti so même ambeni zo so atene ala ye ni ake so Bible ayeke tënë ti yanga ti Nzapa pëpe na zo alingbi ti zia bê ti lo dä pëpe. Mbeni bakari (New Dictionary of Theology) atene so, laso mingi ti azo so ayeke fa tënë na ndo ti Bible “ayeke sara tënë ti Bible ni mo bâ mo tene a yeke gi tënë ti yanga ti azo”, atâa so ala tene ala yeke aChrétien.

Mingi ti awafango ye ti a-ekole ti a-eglize adë kite na ndo ti azo so asû abuku ti Bible. Na tapande, ambeni atene so a yeke pëpe prophète Ésaïe la asû buku ti Ésaïe. Ala tene so a sû buku so angoi mingi na peko ti Ésaïe. Lowther Clarke atene na yâ ti buku ti lo (Concise Bible Commentary) so atënë ti yâ ti buku ti Ésaïe “ayeke atënë ti bê ti azo mingi so aduti na fini na angoi nde nde.” Me na tenengo tongaso, ala girisa so fani mingi Jésus Christ na adisciple ti lo atene so Ésaïe la asû buku so.​—Matthieu 3:3; 15:7; Luc 4:17; Jean 12:38-41; aRomain 9:27, 29.

Ye ti sioni mingi ayeke so, azo ti kasango Bible tongana J. R. Dummelow atene so aprophétie so ayeke na yâ ti buku ti Daniel “ayeke tâ gi mbaï ti aye so asi awe, me so a sû ni tongana aye so ade ti si pëpe.” Ge nga kue, na tenengo tongaso, ala girisa tënë so Jésus Christ lo wani atene. Jésus agboto mê ti e na ndo ti ye so lo iri ni “ye ti saleté so asara si ye kue abuba aduti na ndo so ayeke nzoni-kue, ye ti saleté so a fa tënë ni na lege ti prophète Daniel”. (Matthieu 24:15). A yeke na lege ni ti tene mbeni Chrétien amä na bê so Jésus Christ nga kue ayeda na atënë ti handa? Wala lo kue lo yeda ti tene a mû mbeni mbaï a gbian yâ ni ti tene aga mbeni prophétie? Oko pëpe.

A yeke biani kota ye?

Mo lingbi ti tene, “a yeke biani kota ye ti hinga azo so asû abuku ti yâ ti Bible?” A yeke biani kota ye. Tongana a mû na mo mbeni mbeti na a tene na mo a tene a yeke testament ti mbeni kamarade ti mo so na yâ ni lo fa ye so lo ye a sara na peko ti kuâ ti lo, na pekoni mo bâ so a yeke lo la lo sû ni pëpe, fade mo yeke bâ ande mbeti ni na nene ni? Bâ so ambeni zo so ahinga ye mingi na ndo ti atestament atene a yeke ambeni fami so ahinga kamarade ti mo ni nzoni la asû na mbeti aye so ala pensé atene ayeke atënë ti bê ti lo la. Mo yeke ngbâ ti bâ mbeti ni na nene ni? Mo yeke yeda biani so atënë ti yâ ti mbeti so ayeke atënë ti bê ti kamarade ti mo ni?

Ti Bible nga kue a yeke tongaso. A yeke ye ti dongo bê pëpe so mingi ti azo, même azo so atene ala yeke aChrétien, abâ so a yeke na lege ni ti sara sanka ti aye so Bible afa na ndo ti aye tongana sarango ye na lege ni, bungbingo ti koli na wali nga na ambeni ye tongaso. Fani mingi azo atene nzoni tene ti Bible pëpe na lege ti atënë tongana, “Ô, so a yeke na yâ ti Testament ti Giriri!”, mo bâ mo tene a lingbi ti ga na ye ti nzoni na zo pëpe. Atâa so ala hinga so bazengele Paul atene mbage ti Bible so azo airi ka ni Testament ti Giriri ayeke “aMbeti so ayeke nzoni-kue” na a sû ni na “gbe ti yingo ti Nzapa”.

Peut-être mo yeke tene so, “zo alingbi pëpe ti ke aye so awandara na azo so agi nda ti atënë ti Bible afa ni”. Tâ tënë! E kiri singila mingi na awandara so asara ye na lege ni ti mû maboko na e ti hinga tâ mbilimbili atënë ti Bible ni so a sû ni ândö. Biani, tongana a sû peko ti Bible fani mingi mingi na yâ ti angu mingi, akete kete faute alï na yâ ni. Me a lingbi mo hinga ye so: ti yeda so akete kete faute alï na yâ ti Bible na ngoi so a yeke sû pekoni nga ti ke atënë ti yâ ti Bible kue na tenengo so a yeke tënë ti yanga ti azo, kota kangbi ayeke dä.

Ngbâ ti mä na bê na “aMbeti so ayeke nzoni-kue”

Kozoni si lo tene so a sû Bible na gbe ti yingo ti Nzapa, Paul afa na Timothée ndani so mara ti mbeti tongaso ayeke kota ye mingi. Lo tene: “Na alango ti nda ni,” “azo ti sioni na azo ti handango azo ayeke ngbâ gi ti sara sioni ti gue na ni, ala yeke handa azo na a yeke handa ala nga.” (2 Timothée 3:1, 13). Na ngoi ti Paul, azo so a bâ ala tongana “awandara” nga na “azo so ahinga ndo” ayeke lani dä awe. Ala yeke sara kusala na “atënë so ague na zo ti ye peko ti mbeni ye” ti handa azo na ti sara si mabe so ala yeke na ni na Jésus Christ awoko (1 aCorinthien 1:18, 19; aColossien 2:4, 8). Ti kanga lege na ala, bazengele Paul awa Timothée ti ‘ngbâ na yâ ti aye so lo manda ngbene ye so lo de foroto, na lege ti aMbeti so ayeke nzoni-kue’ so alondo na Nzapa.​—2 Timothée 3:14, 15.

A yeke kota ye ti tene mo nga kue mo sara tongaso na ngoi ti “alango ti nda ni” so. Ambeni zo so ahinga ye mingi ayeke sara kusala mingi na “atënë so ague na zo ti ye peko ti mbeni ye” ti handa na azo. Sara hange, ala lingbi ti handa mo. Me na tapande ti akozo Chrétien, ti bata tere ti mo, zia bê ti mo kue na ndo ti ye so mo manda na yâ ti Bible so ayeke biani Mbeti ti Nzapa so a sû na gbe ti yingo ti Nzapa.

A yeke nzere mingi na aTémoin ti Jéhovah ti mû maboko na mo ti mä na bê na Bible. Na tapande, ala yeke fa na mo so aye so Bible afa ayeke tâ tënë na zo alingbi ti zia bê ti lo dä; tongana Bible andu tënë ti senda-ye, aye so lo fa ayeke tâ tënë; atënë ti yâ ti Bible ague oko, ti londo na kozo buku ni ti si na nda ni. Tongana mo ye, sû mbeti na azo so asara mbeti so ti wara asango so amû maboko na azo kutu mingi so aye ti hinga tâ tënë ti bâ so Bible ayeke biani tënë ti yanga ti Nzapa.

[Kete tënë na lembeti 5]

Biani, kozoni si mo zia bê ti mo na ambeni zo, mo yeke sara nyen?

[Kete tënë na lembeti 6]

E kiri singila mingi na awandara so asara ye na lege ni ti mû maboko na e ti hinga tâ mbilimbili atënë ti Bible ni so a sû ni ândö