Ngbanga ti nyen a yeke nzoni mo diko Bible?

Bible ayeke mbeni mbeti so a yeke wara ni na ndo ti dunia kue ahon tanga ti ambeti kue. Ngbanga ti nyen? Ngbanga ti so zo alingbi ti bâ tere ti lo na yâ ni. E yeke wara na yâ ni atâ mbaï ti aye so asi lani na azo nga na ti songo so ayeke na popo ti azo ni nga na popo ti ala na Nzapa. Zo ayeke manda ye na lege ti ambaï ni so, so a sû ni na atënë so akpengba ape. Ye so amû lege ti tene a kiri pekoni na ayanga ti kodoro ngbangbo mingi si azo kue, atâa ala lango na ndo wa nga na ngoi wa, alingbi ti mä yâ ni. Atënë ti yâ ti Bible ayeke lakue na ngangu.

Kota ye ni encore ayeke so, atâa so Bible ayeke mbeni mbeti so asara tënë na ndo ti Nzapa, lo yeke nga mbeni mbeti so alondo na Nzapa. Lo fa iri ti Nzapa, asarango ye ti tere ti lo, nga na ye so lo ye ti sara, so achangé ape, ndali ti sese nga na azo. Bible asara nga tënë na ndo ti tiri so ayeke depuis na popo ti ye so ayeke nzoni nga na ye so ayeke sioni, mbeni kota tiri so ye ti nzoni ayeke ga na pekoni ande. Tongana zo adiko Bible sân ti duti na sioni pensé na ndo ni, lo yeke duti na mabe nga na beku.

Na yâ ti Bible, e yeke wara asango so e lingbi ti wara ni na mbeni ndo nde ape. Na tapande, Bible atene na e tâ tënë na ndo ti atënë tongana ati so ge:

• E azo e bâ gigi tongana nyen nga e yeke bâ pasi ngbanga ti nyen?

• Nyen la Nzapa asara ti zi e?

• Nyen la Jésus asara ndali ti e?

• Nyen la ayeke si ande na e azo nga na sese?

E wa mo ti diko atënë so ayeke ga na peko ti hinga aye so ayeke na yâ ti Bible.