E azo e bâ gigi tongana nyen?

Na nduru tënë, Genèse, so ayeke kozo buku ti yâ ti Bible, afa tongana nyen la dunia abâ gigi. A tene: “Kozoni, Nzapa acréé ayayu na sese.” (Genèse 1:1). Na peko ti so Nzapa asara akeke na anyama, lo sara akozo zo, Adam na Ève. Ala yeke nde na anyama ndali ti so ala yeke lani na ambeni sarango ye so akpa ti Nzapa, so na popo ni ala yeke na liberté ti mû adesizion. Tongaso, ala yeke na tënë ti kiri na ni ndali ti asarango ye ti ala. Tongana ala mä yanga ti Nzapa, ala yeke duti akozo babâ na mama ti azo kue, na ala kue ayeke duti kpu na kpu na siriri nga na nzoni tere na ndo ti sese, ye so Nzapa aye lani ndali ti azo la.

Mawa ni ayeke so mbeni ange agbu lege ni so ti sara kusala na azo ti wara na ye ti bê ti lo. Ye so asara si lo ga Satan, so ti tene “Wato.” Satan asara kua na mbeni ngbo ti handa na Ève, lo tene na lo so lo Ève ni lo yeke duti nzoni gi tongana lo sigigi na gbe ti Nzapa. Adam na Ève atï na peko ti Satan, ala fâ yâ ti songo so ala yeke na ni na Nzapa so acréé ala. Sioni desizion so akozo babâ na mama ti e so amû asara si ala girisa fini ti lakue lakue nga ala ga na siokpari na ndo ti e kue nga na kuâ so e lingbi ti kpe ni ape.

Tâ gi na pekoni, Nzapa afa ye so lo yeke sara ti leke na kpale ni so nga ti mû lege na amolenge ti Adam ti wara fini ti lakue lakue. Nzapa asara tënë ti mbeni “hale”, mbeni zo so mbeni zo nde ti lingbi na lo ayeke dä ape. Zo ni so ayeke futi ande Satan nga lo yeke zi ande apasi kue so Satan na Adam nga na Ève aga na ni (Genèse 3:15). “Hale” ni so ayeke zo wa? Ngoi mingi na pekoni la si a yeke hinga lo.

Me tongana angoi ayeke hon, Satan agi ti kanga lege na anzoni ye so Nzapa aye ti sara so. Siokpari nga na sarango ye ti sioni amû ndo hio. Ni la Nzapa aleke lani ti futi asioni zo na lege ti mbeni kota ngu. Lo tene na Noé, mbeni zo ti mbilimbili, ti leke mbeni arche (mbeni ngbongboro caisse so ayeke tambela na ndo ti ngu) si lo na sewa ti lo nga na anyama so Nzapa ayeke tene na lo ti lï na ala na yâ ti arche ni ayeke sö kuâ ande.

Ngu oko na peko ti so kota ngu ni akomanse ti pika, Noé na sewa ti lo asigigi na yâ ti arche ni, sioni sarango ye ayeke dä encore na ndo ti sese ape. Me ade “hale” ni asi ape.

​—A wara ni na Genèse chapitre 1-11; Jude 6, 14, 15 nga na Apocalypse 12:9.