Nzoni tënë ndali ti azo kue

Zingongo ti Jésus na kuâ amû ngangu na adisciple ti lo nga akiri azia nzara ti kua ti fango tënë na yâ ti ala. Ti bazengele Paul, lo sara avoyage na akodoro so ayeke na tere ti Ngu-ingo ti Méditerranée, ti zia gere ti acongrégation na sese nga ti kpengba aChrétien si ala hon ndo ti akpale so ala wara nga na sioni kangango lege ti awato. Atâa akpale ni so, azo mingi aga aChrétien.

Na pekoni, a bi Paul na kanga. Me même na da ti kanga ni, lo tokua ambeti na acongrégation ti kpengba azo ni nga ti mû wango na ala. Lo gboto même mê ti ala na ndo ti mbeni sioni ye so ayeke hara ala, ye ni so ayeke so ambeni Chrétien ayeke dö ande lege ti tâ vorongo azia. Na lege ti yingo vulu ti Nzapa, Paul abâ so “ambo ti ngonda so asara ye na ngangu” na so ayeke tene “atënë so ala ba yâ ni kirikiri” ayeke lï ande na popo ti ala ti “gboto na adisciple na peko ti ala.”​—Kusala 20:29, 30.

Angu mingi na pekoni, ambeni Chrétien ni ato nda ti dö lege ti tâ vorongo ti zia. Na ngoi ni so, Jésus, so lo zingo na kuâ awe, afa na bazengele Jean ambeni ye so ayeke si ande so lo sû ni na yâ ti buku ti Apocalypse. Tongana ti so Jean asû ni, mbeni wato wala zo ti fango tënë ti mvene alingbi ti kanga lege pëpe na Nzapa ti sara tâ ye so lo ye ti sara kozo ndali ti sese nga ndali ti azo. Ande “amara kue, akete mara kue, azo ti ayanga ti kodoro kue nga na azo ti kodoro kue” ayeke mä nzoni tënë na ndo ti Royaume ti Nzapa (Apocalypse 14:6). A yeke kiri ti sara si sese aga Paradis, na zo kue so aye ti sara ye so bê ti Nzapa aye alingbi ande ti duti na yâ ti Paradis ni.

So “nzoni tënë” la ape? Tongana mo kue mo bâ ni tongaso, e wa mo ti manda ye mingi na ndo ti tënë so Nzapa ayeke na ni ti tene na azo kue, so a wara ni na yâ ti Bible. Bâ nga ye so mo lingbi ti sara ti wara nzoni na lege ti atënë ni so laso nga kekereke.

Mo lingbi ti diko Bible na ndo ti Internet na ayanga ti kodoro 50 tongaso na ndo ti site www.pr418.com. Na ndo ti site so, mo lingbi nga ti diko ambeti tongana: La Bible ​— Quel est son message ?, Nzoni tënë so alondo na Nzapa! nga Bible afa nyen biani? Mo yeke wara nga ambeni mbeti so afa ndani so e lingbi ti yeda na atënë so ayeke na yâ ti Bible nga so afa tongana nyen la e lingbi ti sara ye ague oko na anzoni wango ti yâ ni na yâ ti sewa ti e wala na yâ ti gigi ti e wani. Wala hunda tënë na mbeni Témoin ti Jéhovah.

​—A wara ni na Kusala, aÉphésien, aPhilippien, aColossien, Philémon, 1 Jean nga na Apocalypse.