Lege ti sigigi na yâ ti akpale ti peko ti divorce

Ambeni zo adivorcé ngbanga ti so ala ye ti tene gigi ti ala aga nzoni, me ti ambeni ala ye ti ngbâ na zo ti ala ni me zo ni aye ape. Mawa ni ayeke so mingi ti azo so adivorcé aga ti bâ so gigi ni akiri aga ngangu na ala ahon ti so ala pensé fade. Mo kue, hinga ape mo divorcé ade ti ninga ape, peut-être mo bâ so akpale ti mo ni akiri ahon ati kozoni. Me, ambeni wango so ayeke na yâ ti Bible alingbi ti mû maboko na mo ti hon ndo ti akpale ni so.

KOZO KPALE NI: ASIONI PENSÉ.

Kpale ti nginza, ti batango amolenge nga ti so mo bâ so mo yeke gi mo oko alingbi ti woko mo kue na alingbi ti ngbâ aninga. Yapakara Judith Wallerstein abâ so même angu mingi na peko ti so ambeni zo adivorcé, ambeni abâ so kä so koli ti ala wala wali ti ala azia na bê ti ala angbâ lakue nga ala yeke gi ala oko. Na ala, “gigi ni aye ala ape, gi ye ti vundu la ayeke dä nga zo oko aye ala ape.”

YE SO MO LINGBI TI SARA

• Toto na ndo ti ye so mo girisa so.b Hinga ape mo ye koli ti mo, me fadeso lo manke mo mingi. Même si songo ti mo na lo ayeke lani nzoni ape, vundu alingbi ti sara mo ngbanga ti so ngia so mo pensé ândö mo yeke duti na ni na yâ ti mariage ti mo, mo wara ni ape (aProverbe 5:18). Sara kamene ape ti mû mbeni ngoi ti “toto”.​—Zo-ti-fa-tene 3:1, 4.

• Gi ti duti lakue gi mo oko ape. Atâa so mo bezoin ti duti gi mo oko ti toto, sara hange si mo duti mo oko aninga ngbii ape (aProverbe 18:1). Tongana mo yeke duti na akamarade ti mo, sara gi anzoni lisoro. Me ti dema lakue na ndo ti ngbene koli ti mo, même si mo yeke na raison, alingbi ti tomba azo na tere ti mo. Tongana mo yeke na ambeni kota desizion ti mû tâ gi na peko ti divorce ti mo, hunda mungo maboko na mbeni zo so mo sara confiance na lo.

• Bâ santé ti mo nzoni. Vundu ti peko ti divorce ayeke ga ka na kpale ti seni, tongana kobela ti tension wala songo li. Ni la te ye nzoni, sara sport nga lango nzoni.​—aÉphésien 5:29.

• Zi aye so na bango ni akiri azia ngonzo na bê ti mo na tere ti ngbene koli ti mo wala so mo yeke na bezoin ni encore ape. Me ambeti so mo yeke duti lakue na bezoin ni, bata ni. Tongana ambeni ye ayeke zia vundu lakue na bê ti mo, na tapande afoto ti mariage, zia ala na yâ ti mbeni carton na bata ni ndali ti amolenge ti mo.

• Tomba asioni pensé na li ti mo. Olga, so adivorcé na koli ti lo ndali ti so lo gi mbeni wali nde, atene: “Mbi hunda ka tere ti mbi, mbi tene, ‘Nyen la wali ni so ahon mbi na ni nyen?’” Me, tongana ti so Olga aga ti bâ na pekoni, ti bata lakue gi asioni pensé alingbi ti sara si “bê ti zo awoko kue”.​—aProverbe 18:14, FD.

  Azo mingi abâ so ti sû na mbeti aye so ayeke ga na li ti ala amû maboko na ala ti leke yâ ti apensé ti ala ni si tongana sioni pensé aga na li ti ala, ala kiri na ni na nzoni lege. Tongana mo sara tongaso, gi ti changé asioni pensé so mo yeke tiri na ni na afini ni so ayeke nzoni (aÉphésien 4:23). Bâ atapande use so:

  Ngbene pensé ni: Mbi la mbi sara si koli ti mbi ague agi mbeni wali nde.

  Fini ni: Même si ambeni sarango ye ti mbi akpa ape, koli ti mbi ayeke na droit ape ti nzi tere ti lo.

  Ngbene pensé ni: Mbi buba ngoi ti mbi kue na mara ti sioni koli tongaso.

  Fini ni: Mbi yeke duti na ngia tongana mbi bâ gi ndo na devant ahon ti bâ ndo na peko.

• Zi bê ti mo na ndo ti atënë so ason bê. Akamarade na afami alingbi peut-être ti tene ambeni tënë so ala pensé so ayeke nzoni ndali ti mo, me alingbi ti son bê wala ayeke na lege ni ape. Peut-être ala tene: ‘Lo lingbi na mo lani ape,’ wala ‘Nzapa aye tënë ti divorce ape.’c Ni la, Bible atene: “Mo zia bê ti mo pëpe na tënë kue so zo atene.” (Zo-ti-fa-tene 7:21). Martina, so adivorcé a sara ngu use awe, atene: “Ahon ti tene mbi pensé gi na ndo ti atënë so ason bê, mbi gi ti bâ aye ni tongana ti Nzapa. Bibe ti lo ayeke na nduzu ahon bibe ti e azo.”​—Ésaïe 55:8, 9.

• Sambela Nzapa. Lo wa azo so avoro lo ti “bi agingo bê ti ala kue na ndo ti lo,” mbilimbili na ngoi so vundu ahon ndo ti ala.​—1 Pierre 5:7.

USE KPALE NI: SONGO TI MO NA NGBENE KOLI TI MO.

Juliana, so asara mariage a sara ngu 11 kozo na divorce ti lo, atene: “Mbi hara yanga na koli ti mbi ti ngbâ me kue gbä. Na tango so lo hon, bê ti mbi ason sioni na tere ti lo nga na tere ti fini wali ti lo ni.” Azo mingi so asara divorce ayeke bata ka ngonzo mingi na tere ti ngbene zo ti ala ni angu mingi. Me, mingi ni tongana ala yeke na amolenge, ala lingbi ti kpe ape ti sara lisoro na ngbene zo ti ala ni.

YE SO MO LINGBI TI SARA

• Bata nzoni songo na ngbene koli ti mo ni. Gue gi droit na ndo ti tënë so ayeke kota ye na lê ti ala use kue, nga gue na tënë ni ayo ape. Azo mingi abâ so sarango tongaso aga na siriri na popo ti ala.​—aRomain 12:18.

• Tene atënë ti zö yâ ti bê ti lo ape. Tongana lo bi tënë ni gi na li ti mo, pendere wango ti Bible so alingbi ti mû maboko na mo, a tene: “Zo so asara tënë mingi pëpe ayeke na ndara.” (aProverbe 17:27). Tongana mo bâ so lisoro ni ayeke ga gi sioni, si ye ni aga ngangu na mo, mo lingbi ti tene: “Zia mbi gbu li ti mbi na ndo ti tënë so mo tene so na e yeke kiri na ndo ni ande.”

• Hinga ti zia kangbi na popo ti aye so abâ gi mo wani nga na ati so abâ mo na lo use kue, aye tongana ambeti ti Letäa nga na aye so andu tënë ti nginza.

OTA KPALE NI: MUNGO MABOKO NA AMOLENGE TI MO.

Maria adabe ti lo na aye so asi tâ gi na peko ti divorce ti lo, lo tene: “Kete molenge ti mbi ti wali ayeke toto gi totongo nga lo kiri lo komanse ti sara inon na gbogbo. Ti yaya ni, atâa so lo ye ti fa ye so ayeke na yâ ti bê ti lo ape, mbi hinga so lo nga kue a sara lo nzoni ape.” Mawa ni ayeke so, na ngoi ni so, so amolenge ti mo ayeke tâ na bezoin ti mo mingi, peut-être mo bâ so mo yeke na ngoi ape nga na ngangu ape ti mû maboko na ala.

YE SO MO LINGBI TI SARA

• Wa amolenge ti mo ti fa na mo atënë ti bê ti ala, même si mo pensé so ala yeke ‘diko ande tënë kirikiri’.​—Job 6:2, 3, FD.

• Yôro amolenge ni na yâ ti tënë ni ape. Hinga ape mo bezoin ti tene mbeni zo adë bê ti mo, na mo bâ so amolenge ti mo ayeke na nzara ti mû maboko na mo na yâ ni. A yeke na lege ni ape ti hunda na mbeni molenge ti mû maboko na mo na yâ ti mbeni tënë so abâ gi akota zo, teti a lingbi ti sara lo nzoni ape (1 aCorinthien 13:11). Kpe ti sara si molenge ti mo aga zo so mo yeke fa atënë ti bê ti mo kue na lo wala lo ga zo ti tokua na popo ti mo na ngbene koli ti mo ni.

• Changé yâ ti aye kirikiri ape. Tongana ala ngbâ na yâ ti da so ala yeke dä kozo na ala changé yâ ti kapa ti ala ape, a yeke sara nzoni mingi na amolenge ni. Me kota ye ni kue ayeke ti bata mbeni nzoni kapa ti aye ti yingo, na tapande, ti diko Bible lakue nga ti voro Nzapa na yâ ti sewa.​—Deutéronome 6:6-9.

Lege ayeke dä biani ti sigigi na yâ ti akpale ti peko ti divorce ti mo. Melissa, so asara ngu 16 ti mariage kozo ti tene lo divorcé, atene: “Na tango so mbi sara divorce, mbi tene,​—‘Mbi ye fade ti tene gigi ti mbi aduti tongaso ape.’” Fadeso, lo yeke na ngia atâa dutingo ti lo ni. Lo tene: “Gi so mbi zia lege ti tene so mbi hinga ândö ka mbi sara tongaso tongaso, ge la mbi duti nzoni fadeso.”