“Jéhovah apardone ala na bê ti lo kue”

Edward Herbert, mbeni wandara na kodoro ti Grande-Bretagne ândö, atene: “Zo so apardone mba ti lo ape, andâ lo yeke kungbi pont so lo doit ti hon dä la.” Lo tene atënë so ti fa so e doit ti pardone amba ti e teti, nyen na nyen, e bezoin mbeni lâ ti tene amba ti e apardone e nga (Matthieu 7:12). Me, mbeni kota raison so e doit ti pardone amba ti e ayeke dä. Bâ atënë ti bazengele Paul so ayeke na aColossien 3:13.​—Diko ni.

So e kue e yeke na siokpari na tere ti e, ngoi na ngoi e yeke son bê ti amba ti e na ala nga kue ayeke son bê ti e (aRomain 3:23). E lingbi ti sara nyen ti bata siriri na popo ti e na amba ti e? Nzapa amû lani ndara na Paul ti wa e ti kanga bê na amba ti e nga ti pardone ala. Atâa so awango ti lo ni asara ngu saki use tongaso awe, a ngbâ lakue na ngangu. Zia e bâ fadeso atënë ti Paul ni nzoni.

“Ala ngbâ ti kanga bê na amba ti ala na popo ti ala.” Tënë ti Grec so a kiri pekoni na “ala ngbâ ti kanga bê na amba ti ala” afa na e so a yeke nzoni e hinga ti hon na ndo ti asioni ti amba ti e. Mbeni bakari atene so aChrétien ayeke fa mara ti sarango ye ni so na lege so “ala yeke nduru ti kanga bê na zo kue so afaute ti lo wala sarango ye ti tere ti lo ason bê ti ala.” Tënë “na popo ti ala” aye ti fa so zo kue la adoit ti kanga bê na mba. Ndani la, tongana e dabe ti e so ambeni sarango ye ti tere ti e alingbi ti son bê ti amba ti e, e yeke zia pëpe si asarango ye ti tere ti amba ti e so anzere na e ape abuba siriri so ayeke na popo ti e na ala. Me e yeke sara nyen tongana amba ti e ason bê ti e?

“Ala ngbâ . . . ti pardone mba na bê ti ala kue.” Tongana ti so mbeni wandara atene, tënë ti Grec so a kiri pekoni na ‘pardone na bê kue’ “ayeke pëpe gi senge tënë ti pardon . . . me a yeke mbeni tënë so alï mingi na so ayeke gi ti pardone wasiokpari ni na ti kiri na ndo ni ape.” Mbeni mbeti ni nde atene so tënë so aye nga ti tene “ti sara mbeni ye so anzere na bê wala asara nzoni na zo.” E yeke sara nzoni bê na zo na lege so e yeke duti nduru ti pardone zo na bê kue même si e yeke na “tënë ti dema” na tere ti lo. Ngbanga ti nyen a yeke nzoni e sara tongaso? Mbeni raison ni ayeke so a lingbi ti si so na mbeni ngoi e nga kue e lingbi ti sara mbeni ye so ason bê ti zo ni na e bezoin ti tene lo pardone tâ e.

“Gi tongana ti so Jéhovah apardone ala na bê ti lo kue, ala nga ala sara tongaso.” Tâ kota raison so e yeke na ni ti pardone amba ti e na bê ti e kue ayeke so Jéhovah Nzapa ayeke pardone ka e na bê ti lo kue (Michée 7:18). Gbu li kete na ndo ti kota nzoni bê so Jéhovah ayeke sara na mbeni wasiokpari so achangé bê ti lo. Nde na e, Jéhovah asara ti lo siokpari ape. Me, zo so asara siokpari si achangé tâ bê ti lo, Jéhovah ayeke nduru ti pardone lo na lo yeke pardone lo kue kue kue. Lo yeke sara tongaso atâa so lo hinga so lo bezoin ande lâ oko ape ti tene zo ni apardone lo, so lo sara ti lo siokpari ape so. Biani, Jéhovah ayeke tâ pendere tapande ti zo so ayeke pardone na bê kue zo so achangé bê ti lo!

Nzoni bê ti Jéhovah asara si e ga nduru na lo nga apusu e ti mû tapande ti lo (aÉphésien 4:32–5:1). A yeke nzoni e oko oko kue e hunda tere ti e, ‘So Jéhovah ayeke pardone mbi na bê ti lo kue so, mbi ni mbi yeke ti mbi zo wa ti ke ti pardone mba ti mbi zo so lo hunda na bê ti lo oko ti tene mbi pardone lo so?’​—Luc 17:3, 4.