“Azo mingi aye lani tënë ti mbi ape”

GIGI TI MBI ÂNDÖ:

Mbi kono na Santiago, li-kodoro ti Chili, na mbeni ndo so mbangi, fango zo, nzi nga na asioni zo ahon ndo ni. Babâ ti mbi akui na tango so mbi yeke na ngu oku. A fâ lo fango. Na pekoni, mama ti mbi amû mbeni sioni koli. Lakue, lo yeke pika mbi na mama. Pikango e ni asara mbi nzoni ti kete ape juska laso.

Tongana mbi yeke kono, asioni sarango ye ti azo ti yâ ti vaka ti mbi asara si mbi ga sioni mingi. Mbi yeke mä ka ambeni bia so akpa ape, mbi yeke nyon nga sämba ahon ndo ni, nga ngoi na ngoi mbi yeke nyon mbangi nga. Mbi yeke yô ka tiri na ambeni zo ti kango mbangi, so lege mingi ala gi ti fâ mbi lani. Mbeni lâ, ambeni sioni zo ni apayé mbeni zo ti fango zo ti fâ mbi. Lo kpo mbi na zembe, me mbi wara lege ti kpe. Na mbeni ngoi ni nde nga, ambeni zo ti kango mbangi azia ngombe na tere ti li ti mbi na ala gbi kamba na go ti mbi ti fa mbi.

Na ngu 1996, mbi tï mbeni wali. Iri ti lo ayeke Carolina, si na ngu 1998 e sara mariage. Tâ gi na peko ti so e dü kozo molenge ti e, ndali ti so mbi ye ngonzo mingi, mbeto ti tene mbi sara sioni na sewa ti mbi tongana ti koli ti mama ti mbi ândö asara mbi. Tongaso, mbi gue mbi bâ adocteur ti mû maboko na mbi. Ala mû na mbi ambeni yorö nga na awango, me kue gbä. Kete ye, mbi sara ngonzo, kete ye, mbi sara ngonzo. Na bango so aye ni alï gi na ngu, mbi tara lani ti fâ tere ti mbi. Me merci so mbi kui ape.

Mbi tene ti mbi ândö mbi tene Nzapa ayeke dä ape. Me ambeni ngu na pekoni, mbi ye ti mä na bê na Nzapa. Tongaso, teti mbeni ngoi mbi gue mbi sara bungbi na Eglize évangélique. Me na oko ngoi ni wali ti mbi na aTémoin ti Jéhovah ayeke manda Bible. Mbi ye tënë ti aTémoin lani ti kete ape, nga fani mingi mbi yeke dekongo na li ti ala nga mbi yeke tene asioni tënë na ala. Ye oko, ala yeke sara tënë na mbi gi yeke. Mbi ku lani tere ti mbi na sarango ye ti ala ni so ape.

Mbeni lâ, Carolina ahunda na mbi ti diko Psaume 83:19 na yâ ti Bible ti mbi wani. Versê ni afa polele so iri ti Nzapa ayeke Jéhovah. Ye so apika bê ti mbi, teti na eglize ti mbi a fa na mbi ye gi na ndo ti mbeni nzapa, me na ndo ti Jéhovah ape. Tongaso, na ngu 2000, mbi nga kue mbi to nda ti manda Bible na aTémoin ti Jéhovah.

LEGE SO BIBLE ACHANGÉ FINI TI MBI:

Na yâ ti mandango ye ti mbi ni, mbi manda so Jéhovah ayeke mbeni Nzapa so ayeke bâ mawa ti zo nga lo yeke pardone zo. Ye so adë bê ti mbi mingi. Na tapande, na Exode 34:6, 7, Bible atene so Jéhovah ayeke “Nzapa ti be-nzoni na ti grâce, ngonzo ti Lo alondo fade [fade] pëpe, tene-biani na nzobe ti Lo ayeke kota mingi; Lo bata nzobe teti azo [saki] mingi, Lo pardone sioye na kengo-ndia, na siokpari.”

Atâa so kue, a yeke lani ngangu na mbi ti sara ye ague oko na aye so mbi yeke manda so. Ti mbi, a yeke duti ande ngangu na mbi ti zia lege ti ngonzo. Ye oko, lakue tongana mbi tï na yâ ti ngonzo, Carolina ayeke mû maboko na mbi na ndoye. Lo yeke tene ka na mbi so Jéhovah ayeke bâ effort ti mbi ni, a sara si mbi gi lakue ti nzere na lê ti Jéhovah, atâa so na yâ ti li ti mbi, mbi tene ti mbi, mbi tene, mbi buba ti mbi awe.

Mbeni lâ, Alejandro, Témoin so ayeke manda Bible na mbi, ahunda na mbi ti diko aGalate 5:22, 23. Aversê ni afa so lengo ti yingo ti Nzapa ayeke “ndoye, ngia, siriri, kangango bê ti ku, sarango nzoni na zo, bê so aye gi ti sara nzoni na zo, mabe, sarango ye na ngangu pëpe, kangango nzara ti bê.” Alejandro atene na mbi so tongana mbi ye ti duti na asarango ye so, a lingbi mbi hunda yingo vulu ti Nzapa, me a yeke na ngangu ti mbi wani ape. Tënë ti lo ni so asara si bango ndo ti mbi achangé kue.

Na mbeni lango ni nde, mbi gue na mbeni kota bungbi ti aTémoin ti Jéhovah. Ye so mbi bâ kâ asara si mbi tene so tâ tënë la! Saleté ayeke na ndo ni so ape, aye kue atambela gi na lege ni nga azo ni aye tere (Jean 13:34, 35). Na nda ni, mbi wara batême na février 2001.

NZONI YE SO MBI WARA NA PEKONI:

Jéhovah asara si mbi changé. Kozo mbi yeke sioni zo, me fadeso mbi ga nzoni zo. A yeke mo bâ mo tene lo zi mbi na yâ ti mbeni popoto so sigingo na yâ ni ayeke ngangu. Azo mingi aye lani tënë ti mbi ape, na a yeke faute ti ala ape. Me fadeso, mbi yeke sara na Jéhovah na ngia, mbi na wali ti mbi nga na amolenge ti e ni use kue.

So sarango ye ti mbi aga nde mingi so asara si li ti afami nga na angbene kamarade ti mbi akpe kue, si mingi ti ala ayeda ti manda Bible. Mbi mû nga maboko na ambeni zo ti hinga Jéhovah. So ngia si mbi yeke na ni ti bâ tongana nyen la Bible achangé fini ti ambeni zo nga!