Ye so acouleur ayeke sara ka na ndo ti mo

Tongana mo bi lê ti mo na tere ti mo, lê ti mo ayeke tokua asango na mongoli ti mo. Mo bâ mbeni lê ti keke nduru na tere ti mo, na mo hunda tere ti mo, mo tene, ‘Mbi te ni? wala mbi te ni ape.’ Mo bâ lê ti nduzu na mo tene so ngu-nzapa ayeke pika laso ape. Mo yeke bâ alê ti tënë so mo yeke diko ni na mo yeke mä yâ ni. Aye so kue afa so acouleur ayeke sara ye na ndo ti mo. Tongana nyen?

Couleur ti lê ti keke so mo bâ ni fade apusu mo ti tene wala a be alingbi na ni awe si nzara ti tengo ni asara mo. Couleur ti lê ti nduzu ni asara si mo hinga so ngu-nzapa ayeke pika ape. Na ndembe so mo yeke diko atënë ti yâ ti article so, couleur ti alê ti atënë ni asigigi polele na lê ti mo si mo diko atënë ni nzoni. Biani, atâa mo hinga wala mo hinga ape, acouleur ayeke tokua na mo asango na ndo ti aye so angoro mo. Me gi so ape, acouleur ayeke sara nga ambeni ye na ndo ti ye so ayeke na yâ ti li ti mo.

YE SO ACOULEUR AYEKE SARA NA NDO TI YE SO AYEKE NA YÂ TI LI TI MO

Tongana mo yeke tambela na yâ ti mbeni magazin, mo yeke bâ gbâ ti akungba ti kango ni, na a leke ni ti gboto na lê ti mo. Mingi ni ka, azo so ayeke sara sabango ti akungba ti ala ayeke soro yâ ti acouleur nzoni ti ndu tâ gi ye so mo sara nzara ni, wala ti lingbi tâ gi na mo, mo so mo yeke koli, wala wali, wala maseka wala mbakoro. Azo so ayeke leke yâ ti da ti azo pendere mingi, wala ala so ayeke sigigi na afini bongo wala azo so ayeke sara apendere dessin ahinga so acouleur ayeke sara ye mingi na ndo ti ye so ayeke na yâ ti li ti azo.

Azo ayeke na abango ndo nde nde na ndo ti acouleur, alingbi na ndo so ala kono dä nga na ngobo ti ala. Na tapande, ambeni zo na sese ti Asie atene couleur ti bengba ayeke couleur ti chance wala ti sarango na matanga. Me na ambeni kodoro ti Afrika, ti ala a yeke couleur ti deuil. Ye oko, atâa na ndo wa, ambeni couleur ayeke dä so azo ayeke na même pensé na ndo ni. Zia e bâ acouleur ota nga na ye so acouleur ni so alingbi ti sara na ndo ti mo.

BENGBA ayeke couleur so ayeke pika ka lê ti zo hio. Mingi ni ka, azo atene a yeke couleur ti bira, ti mbeni sioni ye so ayeke hara zo wala ti ye so ayeke na ngangu. Couleur ni so ayeke sara ye mingi na ndo ti zo, na tapande, a lingbi ti sara si zo ayeke wu hio hio, wala tension ti lo amontê.

Na yâ ti Bible, tënë ti yanga ti Hébreu so a kiri pekoni na “bengba” alondo na mbeni tënë so ndani aye ti tene “mênë.” Bible asara kusala na couleur ti bengba so abe ngangu ti sara tënë ti mbeni wali-ndumba so afâ azo gbani gbani. Lo yü bengba bongo so avuko kete nga na bongo so abe mingi, nga lo yeke na ndo ti “mbeni bengba nyama ti ngonda so airi so azonga Nzapa asi singo na tere ti lo”. (Apocalypse 17:1-6). Mara ti fango ye tongaso ayeke ngbâ na li ti zo.

VERT ayeke mbeni couleur so ye so lo sara na ndo ti zo ayeke nde na ti bengba ni. Ti lo, lo yeke dë bê ti zo. Mingi ni ka, azo atene a yeke mbeni couleur so asara zo nzoni. Ni la, tongana e bâ ahoto nga na ando so akeke na apere vert vert ayeke dä, a sara e nzoni mingi. Mbeti ti Genèse atene na e so Nzapa amû akugbe ti kasa nga na akeke, so mingi ni couleur ni ayeke ti vert, ndali ti azo.—Genèse 1:11, 12, 29, 30.

VURU ayeke mbeni couleur so andu mingi ni mbeni ye so aza ngangu, wala mbeni ye so saleté ayeke na yâ ni ape, wala mbeni ye so abata zo yongoro na sioni ye. A ndu nga sarango ye so ayeke nzoni, wala so sioni ayeke na yâ ni ape. Bible ayeke sara ka tënë ti couleur ti vuru mingi. Na yâ ti asuma, a fa azo ni nga na a-ange ni na vuru bongo, ti fa sarango ye ti mbilimbili nga na dutingo na sioni oko ape na lege ti yingo (Jean 20:12; Apocalypse 3:4; 7:9, 13, 14). A fa avuru mbarata so azo so ayeke na ndo ni ayü avuru bongo ti lin. So ti fa so bira so ala yeke sara ayeke tâ ti mbilimbili (Apocalypse 19:14). Nzapa asara kusala na couleur ti vuru ti fa so lo yeke nduru ti pardone siokpari ti azo. Na Ésaïe 1:18, lo tene: “Kamême siokpari ti i ayeke tongana bengba ye, fade a vuru tongana neige.”

ACOULEUR AYEKE DABE TI E KA NA AMBENI YE

So Bible asara kusala na acouleur afa so Nzapa ahinga tongana nyen la acouleur ayeke sara ye na ndo ti mongoli ti zo. Na tapande, mbeti ti Apocalypse asara tënë ti aye so ayeke si na e azo laso, aye tongana bira, kota nzara, kuâ so aga na lege ti nzara nga na ti kobela. Ti mû maboko na e ti girisa ni ape, mbeni suma so Jean awara afa ambeni zo na ndo ti ambarata. A yeke asenge mbarata ape, me acouleur ti ala oko oko kue aye ti fa mbeni ye na e.

Na Apocalypse 6:1-8, a fa kozo mbarata ni, a tene a yeke vuru mbarata. A ye ti fa bira ti mbilimbili so Christ Jésus ayeke sara. Use ni ayeke mbeni mbarata so tere ti lo abe tongana wâ. Ti lo, a ye ti sara tënë ti bira so akodoro ayeke sara na popo ti ala. Ota mbarata ni so aga na peko ti use ni ayeke mbeni vuko mbarata so amû mbeto. A yeke fä ti kota nzara. Osio ni ayeke mbeni “mbarata so tere ti lo avuru akpa kuâ. Iri ti zo so aduti na ndo ti mbarata ni ayeke ‘Kuâ’.” (Fini Mbuki, 2001). Na bango acouleur ti ambarata ni so, e yeke mä yâ ni tâ nzoni. A sara si e yeke dabe ti e hio na acouleur ti ambarata so nga na ye so e lingbi ti manda dä laso.

Gbâ ti atapande ayeke na yâ ti Bible so asara kusala na acouleur ti fa na nda ti ambeni tënë polele. Biani, Nzapa, lo so asara lumière, acouleur nga na lê ti zo, asara kusala na acouleur na kode mingi ti fa ye na e, si e mä yâ ni nga si e girisa ni ape. Acouleur ayeke mû maboko na e ti hinga na asango na ndo ti aye so e bâ. Acouleur ayeke sara ye na ndo ti ye so ayeke na yâ ti li ti e. Ala lingbi nga ti dabe ti e na ambeni kota tënë. Biani, acouleur ayeke mbeni pendere matabisi so Nzapa amû na e, si gigi anzere na e.