KIRINGO TËNË NA AHUNDA TI AZO
Mbeni beku ayeke dä ndali ti azo so akui awe?
Kuâ ayeke tongana ti so zo alango na lege so wakuâ ni ahinga ye oko ape nga lo lingbi ti sara ye oko ape. Me Nzapa so asara aye kue alingbi ti zingo akuâ. Ti fa na e ni, Nzapa amû lani ngangu na Jésus ti zingo ambeni zo so akui lani.—Diko Zo-ti-fa-tene 9:5; Jean 11:11, 43, 44.
Na lege wa kuâ ayeke tongana ti so zo alango?
Nzapa atene so azo so akui si ala ngbâ na yâ ti li ti lo so, lo yeke zingo ande ala na yâ ti mbeni fini dunia so sarango ye ti mbilimbili ayeke duti ande dä. Me ti ku na ngoi ni so, ala yeke ngbâ tongaso juska Nzapa azingo ala si. Nzapa ti Ngangu Ahon Kue ayeke ku kungo ngoi so lo yeke mû ande ngangu ti lo ti zingo na akuâ.—Diko Job 14:14, 15.
A yeke zingo ande akuâ tongana nyen?
Na ngoi so Nzapa ayeke zingo akuâ, ala yeke hinga ande so ala wani la, na ala yeke hinga akamarade ti ala nga asewa ti ala. Atâa so tere ti wakuâ ni afun kue, Nzapa ayeke zingo ande gi oko zo ni so me na mbeni fini tere.—Diko 1 aCorinthien 15:35, 38.
A yeke zingo ande mbeni kete wungo ti azo ti gue ti duti na yayu (Apocalypse 20:6). Me ti tanga ti azo ni, a yeke zingo ala ti ngbâ na yâ ti Paradis na ndo ti sese ge. Ala yeke to nda ti mbeni fini gigi na beku ti duti na fini kpu na kpu.—Diko Psaume 37:29; Kusala 24:15.