A-ancien, ala bâ tënë ti fango kua na aita-koli tongana nyen?

1, 2. Nyen la asurveillant ti circonscription abâ na yâ ti acongrégation mingi?

MBENI surveillant ti circonscription aga nduru ti hunzi bungbi so lo sara na a-ancien. Na ngoi so lo bâ lê ti ala, lo yeke na ngia mingi ndali ti ngangu kua ti berger so ala yeke sara. Na popo ti a-ancien ni, a yeke wara ambeni so ngu ti ala ague na li ni mingi, na ala yeke tongana ababâ ti surveillant ni. Ye oko, lo yeke gi bê ti lo nga na ndo ti mbeni ye nde. Tongaso, lo hunda a-ancien ni, lo tene: “Aita, nyen la ala sara ti fa na aita-koli ti sara akua mingi na yâ ti congrégation?” A-ancien ni adabe ti ala so na ngoi ti ndangba vizite so lo sara na ala, lo wa ala ti mû ngoi mingi ti fa kua na aita-koli. Tongaso, mbeni ancien ni atene: “Ti tâ tënë ni, e fa kua na aita-koli mingi pëpe.” Tanga ti a-ancien ni ayeda na tënë ni.

² Tongana mo yeke ancien, peut-être mo yeke kiri tënë tongana ti ancien so. Na yâ ti dunia kue, asurveillant ti circonscription abâ so na yâ ti gbâ ti acongrégation, a-ancien ayeke na bezoin ti mû ngoi mingi ti fa na aita-koli so ayeke amaseka nga na akota zo tongana nyen ti bâ lege ti congrégation. Ye oko, a lingbi ti duti ngangu mingi na a-ancien ti sara ni. Ngbanga ti nyen?

3. (a) Tongana nyen la Bible afa so a yeke kota ye ti fa kua na zo? (b) Ngbanga ti nyen tënë ni abâ e kue? (Bâ kete tënë na gbe ni.) (c) Nyen la alingbi peut-être ti sara si a yeke ngangu na ambeni ancien ti fa kua na aita-koli?

³ So mo yeke ancien, kite ayeke dä pëpe so mo hinga so a yeke kota ye ti fa kua na aita-koli.a Mo hinga so a yeke na bezoin ti aita-koli mingi ti kpengba aita na yâ ti acongrégation nga ti sara si afini congrégation abâ gigi. (Diko Ésaïe 60:22.) Mo hinga nga so Bible awa mo ti “fa [ye] na ambeni zo.” (Diko 2 Timothée 2:2.) Atâa so kue, legeoko tongana ti a-ancien so e sara tënë ti ala fade, mo lingbi ti bâ so a yeke ngangu na mo ti sara tongaso. Na peko ti so mo mû ngoi ti bâ lege ti sewa ti mo, ti sara aye so a hunda na mo na place ti kua, ti sara akua ti congrégation nga ti sara ambeni ye so a hunda ti bâ lege ni hio, mo lingbi ti bâ so mo yeke na ngoi pëpe ti fa kua na aita-koli na yâ ti congrégation. Tongana a yeke tongaso, zia e bâ ndani so a yeke kota ye ti tene mo mû ngoi ti fa kua na aita-koli.

A LINGBI A FA KUA NA AITA-KOLI HIO

4. Nyen la alingbi ti sara si mbeni ancien apusu fango kua na aita-koli na peko?

⁴ Mbeni ye wa la alingbi ti sara peut-être si a yeke ngangu na ambeni ancien ti zia mbeni ngoi ti fa kua na aita-koli? Peut-être ambeni alingbi ti tene: ‘A yeke kota ye ti fa kua na aita-koli, me ambeni ye ayeke dä na yâ ti congrégation so ayeke kota ahon ni na so a hunda ti sara ni hio. Même tongana mbi fa kua na aita-koli fafadeso ape, aye ayeke ngbâ lakue ti tambela nzoni na yâ ti congrégation.’ Atâa so aye mingi ayeke dä so a hunda ti bâ lege ni hio, tongana mo ne nengo na fango kua na aita-koli, a lingbi ti sara si aye atambela nzoni na yâ ti congrégation ape.

5, 6. (a) Tapande ti zo ti kpengo na oto nga na ye so lo yeke sara ti bata oto ti lo nzoni afa na e nyen? (b) Tongana nyen la e lingbi ti haka ni na fango kua na aita-koli na yâ ti congrégation?

⁵ Gbu li ti mo na ndo ti tapande so: Mbeni zo ti kpengo na oto ahinga so ti bata oto ti lo si atambela nzoni, a lingbi lo changé mafuta ti moteur ni lakue. Ye oko, lo lingbi ti pensé so ziango essence na yâ ti oto la ayeke kota ye mingi ahon changengo mafuta ti moteur ni ndali ti so tongana essence ayeke na yâ ti oto ni ape, oto ni ayeke hon ape. Peut-être lo lingbi ti tene: ‘Même tongana mbi yeke na ngoi ti changé mafuta ni ape, oto ni ayeke ngbâ ti hon teti mbeni ngoi.’ Me kpale ni ayeke so wa? Tongana zo ti kpengo na oto ni angbâ ti gboto yâ ti lango so lo doit ti changé na mafuta ni, lawa lawa oto ni ayeke buba. Tongana oto ni abuba, a yeke hunda ngoi mingi nga gbâ ti nginza ti tene a leke ni. Nyen la tapande so afa na e?

⁶ A-ancien ayeke bâ lege ti akota kua mingi so a hunda ti sara ni hio, tongaso ape, aye ayeke tambela nzoni na yâ ti congrégation pëpe. Tongaso, legeoko tongana ti so a lingbi zo ti kpengo na oto azia essence na yâ ti oto ti lo lakue, a lingbi a-ancien “[a]hinga biani aye so ayeke akota ye mingi ahon atanga ni”. (aPhil. 1:10). Ye oko, ambeni ancien ayeke mû ngoi mingi ti bâ lege ti aye so a hunda ti sara ni hio asara si ala lingbi peut-être ti bâ fango kua na aita-koli tongana senge ye. A yeke tongana ti zo ti kpengo na oto so abâ changengo mafuta ti moteur ti oto ti lo tongana senge ye. Me tongana a-ancien angbâ ti pusu na peko lango so a lingbi ala fa kua na aita-koli, lawa lawa congrégation ayeke duti ande na bezoin ti aita-koli mingi so alingbi ti bâ lege ti aye kue so a hunda ti sara na yâ ti congrégation.

7. A lingbi e bâ a-ancien so azia mbeni ngoi ti fa kua na aita-koli tongana nyen?

⁷ Tongaso, a lingbi e pensé pëpe so fango kua na aita-koli ayeke mbeni senge ye. A-ancien so abâ ndo ayo nga so amû ngoi ti ala ti fa kua na aita-koli so ayeke na kode mingi ape ayeke awabatango ye so asara ye na ndara nga aita kue na yâ ti congrégation ayeke wara ye ti nzoni ndali ti ala. (Diko 1 Pierre 4:10.) Ye ti nzoni wa la aita na yâ ti congrégation ayeke wara dä?

ALA SARA KUA NZONI NA NGOI TI ALA

8. (a) Araison wa la apusu a-ancien ti fa kua na aita-koli? (b) Kua wa la a lingbi a-ancien so ayeke fa tënë na ando so bezoin ayeke dä mingi asara ni hio? (Bâ encadré “Mbeni kua so a lingbi asara ni hio.”)

⁸ A lingbi même a-ancien so ayeke na kode mingi asara tere ti ala kete nga ala hinga so tongana ngu ti ala ayeke gue na li ni, ala lingbi pëpe ti sara kua na yâ ti congrégation tongana ti so ala yeke sara fadeso (Mi. 6:8). Nga, a lingbi a-ancien ahinga so “lâ na pasa” alingbi ti sara si gi hio tongaso ala lingbi mbeni pëpe ti sara akua so ala yeke sara na yâ ti congrégation (Zo-ti. 9:11, 12; Jacq. 4:13, 14). Tongaso, teti so a-ancien aye awakua ti Jéhovah nga ala yeke bâ lege ti ala, a-ancien so abâ ndo ayo ayeke fa na aita-koli so angbâ maseka aye so ala manda na yâ ti kua so ala sara be-ta-zo teti angu mingi na Jéhovah.—Diko Psaume 71:17, 18.

9. Nyen la ayeke si ande so ndali ni a yeke kota ye mingi ti fa kua na aita-koli?

⁹ Mbeni ye ti nzoni wa la aita ayeke wara tongana a-ancien ayeke fa kua na aita-koli? A yeke sara si congrégation akpengba. Tongana nyen? Angangu so a-ancien ayeke sara ti fa kua na aita-koli ayeke sara si a yeke wara aita-koli mingi so ayeke nduru ti kpengba aita na yâ ti congrégation nga ti mû maboko na ala ti tene ala duti beoko laso nga na ngoi ti aye ti ngangu so ayeke si ande na ngoi ti kota ye ti vundu (Ézéch. 38:10-12; Mi. 5:4, 5). Tongaso, a-ancien so e ye ala mingi, e hunda na ala laso laso ti mû ngoi lakue ti fa kua na aita-koli.

10. Nyen la mbeni ancien alingbi ti sara ti wara ngoi ti fa kua na aita-koli?

¹⁰ E hinga so mo mû ngoi mingi ti bâ lege ti akota kua na yâ ti congrégation asara si peut-être mo bâ so mo yeke na ngoi encore ape. Tongaso, mo lingbi peut-être ti mû mbeni mbage ti ngoi ni so ti fa na kua na aita-koli (Zo-ti. 3:1). Tongana mo sara ni, a fa so mo sara kua nzoni na ngoi ti mo nga aita na yâ ti congrégation ayeke bâ nzoni dä mbeni lâ.

ALA LEKE BÊ TI AITA NI

11. (a) Nyen la apika bê ti e na ndo ti awango so a-ancien ti akodoro nde nde amû na ndo ti fango kua? (b) Ti gue oko na aProverbe 15:22, ngbanga ti nyen a yeke nzoni ti gbu li na ndo ti awango so ambeni ancien amû?

¹¹ Ade ti ninga pëpe, a hunda na ambeni ancien so amû maboko nzoni na aita-koli ti sara akua mingi na yâ ti congrégation ti fa tongana nyen la ala yeke sara ka ni.b Atâa so a-ancien so ayeke na yâ ti akodoro nde nde, awango so ala mû ague oko. Ye so afa nyen? A fa so na ndo kue nga na yâ ti acongrégation kue, tongana a sara kua na Bible ti fa kua na azo, azo so ayeke manda kua ni ayeke wara ye ti nzoni dä tongana ti ngoi ti bazengele Paul (1 aCor. 4:17). Tongaso, na yâ ti article so nga na ti peko, e yeke bâ ambeni wango so a-ancien so amû (aProv. 15:22). Ti tene ye ni aduti polele, na yâ ti a-article ni a yeke iri azo so ayeke fa kua “awafango ye” nga azo so amanda kua ni “awamandango ye”.

12. Nyen la a lingbi mbeni wafango ye asara ni kozo? Ngbanga ti nyen?

¹² A lingbi mbeni wafango ye aleke bê ti zo so lo ye ti fa kua na lo kozoni. Legeoko tongana ti so mbeni zo so ayeke sara jardin ayeke na bezoin ti leke sese kozo ti tene lo lu alê ti kobe dä, mbeni wafango ye ayeke na bezoin ti leke bê ti wamandango ye kozo ti tene lo fa na lo afini kode. Lo lingbi ti sara ni tongana nyen? Lo lingbi ti mû tapande ti prophète Samuel so ayeke ândö mbeni wafango ye so ahinga ti fa kua nzoni na zo.

13-15. (a) Kua wa la Jéhovah amû na Samuel ti sara? (b) Samuel asara kua ni tongana nyen? (Bâ foto so ayeke na tongo nda ti article ni.) (c) Ngbanga ti nyen mbaï ti Samuel alingbi ti mû maboko mingi na a-ancien laso?

¹³ A sara ngu 3000 na ndo ni awe, Jéhovah atene na prophète Samuel so ayeke mbakoro, a tene: “Kekereke na ngbonga tongaso, fade Mbi to zo oko ti sese ti Benjamin na mo, mo sa mafuta na li ti lo, si lo ga gbia ti azo ti Mbi Israël.” (1 Sam. 9:15, 16). Samuel ahinga so ngoi alingbi awe ti tene lo zia kua ti fango lege na mara ti Israël nga Jéhovah ahunda na lo ti soro mbeni zo ti sara kua ni na peko ti lo. Peut-être Samuel ahunda tere ti lo atene: ‘Tongana nyen la mbi yeke fa na zo ni ti sara kua ti lo?’ Li ti lo atï na ndo ti mbeni ye so lo lingbi ti sara, na lo leke ti sara ye ni.

¹⁴ Na ndade ni, na ngoi so Samuel abâ Saül, Jéhovah atene na prophète Samuel, a tene: “Bâ, a yeke zo so Mbi sara tënë ti lo na mo.” Tongaso, Samuel asara ye so lo leke ti sara. Lo tisa Saül ti te ye na yâ ti da ti tengo ye. Kâ, Samuel amû nzoni ndo ti duti so ahon atanga ni kue na Saül nga na zo ti kua ti lo na lo mû na ala apendere morceau ti nyama, na lo tene: “Mo kamata mo te, teti mbi bata ye so teti mo juska ngbonga so.” Tongana ala te ye ni awe, Samuel na Saül ague na da ti prophète Samuel na tongana ala yeke hon ala sara pendere lisoro na lege. Tongana ala si na da ti Samuel awe, ala montê na ndo ti da ni na Samuel “asara tënë na Saül na ndoda” juska ala lango. Na ndade ni, Samuel atuku mafuta na li ti Saül, lo su ngbangba ti lo, na lo mû na lo awango mingi. Na pekoni, lo tene na Saül ti gue. A leke Saül awe ti sara akua so ayeke ku lo.—1 Sam. 9:17-27; 10:1.

¹⁵ Biani, ti tuku mafuta na li ti mbeni koli ti ga zo so ayeke fa lege na mbeni mara ayeke nde na fango kua na mbeni ita-koli ti ga ancien wala wakua ti mungo maboko na yâ ti congrégation. Atâa so kue, a-ancien ti laso alingbi ti manda akpengba ye mingi na lege ti fason so Samuel aleke bê ti Saül na ni. Zia e bâ ambeni ye use so lo sara.

SARA KAMARADE NA AWAMANDANGO YE NI

16. (a) Na ngoi so azo ti Israël aye lani mbeni zo ti ga gbia ti ala, a sara Samuel tongana nyen? (b) Samuel asara ye tongana nyen na ngoi so Jéhovah atene na lo ti tuku mafuta na li ti Saül?

¹⁶ Duti nduru ti fa kua na duti na kite ape. Na ngoi so Samuel amä kpâ so azo ti Israël aye mbeni zo ti ga gbia ti ala, bê ti lo anze nga lo bâ so ala ke lo (1 Sam. 8:4-8). Lo ye lani ti sara ye so azo ti Israël ahunda na lo so pëpe. Me fani ota, Jéhovah atene na lo ti sara ye so ala hunda (1 Sam. 8:7, 9, 22). Atâa so kue, Samuel asara pëpe kota bê wala ngonzo na tere ti koli so ayeke mû place ti lo. Na ngoi so Jéhovah atene na lo ti tuku mafuta na li ti Saül, prophète ni asara ni na bê ti lo kue. Lo sara ni pëpe gi ndali ti so a lingbi lo sara ni me ndali ti so lo ye Jéhovah.

17. Tongana nyen la laso a-ancien ayeke sara ye tongana Samuel? Ye ti nzoni wa la ala wara na pekoni?

¹⁷ Legeoko tongana Samuel, laso a-ancien so ayeke na kode mingi ayeke sara ye na nzoni bê na aita so ala yeke fa kua na ala (1 Pi. 5:2). A-ancien tongaso ayeke zia pëpe lege ti fa kua na aita-koli na ala sara pëpe mbeto so tongana ala sara ni aita ni so ayeke mû ande ambeni kua na maboko ti ala. Awafango ye so asara ye na nzoni bê abâ awamandango ye tongana “amba ti ala awakua”, wala anzoni matabisi na yâ ti congrégation, me ala bâ ala pëpe tongana azo so ala na ala ayeke sara mandako (2 aCor. 1:24; aHéb. 13:16). Awafango ye tongaso ayeke na ngia mingi na ngoi so ala bâ so awamandango ye ni ayeke sara kua na akode so ala yeke na ni ti mû maboko na aita na yâ ti congrégation.—Kus. 20:35.

18, 19. Tongana nyen la mbeni ancien alingbi ti leke bê ti mbeni wamandango ye? Ngbanga ti nyen la a yeke kota ye mingi?

¹⁸ Duti wafango ye nga kamarade. Na ngoi so Samuel atingbi Saül, prophète ni alingbi fade ti mû gi ngbenda ti mafuta ni na lo tuku mafuta ni gi hio tongaso na li ti Saül na lo tene na fini gbia ni ti gue. Sarango tongaso ayeke fa biani so Saül aga gbia awe, me lo yeke hinga oko pëpe tongana nyen ti sara kua ni. Ahon ti sara ye tongaso, Samuel asara ye na nzoni bê na lo mû ngoi ti leke bê ti Saül yeke yeke. A yeke gi na peko ti so ala te pendere kobe, ala gboto gere, ala sara lisoro aninga nga ala wu tere ti ala nzoni awe la, prophète ni abâ so nzoni ngoi alingbi awe ti tene lo tuku mafuta na li ti Saül.

¹⁹ Legeoko nga laso, kozo ti tene a-ancien ato nda ti fa kua na aita-koli, a lingbi ala sara ngangu ti ga kamarade ti aita ni. Na yâ ti akodoro oko oko, ambeni mbilimbili ye so mbeni ancien ayeke sara ti lë mara ti pendere songo tongaso na aita ni ayeke nde nde alingbi na dutingo ti azo ti ndo ni nga na sarango ye ti ala. Ye oko, atâa ndo wa la mo sara kua ti mo ti ancien dä, tongana mo zia mbeni ngoi nde ti mû maboko na mbeni wamandango ye, a yeke mo bâ mo tene mo yeke tene na lo, mo tene: “Mbi bâ mo na nene ni”. (Diko aRomain 12:10.) Biani, awamandango ye ayeke bâ na nene ni mingi aye so mo yeke sara na ala na nzoni bê nga na aye so mo yeke sara ti fa so mo yeke bi bê ti mo na ala nzoni.

20, 21. (a) Ti mo, nzoni wafango ye ayeke zo wa? (b) Nyen la e yeke bâ na yâ ti article ti peko?

²⁰ A-ancien, ala girisa tënë so ape: Mbeni nzoni wafango ye ayeke zo so aye ti fa kua na zo nga aye zo so lo yeke fa kua na lo. (Bâ Jean 5:20.) A yeke kota ye ti sara tongaso ndali ti so tongana mbeni wamandango ye ahinga so mo bi bê ti mo biani na lo, lo yeke yeda na bê ti lo kue ti tene mo fa kua na lo. Tongaso, a-ancien so e ye ala mingi, na ngoi so ala yeke fa kua na aita-koli, ala gi ti duti gi awafango ye pëpe me ala gi nga ti ga akamarade ti aita ni.—aProv. 17:17; Jean 15:15.

²¹ Na peko ti so mbeni ancien aleke bê ti mbeni wamandango ye awe, lo lingbi ti to nda ti fa kua na lo. Akode wa la ancien ni alingbi ti sara kua na ni? E yeke bâ ni na yâ ti article ti peko.