Angbanga ti Nzapa: Eskê lo yeke gboto lakue mê ti azo nzoni kozo na ni?

MBENI zo ti météo abâ na lê ti mbeni radar mbeni ye ayeke maï. Lo bâ mbeni sioni kota pupu so aga nduru ti ya na ndö ti mbeni kodro so azo ayeke dä mingi. Ndali ti so lo ye ti tene sioni asi na azo ni ape, lo sara kue ti gboto mê ti ala kozo si pupu ni aya.

Legeoko nga, laso Jéhovah ayeke gboto mê ti azo ti sese na ndö ti mbeni “kota pupu” so ayeke sioni mingi ahon apupu kue so azo ti météo asara tënë ni. Lo gboto mê ti ala tongana nyen? Ngbanga ti nyen la e lingbi ti hinga na bê ti e kue so lo yeke zia ngoi so alingbi na azo ti sara ye alingbi na gbotongo mê ni? Ti kiri tënë na ahundango ndo so, zia e bâ kozoni ambeni gbotongo mê so Jéhovah agboto mê ti azo ândö.

NZAPA AGBOTO MÊ TI AZO

Ândö, Jéhovah agboto mê ti azo na ndö ti “akota pupu” wala angbanga so lo yeke fâ na ndö ti azo so ake na mbana ti sara ye alingbi na acommandement ti lo (aProv. 10:25; Jér. 30:23). Na yâ ti aye ni oko na oko, lo gboto mê ti ala angoi mingi kozo nga lo fa na ala ye so ala doit ti sara ti mä yanga ti lo (2 aGbia 17:12-15; Néh. 9:29, 30). Ti mû maboko na azo so aye ti mä yanga ti lo, fani mingi lo yeke sara kua na awakua ti lo so ayeke na sese so ayeke be-ta-zo ti fa tënë ti ngbanga ti lo nga ti tene na ala so a lingbi ala sara ye hio.—Amos 3:7.

Noé afa lani so lo yeke mbeni wakua ti Nzapa ni so ayeke be-ta-zo. Teti angu mingi, lo sara mbeto ape ti gboto mê ti azo ti ngoi ti lo, asioni zo nga azo so asara ye ti ngangu na azo na ndö ti kota ngu so ayeke pika ande na ndö ti sese kue (Gen. 6:9-13, 17). Lo fa nga lani na ala ye so ala doit ti sara ti sö kuâ na kota ngu ni. Noé afa lani tënë mingi, ni la a iri lo “wafango tënë ti ye so ayeke mbilimbili”.—2 Pi. 2:5.

Atâa a-effort so Noé asara, azo so ayeke na fini kozo na kota ngu ni asara lani sanka ti tënë so alondo na Nzapa. Ala fa lani so ala yeke na mabe oko ape. Ye ti peko ni ayeke so ala kui na ngoi so kota ngu apika na “ahon na ala kue.” (Mat. 24:39; aHéb. 11:7). Na ngoi so ala yeke nduru lani ti wara kuâ, ala lingbi ti tene ape so Jéhovah agboto mê ti ala ape.

Na ambeni ngoi nde, Jéhovah agboto mê ti azo ngoi mingi ape kozo ti tene “kota pupu” ti ngbanga ti lo akomanse. Atâa so kue, lo yeke sara kue ti tene azo so ngbanga ni ayeke tï na ndö ti ala awara ngoi ti changé. Na tapande, lo gboto lani mê ti azo kozo na aye ti ngangu bale-oko so lo ga na ni na ndö ti azo ti Égypte giriri. Na tapande, Jéhovah atokua lani Moïse na Aaron ti gboto mê ti Pharaon na azo ti kua ti lo na ndö ti mbasambala ye ti ngangu ni so ayeke akota glason so abuba aye mingi. So akota glason ni ayeke tï na ndade ni so, eskê Nzapa azia lani ngoi so alingbi ti tene azo ni agi mbeni ndo ti bata terê ti ala dä? Bible atene: “Na popo ti azo ti kua ti Pharaon, ala so asara mbeto ti tënë ti Jéhovah so, ala mû azo ti kua ti ala nga na anyama ti ala hio na yâ ti da, me ala so abi bê ti ala pëpe na tënë ti Jéhovah so, ala zia azo ti kua ti ala nga na anyama ti ala angbâ na yâ ti ngonda.” (Ex. 9:18-21). A yeke polele so Jéhovah amû na azo ngoi so alingbi tongaso si ala so asara ye hio, asioni ye ti ngangu ni asi na ala ape.

A gboto nga lani mê ti Pharaon na azo ti kua ti lo kozo na ye ti ngangu bale-oko ni. Ye oko, ala sara lani ye ti buba ala mä gbotongo mê ni ape (Ex. 4:22, 23). Ye ti peko ni ayeke so akozo molenge ti ala ti koli akui lani. So ye ti mawa! (Ex. 11:4-10; 12:29). Eskê ala yeke lani na ngoi ti sara ye alingbi na gbotongo mê ni kozo si ye ni asi? En. Moïse agboto lani mê ti azo ti Israël hio na ndö ti ye ti ngangu bale-oko ni nga lo fa na ala ye so ala lingbi ti sara ti bata asewa ti ala (Ex. 12:21-28). Azo oke la asara ye lani alingbi na gbotongo mê ni? Ambeni zo atene so azo kutu ota, so na popo ni a yeke wara azo ti Israël nga na “gbâ ti azo nde nde” so ayeke azo ti Israël ape nga na azo ti Égypte awara lani pëpe ngbanga ti Nzapa nga ala quitté Égypte.—Ex. 12:38; kete tënë na gbe ni.

Tongana ti so atapande so afa, lakue Jéhovah ayeke sara kue ti tene azo awara ngoi so alingbi ti sara ye alingbi na agbotongo mê so lo gboto mê ti ala (Deut. 32:4). Nyen la apusu Jéhovah ti sara tongaso? Bazengele Pierre afa ndani lo tene so Jéhovah ‘aye si a futi zo oko pëpe, me lo ye si azo kue achangé bê ti ala.’ (2 Pi. 3:9). Biani, Nzapa ayeke pensé na azo. Lo ye ti tene ala changé bê ti ala nga ala sara ye alingbi na awango ti lo kozo si ngbanga ti lo asi.—És. 48:17, 18; aRom. 2:4.

SARA YE ALINGBI NA AGBOTONGO MÊ SO NZAPA AGBOTO LASO

Laso nga kue, azo kue adoit ti sara ye alingbi na kpengba gbotongo mê ti azo so a yeke gboto na ndö ti sese kue laso. Na ngoi so Jésus ayeke lani na sese, lo gboto lani mê ti azo so a yeke futi ande biani aye ti ngoi so na ngoi ti “kota ye ti vundu”. (Mat. 24:21). Na ndö ti fango ngbanga so ayeke ga ande so, lo fa mbeni prophétie so na yâ ni lo fa polele ye so adisciple ti lo ayeke bâ nga na aye so ayeke si na ala tongana ngoi ni so apusu nduru. Jésus afa nga akota ye so ayeke si na yâ ti dunia kue so e yeke bâ laso.—Mat. 24:3-12; Luc 21:10-13.

Ti gue oko na prophétie so, laso Jéhovah ayeke wa azo kue ti woko terê ti ala na gbe ti komandema ti lo so lo yeke sara na ndoye. Lo ye ti tene azo so amä yanga ti lo avivre nzoni mingi laso nga ala wara aye ti nzoni na yâ ti fini dunia ti lo so mbilimbili ayeke duti ande dä (2 Pi. 3:13). Ti wa azo ti duti na mabe na azendo so, Jéhovah aleke ti tene a fa na ala tënë so ayeke sö fini ti azo, so ayeke “nzoni tënë ti Royaume”, so Jésus atene lani so a yeke fa ni na “ndö ti sese kue so azo ayeke dä tongana mbeni tënë ti témoin ndali ti amara kue.” (Mat. 24:14). Nzapa aleke yâ ti bungbi ti atâ wakua ti lo ti fa “tënë ti témoin” so, wala ti fa tënë ti Nzapa, na yâ ti akodro 240 tongaso. Jéhovah aye ti tene azo mingi amä gbotongo mê ti ala so lo gboto nga ti kpe “kota pupu” ti ngbanga ti lo so ayeke mbilimbili so ayeke ga.—Soph. 1:14, 15; 2:2, 3.

Tongaso, kota hunda ni ayeke pëpe ti hinga wala Jéhovah ayeke zia na azo ngoi so alingbi ti tene ala sara ye alingbi na agbotongo mê ti ala so lo gboto. Aye so asi afa so lo sara lakue tongaso. Me kpengba hunda so angbâ ayeke so: Azo ayeke sara ande ye alingbi na gbotongo mê ti ala so Nzapa agboto na ngoi so ngoi angbâ? Zia si e awatokua ti Nzapa e ngbâ ti mû maboko na azo mingi ti sö kuâ na ngoi so a yeke futi aye ti ngoi so.