၁ ရှမွေလ
၄ ရှမွေလက အစ္စရေးတွေကို ဘုရားရဲ့ စကားတော်တွေ ပြန်ပြောပြတယ်။
အစ္စရေးတွေဟာ ဖိလိတိလူတွေနဲ့ စစ်တိုက်ဖို့ ချီတက်သွားပြီး ဧဗနေဇာအရပ်နားမှာ စခန်းချတယ်။ ဖိလိတိလူတွေကတော့ အာဖက်မြို့မှာ စခန်းချတယ်။ ၂ ဖိလိတိလူတွေက အစ္စရေးတွေကို စစ်ခင်းပြီး တိုက်ခိုက်တယ်။ တိုက်ပွဲ ပြင်းထန်လွန်းတော့ အစ္စရေးတွေ အရေးနိမ့်ပြီး စစ်မြေပြင်မှာ ၄,၀၀၀ လောက် ကျဆုံးသွားတယ်။ ၃ စစ်သည်တွေ စခန်းထဲပြန်လာတဲ့အခါ အစ္စရေးအကြီးအကဲတွေက “ယေဟောဝါဘုရားက ဖိလိတိလူတွေရှေ့မှာ ငါတို့ကို ဘာလို့ ရှုံးနိမ့်စေတာလဲ။+ ယေဟောဝါရဲ့ ပဋိညာဉ်သေတ္တာကို ရှိလောမြို့ကနေ ဒီကို သယ်လာရအောင်။+ သေတ္တာတော်သာ ငါတို့နဲ့အတူ ရှိရင် ရန်သူတွေလက်ကနေ ကယ်တင်ပေးလိမ့်မယ်” ဆိုပြီး ပြောကြတယ်။ ၄ ဒါနဲ့ ရှိလောမြို့ကို လူလွှတ်ပြီး ခေရုဗိမ်တွေပေါ်* စံမြန်းတဲ့+ ဗိုလ်ခြေတို့ရဲ့အရှင် ယေဟောဝါရဲ့ ပဋိညာဉ်သေတ္တာကို သယ်လာခိုင်းတယ်။ ဧလိရဲ့သားနှစ်ယောက် ဟောဖနိနဲ့ ဖိနဟတ်လည်း+ စစ်မှန်တဲ့ဘုရားသခင်ရဲ့ ပဋိညာဉ်သေတ္တာနဲ့အတူ လိုက်ပါလာတယ်။
၅ တပ်စခန်းထဲ ယေဟောဝါရဲ့ ပဋိညာဉ်သေတ္တာ ရောက်လာတာနဲ့ အစ္စရေးတွေ အော်ဟစ်ကြွေးကြော်လိုက်တာ မြေကြီးတောင် တုန်ခါသွားတယ်။ ၆ ဒါကို ဖိလိတိလူတွေ ကြားတဲ့အခါ “ဟီဘရူးတွေရဲ့ တပ်စခန်းမှာ ဘာဖြစ်လို့ ဒီလောက်တောင် ကြွေးကြော်နေတာလဲ” ဆိုပြီး ပြောကြတယ်။ နောက်ဆုံးတော့ အစ္စရေးတွေရဲ့ တပ်စခန်းထဲ ယေဟောဝါရဲ့ သေတ္တာတော် ရောက်နေမှန်း သိသွားတယ်။ ၇ ဒါနဲ့ ဖိလိတိလူတွေ ကြောက်စိတ်ဝင်လာတယ်။ “သူတို့တပ်စခန်းထဲ ဘုရားသခင် ရောက်နေပြီ။+ ဒုက္ခပဲ။ တစ်ခါမှ ဒီလိုမျိုး မဖြစ်ဖူးဘူး။ ၈ ငါတို့တော့ ဒုက္ခရောက်ပါပြီ။ မြင့်မြတ်လှတဲ့ အဲဒီဘုရားရဲ့လက်ကနေ ငါတို့ကို ဘယ်သူကယ်တင်မလဲ။ တောကန္တာရမှာ အီဂျစ်တွေကို နည်းအမျိုးမျိုးနဲ့ ဒဏ်ခတ်ခဲ့တာ အဲဒီဘုရားပဲ။+ ၉ ဒါကြောင့် ဖိလိတိလူတို့၊ ယောက်ျားပီပီ သတ္တိရှိကြ။ ငါတို့ဆီမှာ ဟီဘရူးတွေ ကျွန်ခံခဲ့သလို သူတို့ဆီမှာ ပြန်ပြီးကျွန်မခံရအောင်+ ယောက်ျားပီပီ သတ္တိရှိရှိ တိုက်ခိုက်ကြ” လို့ အချင်းချင်း အားပေးတယ်။ ၁၀ တိုက်ပွဲမှာ အစ္စရေးတွေ ရှုံးနိမ့်ပြီး+ ကိုယ့်တဲဆီ ထွက်ပြေးကုန်တယ်။ အစ္စရေးခြေလျင်တပ်သား ၃၀,၀၀၀ အတုံးအရုံး ကျဆုံးသွားတယ်။ ၁၁ သေတ္တာတော်ဟာ ရန်သူလက်ထဲ ပါသွားတယ်။ ဧလိရဲ့သားနှစ်ယောက် ဟောဖနိနဲ့ ဖိနဟတ်လည်း တိုက်ပွဲကျသွားတယ်။+
၁၂ ဗင်ယာမိန်အမျိုးသားတစ်ယောက် စစ်မြေပြင်ကနေ ပြေးလာပြီး အဲဒီနေ့မှာပဲ ရှိလောမြို့ကို ရောက်လာတယ်။ ခေါင်းပေါ် မြေမှုန့်တွေတင်ပြီး အဝတ်တွေကိုလည်း ဆွဲဆုတ်ထားတယ်။+ ၁၃ အဲဒီအချိန်မှာ ဧလိဟာ သေတ္တာတော်အတွက် စိတ်ပူလို့ လမ်းဘေးနားကခုံမှာ ထိုင်စောင့်နေတယ်။+ အဲဒီလူက မြို့ထဲရောက်လာပြီး စစ်ရှုံးတဲ့သတင်းကို ပြောလိုက်တဲ့အခါ တစ်မြို့လုံး ပွက်လောရိုက် သွားတယ်။ ၁၄ အဲဒီအသံကို ဧလိကြားတော့ “ဒီလောက်ဆူညံနေတာ ဘာသံတွေပါလိမ့်” လို့မေးတယ်။ အဲဒီလူလည်း ဧလိဆီ ပြေးလာပြီး အကျိုးအကြောင်း ပြောပြတယ်။ ၁၅ (ဧလိက အသက် ၉၈ နှစ် ရှိနေပြီ။ ရှေ့ကို စိုက်ကြည့်နေပေမဲ့ မျက်စိမမြင်တော့ဘူး။)+ ၁၆ အဲဒီလူက “ကျွန်တော်ဟာ စစ်မြေပြင်ကနေ ဒီနေ့ပဲ ထွက်ပြေးလာခဲ့တာ” လို့ပြောတော့ ဧလိက “ငါ့သား၊ အခြေအနေ ဘယ်လိုလဲ” လို့ မေးတယ်။ ၁၇ အဲဒီလူက “အစ္စရေးတွေဟာ ဖိလိတိလူတွေရှေ့မှာ အကြီးအကျယ် ရှုံးနိမ့်ပြီး ထွက်ပြေးရတယ်။+ သခင့်သားနှစ်ယောက် ဟောဖနိနဲ့ ဖိနဟတ်လည်း တိုက်ပွဲကျသွားပါပြီ။+ သေတ္တာတော်လည်း ရန်သူ့လက်ထဲ ပါသွားပြီ”+ လို့ပြောပြတယ်။
၁၈ အိုမင်းပြီး ဝဖိုင့်လေးလံနေတဲ့ ဧလိဟာ သေတ္တာတော်အကြောင်းလည်း ကြားရော တံခါးနားမှာရှိတဲ့ ခုံပေါ်ကနေ နောက်ပြန်လန်ကျပြီး ဇက်ကျိုးသေသွားတယ်။ သူက အစ္စရေးတွေကို အနှစ် ၄၀ စီရင်အုပ်ချုပ်ခဲ့တယ်။ ၁၉ သူ့ချွေးမ၊ ဖိနဟတ်ရဲ့ဇနီးဟာ ကိုယ်ဝန်နေ့စေ့လစေ့ ဖြစ်နေတယ်။ သေတ္တာတော် သိမ်းသွားခံရတဲ့သတင်း၊ ယောက္ခမရော ခင်ပွန်းပါ သေဆုံးတဲ့သတင်းကို သူကြားတဲ့အခါ ရုတ်တရက် သားဖွားဝေဒနာ ခံစားရပြီး ကလေးမွေးတော့တယ်။ ၂၀ သူအသက်ထွက်ခါနီးမှာ ဘေးမှာရှိတဲ့ အမျိုးသမီးတွေက “မစိုးရိမ်နဲ့။ သားလေးမွေးပြီ” လို့ပြောတယ်။ သူကတော့ ဘာမှပြန်မပြောဘူး။ အရေးလည်း မစိုက်ဘူး။ ၂၁ ဒါပေမဲ့ သေတ္တာတော် သိမ်းသွားခံရပြီး ယောက္ခမရော ခင်ပွန်းပါ သေဆုံးသွားတဲ့အတွက်+ “အစ္စရေးတို့ရဲ့ ဘုန်းအသရေဟာ တိုင်းတစ်ပါးကို ပါသွားပြီ”+ ဆိုပြီး ကလေးကို အိခဗုတ်*+ လို့ နာမည်ပေးတယ်။ ၂၂ “သေတ္တာတော် အသိမ်းခံရပြီဆိုတော့ အစ္စရေးတို့ရဲ့ ဘုန်းအသရေဟာ တိုင်းတစ်ပါးကို ပါသွားပြီ”+ လို့ သူပြောတယ်။