8 “Faitaaga”—O Feusuaʻiga Lē Mamā Uma Lava

E tele mea e aofia ai i le upu Eleni o le por·neiʹa. Ua taʻua e W. Bauer, itu. 693, o le upu por·neiʹa o lona uiga o “amioga faatalitane, o amioga lē mamā, o le faitaaga, o feusuaʻiga lē mamā uma lava.”

Ua faapea mai le lomifefiloi, Theological Dictionary of the New Testament, Tusi VI, itu. 592, e tusa ai ma fetalaiga a Iesu i le Mataio 5:32 ma le 19:9, o le “πορνεία [por·neiʹa] e faasino atu i feusuaʻiga e faia e se tagata faaipoipo ma sē e lē o lona toʻalua.” O lea la, e faaaogā e le Tusi Paia le upu por·neiʹa e faasino atu foʻi i tagata faaipoipo. O loo taʻua i le itulau e 594 o le lomifefiloi lava lenā, e tusa ai ma le Efeso 5:3, 5 e faapea, na “iloa [e Paulo] e lē o tagata uma e iai le meaalofa o le taofiofi i ona tuʻinanauga, 1 K. 7:7. Ina ia puipuia le alii [nofofua] mai le faitaaga, aemaise pe a lē mafai ona ia taofiofia ona [tuʻinanauga], e ao ona ia mulimuli i le mea ua finagalo i ai le Atua, ia faaipoipo lelei, 1 K. 7:2.” E faaaogā foʻi e le Tusi Paia le upu por·neiʹa e faasino atu i tagata e leʻi faaipoipo, o ē o loo faia feusuaʻiga lē mamā ma amioga matagā.​—Tagaʻi i le 1 Korinito 6:9.

Ua faapea mai B. F. Westcott, o le tasi o faatonu (e toʻalua faatonu) na faia le tusitusiga Eleni e taʻua o le Westcott ma Hort, i lana tusi Saint Paul’s Epistle to the Ephesians na faia i Lonetona ma Niu Ioka, i le 1906, itu. 76, e faatatau i vala eseese o le por·neiʹa i le Tusi Paia a o tusi e faatatau i le Efeso 5:3 e faapea: “O le upu lenei e faamatala ai feusuaʻiga lē mamā uma lava, (I) o le mulilua: Ho. ii. 2, 4 (LXX.); Mat. v. 32; xix. 9; (2) o faaipoipoga lē mamā, I Ko. v. I; (3) o le faitaaga e pei ona masani ai [Efeso 5:3].” O le faitaaga e pei ona “masani ai,” e faasino atu i le uiga o loo taatele i aso nei, lea e patino lava i tagata e leʻi faaipoipo.

E lē na o feusuaʻiga lē mamā e faasino i ai le por·neiʹa, ae e iai foʻi lona uiga faafaatusa i nisi o mau o Tusitusiga Eleni. E tusa ai ma le uiga faafaatusa o le por·neiʹa, ua taʻua i le tusi a F. Zorell, vaega 1106, i lalo o le ulutala por·neiʹa: “o le fulitua lea i le tapuaʻiga moni, pe e fulitua i mea iti po o le fulitua atoa, o le teena lea o le Atua moni e toʻatasi o Ieova ae tapuaʻi atu i atua ese [4Tu 9:22; Ie 3:2, 9; Ho 6:10 ma isi mau; auā o le faatasiga a le Atua ma ona tagata, na peiseaʻī o se faaipoipoga faaleagaga]: Fal 14:8; 17:2, 4; 18:3; 19:2.” (O ia e ana puipui ma upu faasisipa; e tutusa le 4Tu i le Septuagint ma le 2 Tupu i tusitusiga a le ʻau Masoreta.)

O loo taʻua le upu por·neiʹa i mau nei e 25 i tusitusiga Eleni: Mataio 5:32; 15:19; 19:9; Mareko 7:21; Ioane 8:41; Galuega 15:20, 29; 21:25; 1 Korinito 5:1, 1; 6:13, 18; 7:2; 2 Korinito 12:21; Kalatia 5:19; Efeso 5:3; Kolose 3:5; 1 Tesalonia 4:3; Faaaliga 2:21; 9:21; 14:8; 17:2, 4; 18:3; 19:2.

I le Faaliliuga a le Lalolagi Fou, ua faaliliuina le veape por·neuʹo i le ‘faaauau ona faitaaga,’ po o le ‘faia o le faitaaga,’ e pei ona taʻua i mau nei e valu: 1 Korinito 6:18; 10:8, 8; Faaaliga 2:14, 20; 17:2; 18:3, 9.

E faatasi lava ona taʻua i le Faaliliuga a le Lalolagi Fou le veape ek·por·neuʹo, lea ua faaliliuina i “le soona faitaaga” i le Iuta 7.

I le Faaliliuga a le Lalolagi Fou, ua faaliliuina ai le nauna porʹne i le “fafine talitane,” e pei ona taʻua i mau nei e 12: Mataio 21:31, 32; Luka 15:30; 1 Korinito 6:15, 16; Eperu 11:31; Iakopo 2:25; Faaaliga 17:1, 5, 15, 16; 19:2.

I le Faaliliuga a le Lalolagi Fou, ua faaliliuina ai le isi nauna porʹnos i le “tagata faitaaga” po o “ē e faitaaga,” e pei ona taʻua i mau nei e sefulu: 1 Korinito 5:9, 10, 11; 6:9; Efeso 5:5; 1 Timoteo 1:10; Eperu 12:16; 13:4; Faaaliga 21:8; 22:15. Ua faamatalaina e le lomifefiloi e taʻua o le LSJ, itu. 1450, lenei upu e faapea, “o se tama talavou ua faapitoa mo feusuaʻiga matagā, o le tane e feusuaʻi ma le isi tane, o le tagata faitaaga, o le tagata ifo i tupua.”