Ecisomerine Cajiragwa oku Nyanja Ndukula

Erhi Faraoni ayumva oku Abaisraheli bagenzire kurhenga e Misri, ashub’ishanja entanya zage lugenda oku ababwiraga bagende. Arhegeka abasoda bage ntya: ‘Murheganye emituga yani y’ivita, rhunabashimbulire! Rhumanye rhwankabaleka bagende.’ Ye n’abantu bage barhondera okubalibirhako.

Yehova akag’ilongoza abantu bage omu kukolesa ecitu amango g’omushi, n’omuliro amango g’obudufu. Yehova abalongoza ebwa Nyanja Ndukula anababwira bagwike akambi.

Enyuma z’aho, Abaisraheli babona Faraoni n’abasoda bage bali babalibirhako. Babona Enyanja Ndukula eri embere zabo, n’abasoda Bamisri babali enyuma. Balakira Musa ntya: ‘Rhukola rhwafâ! Byal’ihûnyire orhuleke e Misri.’ Cikone Musa ababwira ntya: ‘Murhayobohaga. Muleke mubone gurhi Yehova arhuyokola.’ Kobinali Musa al’ilangalire Yehova.

Yehova abwira Abaisraheli bashabe ako kambi, banacirheganye lyo bagenda. Muli obo budufu, Yehova ahamisa ecitu, anacihira egarhi k’Abamisri n’Abaisraheli. Omwizimya gwali emunda Abamisri bali, cikone Abaisraheli bohe bakag’ibona obumuleke.

Yehova abwira Musa alambulire okuboko kwage oku Nyanja Ndukula. Buzinda Yehova ajira empusi nnene yagera obudufu boshi. Enyanja yagabikanamwo kabirhi, n’enjira yapatikana omu kagarhi k’enyanja. Emiliyoni y’Abaisraheli yalambagira oku budaka bukazire, omu kagarhi ka bibambazi bibirhi by’amishi.

Abasoda ba Faraoni bakulikira Abaisraheli k’obola budaka bukazire bwali omu nyanja. Buzinda, Yehova ahira akavulindi egarhi k’abasoda b’Abamisiri. Amapine garhondera garhenga oku mituga yabo. Abo basoda bayama ntya: ‘Rhuleke aba Baisraheli! Yehova ali abalwira.’

Yehova abwira Musa ntya: ‘Lambulira okuboko kwawe oku nyanja.’ Ho n’aho, bilya bibambazi by’amishi byabwikira balya basoda Bamisri. Faraoni n’abantu bage boshi bafâ. Ntaye wayokosire ciru n’omuguma.

Ecigusho cinene c’Abaisraheli bali olundi lunda lw’enyanja, bakuza Mungu omu kumuyimbira ntya: “Nacitakira Nyakasane [Yehova, NWT] bulya ayerekine irenge lyage. Alòha ebiterusi n’abashona oku biterusi omu nyanja.” Erhi abantu bali bayimba, abakazi bakag’isama n’okushurha engoma. Abantu boshi bal’ishagalusire bwenene bulya bal’ikola barhenzibwe loshi omu buja.