ISOMO LYA 23

Abaisraheli Bajira Eciragane Embere za Yehova

Hofi myezi ibirhi enyuma z’Abaisraheli okurhenga e Misri, bahika oku Ntondo Sinayi banagwikako akambi. Yehova ahamagala Musa oku ntondo, anamubwira ntya: ‘Nayokwire Abaisraheli. Erhi bakantumikira bakanakenga amarhegeko gani, banaba bantu bani bago-bago.’ Musa agaluka anabwira Abaisraheli ebi Yehova amubwiraga. Gurhi bajijire? Bashuza ntya: ‘Rhwajira ngasi kantu Yehova arhuhûnyire rhujire.’

Musa ashub’igaluka oku ntondo. Erhi ali eyo munda, Yehova amubwira ntya: ‘Enyuma za nsiku isharhu, namuganiza. Obwire abantu bamanye bakasokera oku Ntondo Sinayi.’ Musa ayandagala anabwira Abaisraheli bacirheganye lyo bayumva oku Yehova abaganiza.

Abaisraheli bali babona emilazo n’omwizimya munene guli oku Ntondo Sinayi

Enyuma za nsiku isharhu, Abaisraheli babona emilazo na mwizimya munji oku ntondo. Na kandi bayumva mikungulo minji n’izu ly’emishekera. Enyuma z’aho, Yehova ayandagala oku ntondo omu muliro. Abaisraheli bayoboha bwenene banarhondera bajuguma. Entondo yoshi yadundagana yanayunjulako mugi munji. Izu ly’emishekera lyagendekera lyayushuka. Enyuma z’aho, Mungu aderha ntya: ‘Nie Yehova. Murhashinganini mukaharamya orhundi rhumungu rhoshi-rhoshi.’

Musa ashub’igaluka oku ntondo, na Yehova amuha amarhegeko lugenda olugenzi abantu bashinganine babe nalo, na lugenda oku bashinganine bakamuharamya. Musa ayandika ago marhegeko n’enyuma z’aho agasomera Abaisraheli. Balaganya ntya: ‘Rhwajira ngasi kantu Yehova arhuhûnyire rhujire.’ Eco cali ciragane bajiraga embere za Mungu. Cikone, ka bakacihikirizize?

“Okâzigira Nyakasane Nyamuzinda wawe n’omurhima gwawe gwoshi, n’omûka gwawe gwoshi, n’obukengere bwawe bwoshi.”—Mateyo 22:37