Punda wa Balamu Amaderha

Abaisraheli bali bamajira hofi myaka 40 omu irungu. Bahimire n’okurhola vile nyinji nzibu-zibu. Erhi bali omu kambi omu kabanda k’e Mowabu ebushoshokero bw’izuba bw’Olwishi Yordani, akasanzi kahika k’okuja omu Cihugo c’Amalaganyo. Balaki, mwami w’e Mowabu, ayoboha bwenene oku akola aheza ecihugo cage enyanya z’Abaisraheli. Ntyo alalika mulume muguma wakag’ihamagalwa Balamu aje e Mowabu ly’aheherera Abaisraheli.

Cikone Yehova abwira Balamu ntya: ‘Omanye wankaheherera Abaisraheli.’ Muli oko Balamu alahira okuja e Mowabu. Mwami Balaki amulalika obwa kabirhi anamulaganya oku amuha ngasi kantu alonzize. Cikone, Balamu acib’ilahira. Enyuma z’aho Mungu amubwira ntya: ‘Oje eyo munda, cikone ebi nakakubwira byone oderhage.’

Balamu ashonako punda wage anayerekera e Mowabu. Apanga okuheherera Abaisraheli, ciru akaba Yehova amuhanzagya oku amanye akabaheherera. Erhi ali omu njira, malahika wa Yehova amubonekera kasharhu. Balamu arhakag’ibona oyo malahika, cikone punda wa Balamu yehe akag’ibona oyo malahika. Oburhangiriza, punda wa Balamu arhenga omu njira anayakira omw’ishwa. Obwa kabirhi oyo punda acinaniza oku lukuta lw’amabuye, anananizako okugulu kwa Balamu. Buzinda, oyo punda agwishira omu kagarhi k’enjira. Mw’ezo hali isharhu zoshi, Balamu akag’ishurha oyo punda.

Erhi Balamu ayus’ishurha oyo punda obwa kasharhu, Yehova ajira oyo punda aganîre. Oyo punda adosa Balamu ntya: ‘Bulya gurhi ogendekire wanshurha?’ Balamu aderha ntya: ‘Wambonesize nshonyi. Nka nagwerhe engorho nalinakuniga.’ Oyo punda aderha ntya: ‘Wamayusa myaka minji oli wanshonako. Ka nkola nkujirire akantu kali nk’aka najijire?’

Buzinda Yehova aleka Balamu abone malahika. Malahika aderha ntya: ‘Yehova anakuhanzize omanye wankaheherera Abaisraheli.’ Balamu aderha ntya: ‘Najijire kubi. Nagaluka ekâ.’ Cikone malahika amubwira ntya: ‘Oje e Mowabu, cikone ebi Yehova akakubwira byone oderhage.’

Ka hali kantu kalebe Balamu aciyigirizize? Nanga. Enyuma z’aho, Balamu alonza okuheherera Abaisraheli kasharhu, cikone mw’ako kasharhu koshi Yehova akamujira abagishe ahali h’okubaheherera. Buzinda, Abaisraheli barhera olugo lw’e Mowabu, na Balamu anigwa. Ago mazibu goshi garhakahikire Balamu aciyumvirhizagya Yehova embere.