Enkuta z’e Yeruzalemu

Rhuganirire ebyabaga omu myaka milebe yageraga. Nehemiya, mukozi muguma wa Mwami Artashasta, ali Muisraheli muguma wal’ilamire omu vile y’Abapersi yakag’ihamagalwa Suza. Mwene wabo Nehemiya arhenga e Yudeya erhi anadwirhe omwanzi mubi gudesire ntya: ‘Abantu bagalukaga e Yeruzalemu barhali omu bulanzi. Enkuta z’evile n’emihango yayo Abababiloni bashabaga birhasag’iyubakwa buhyahya.’ Nehemiya agaya bwenene. Alonza okuja e Yeruzalemu ly’aj’irhabala, na muli oko ashenga Yehova lyo mwami amuleka agende.

Buzinda, mwami abona oku Nehemiya al’igayire. Mwami aderha ntya: ‘Ntasag’ibona oyosire ntya. Mazibu gahi ogwerhe?’ Nehemiya aderha ntya: ‘Ka nanabula bugaya n’obu evile y’emwirhu e Yeruzalemu, yabêzire biguka?’ Mwami adosa ntya: ‘Bici olonzize nkujirirage?’ Ho n’aho, Nehemiya ashenga buzira kukûla izu. Buzinda aderha ntya: ‘Wekasinga, ondeke ngaluke e Yeruzalemu lyo nyubaka buhyahya ezo nkuta.’ Mwami Artashasta abwira Nehemiya oku agende, anajira emipango lyo Nehemiya aba omu bulanzi mw’ogo mubalamo mulî. Kandi ajira Nehemiya abe guvernere w’e Yudeya anamuha emirhi y’okuyubakamwo emihango y’evile.

Erhi Nehemiya ahika e Yeruzalemu, alabiriza enkuta z’eyo vile. Enyuma z’aho ahamagala bakuhani n’abarhambo anababwira ntya: ‘Enkuta zaharabisire bwenene. Rhushinganine rhurhondere omukolo.’ Abantu bayemera, banarhondera okuyubaka buhyahya ezo nkuta.

Cikone bashombanyi baguma na baguma b’Abaisraheli bakabashekera, n’okuderha ntya: ‘Nyambwe anakulumbya ebibambazi muli mwayubaka.’ Abakag’iyubaka barhasegezagya obwenge kw’ezo nderho banagendekera bayubaka. Olukuta lwagendekera lwaliha n’okuzibuha bwenene.

Abashombanyi bahiga okurhenga ngasi lunda lyo barhera Yeruzalemu buzira kulaliza. Erhi Abayahudi bayumva lugenda ogo muhigo, bayoboha bwenene. Cikone Nehemiya ababwira ntya: ‘Murhayobohaga. Yehova ali haguma na nirhu.’ Ahiraho abantu b’okulanga abubasi, n’abashombanyi barhacihashaga okurhera evile.

Bayusa okuyubaka enkuta n’emihango omu nsiku 52 zone. Nehemiya ahamagala Bene-Levi boshi e Yeruzalemu lyo baha Yehova ezo nkuta. Abapanga omu bigusho bibirhi by’abimbiza. Basoka enkuta omu kugera omu Muhango gw’ebw’Iriba na buzinda ngasi bantu baja olwabo lunda omu vile. Bakag’ibuha emishekera, okushurha engoma, okuziha ennanga n’okuyimbira Yehova. Ezra agenda na cigusho ciguma, na Nehemiya agenda n’ecindi, kuhika barhimanana aha bwa hekalu. Abantu boshi, abalume, abakazi, n’abana, baha Yehova enterekêro banajira idinye. Amazu gabo g’omwishingo gakag’iyumvikana kuhika kulî bwenene.