Elizabeti Amaburha Omwana

Myaka 400 na kulusha enyuma z’okuyubakwa buhyahya kw’enkuta z’e Yeruzalemu, kuhani muguma wakag’ihamagalwa Zakariya na mukage, Elizabeti, bal’ilamire hofi n’eyo vile. Bali bamajira myaka minji bali omu buhya cikone barhagwerhe mwana. Lusiku luguma erhi Zakariya ali ayoca obuku oku mazabahu omu hekalu, malahika Gabriyeli amubonekera. Zakariya ayoboha, cikone Gabriyeli amubwira ntya: ‘Omanye wankayoboha. Nkudwirhire omwanzi mwinja kurhenga emwa Yehova. Mukawe Elizabeti, aburha omwana-rhabana, mwayish’imuha izino lya Yowane. Yehova acishozire Yowane ly’ajira omukolo gwago-gwago.’ Zakariya adosa ntya: ‘Gurhi nakayemeramwo oku ebyo byahikirira? Nie na mukanie rhukola bashosi, rhurhakanaciburha omwana.’ Gabriyeli aderha ntya: ‘Mungu ye wantumaga lyo nkuha ogu mwanzi mwinja. Cikone bulya orhayemire ebi naderhaga, wabêra kaduma kuhika amango oyo mwana-rhabana anaburhwe.’

Zakariya alegama omu hekalu bwenene kulusha oku byakag’iba embere. Ntyo erhi ahuluka, abantu bakag’imulingira embuga banal’ilonzize bamanye gurhi byamubêrire. Zakariya arhacikag’iderha. Akag’ijira kone ebimanyiso n’amaboko gage. Muli oko abantu bahugûkwa oku Zakariya anahâbirwe omwanzi kurhenga emwa Mungu.

Enyuma za kasanzi kalebe, Elizabeti aba izimi anaburha omwana-rhabana, nk’oku malahika anaderhaga. Abîra bage n’abantu b’omu mulala bakayish’ilola kw’oyo mwana. Bashagaluka bwenene enyanya z’oko. Elizabeti aderha ntya: ‘Oyu mwana akahamagalwa Yowane.’ Baderha ntya: ‘Nta muntu w’omu mulala gwawe ohamagalwa Yowane. Omuhe izino ly’ishe, Zakariya.’ Cikone Zakariya ayandika nderho ndebe. Ayandika ntya: ‘Izino ly’oyu mwana ye Yowane.’ Ho n’aho, Zakariya ashub’iba n’obuhashe bw’okuderha! Emyanzi lugenda oyo mwana yalandira omu Yudeya mwoshi, n’abantu bakacidosa ntya: ‘Gurhi byayish’ibera oyu mwana hano akula?’

Enyuma z’aho iroho litagatifu lyahashisa Zakariya okuleba ntya: ‘Yehova ahabwe obukuze. Alaganyize Abrahamu oku akarhumire omucunguzi, Masiya, ly’arhuyokola. Yowane ayish’iba mulebi, anayish’irheganyiza Masiya enjira.’

Akantu kago-kago kahikira omuntu w’omu mulala gwabo Elizabeti wakag’ihamagalwa Mariya. Rhwaganira binji lugenda ako kantu omw’isomo likulikire.