Shetani Amahira Yezu omu Marhangulo

Erhi Yezu ayus’ibatizibwa, iroho litagatifu lyamulongoza aje omw’irungu. Ayusa nsiku 40, buzira kulya kantu kalebe, anashalika bwenene. Enyuma z’aho Ibilisi ayisha emunda Yezu ali ly’amurhangula, anamubwira ntya: ‘Akaba kobinali oli Mugala wa Mungu, obwire aga mabuye gahinduke migati.’ Cikone Yezu ashuza omu kukolesa Amandiko. Aderha ntya: ‘Biyandisirwe oku arhali biryo byone omuntu alagirireko ly’alama. Omuntu ashinganine akayumvirhiza ngasi kanwa Yehova adesire.’

Enyuma z’aho, Shetani ashub’irhangula Yezu. Aderha ntya: ‘Akaba kobinali oli Mugala wa Mungu, ohame kurhenga oku bwisongerwe bw’ehekalu. Bulya biyandisirwe oku Mungu arhuma bamalahika bage lyo bakugwarha orhag’irhogera okw’idaho.’ Cikone Yezu ashub’ishuza omu kukolesa Amandiko. Aderha ntya: ‘Biyandisirwe oku orhashinganini ohire Yehova omw’irhangulo.’

Enyuma z’aho, Shetani ayeresa Yezu amami goshi g’igulu, obuhirhi bwago, n’irenge lyago, anaderha ntya: ‘Nakuha aga mami goshi n’irenge lyago erhi wakamparamya liguma lyone.’ Cikone Yezu ashuza ntya: ‘Rhenga aha, Shetani! Biyandisirwe oku omuntu ashinganine akaharamya Yehova yenene.’

Enyuma z’aho Ibilisi agenda, na bamalahika bayisha baha Yezu ebiryo alya. Kurhondera ago mango, Yezu akayaliza omwanzi mwinja gw’Obwami. Ogo go mukolo gwarhumaga ayisha hanw’igulu. Abantu bashagalukira ebi Yezu akag’ibayigiriza, banakamukulikira ngasi hoshi akag’ija.