Nta Kantu Kakabahanzize Okuhubiri

Mulume muguma orhakag’ilambagira akag’ibêra atamire aha muhango gw’ehekalu ngasi lusiku anakag’ikahûna-hûna. Lusiku luguma enyuma z’emidi, abona Petro na Yowane baja omu hekalu. Ababwira ntya: ‘Mwemukasinga mumpe kantu kalebe.’ Petro aderha ntya: ‘Ngwerhe akantu kinja bwenene nakuha kalushire ensaranga. Omw’izino lya Yezu, oyimuke onalambagire!’ Enyuma z’aho Petro amuyimanza anarhondera alambagira! Bantu banji bashagaluka bwenene enyanya z’eco cisomerine na banji bwenene baba bemezi.

Cikone abakuhani n’Abasadukayo bagaya. Bagwarha entumwa, bazihêka oku kagombe, banazidosa ntya: ‘Indi wamuhâga obuhashe bw’okufumya oyu mulume?’ Petro aderha ntya: ‘Yezu Kristu mwayirhaga, ye warhuhâga obo buhashe.’ Abakulu b’amadîni baderha ntya n’izu linene: ‘Muleke okuganira lugenda Yezu!’ Cikone entumwa zaderha ntya: ‘Rhushinganine rhuganire lugenda Yezu. Rhurhanaleke okujira ntyo.’

Erhi Petro na Yowane bashwekulwa, ho n’aho baj’ibona abandi banafunzi banabaganirira ebyabahikire. Boshi bashenga Yehova haguma, banamubwira ntya: ‘Wekasinga orhurhabale rhube n’oburhwali lyo rhugendekera rhwajira omukolo gwawe.’ Yehova abaha iroho lyage litagatifu, bagendekera bahubiri n’okufumya abantu. Bantu banji bwenene baba bemezi. Abasadukayo bayagalwa bwenene, na ntyo bashweka entumwa banazikweba omu prizo. Cikone omu budufu, Yehova arhuma malahika, ayigula emilango y’eprizo, anabwira entumwa ntya: ‘Mugaluke omu hekalu, munaj’iyigiriza.’

Erhi buca sezi, bamanyisa e Sanhedrini, n’akagombe k’ebirongonzi by’amadîni ntya: ‘Eprizo eciri nyigale, cikone balya balume njo mwashwekaga barhacimuli! Bali omu hekalu, banali bayigiriza abantu!’ Bashub’igwarha entumwa, banazihêka omu Sanhedrini. Kuhani mukulu aderha ntya: ‘Rhwamuhanzize okukaderha lugenda Yezu!’ Cikone Petro ashuza ntya: “Kukwanine okuyumva Nyamuzinda kulusha abantu.”

Ebirongozi by’amadîni byagaya bwenene byanalonza okuniga entumwa. Cikone Mufarizeyi muguma wakag’ihamagalwa Gamaliyeli ayimanga anaderha ntya: ‘Mube masu! Nkaba Mungu ali haguma n’aba balume. Ka kobinali mulonzize mulwise Mungu?’ Bayumva er’ihano lyage. Erhi bayusa bashurha entumwa, bashub’izirhegeka oku zileke okukahubiri, banazileka zigende. Cikone oko kurharhumaga entumwa zaleka okuhubiri. Entumwa zagendekera zahubiri n’oburhwali omwanzi mwinja, omu hekalu na nyumpa oku yindi.