Amadoso g’Abantu Basoma Ebitabu Birhu
Bulya gurhi bantu baguma na baguma babona oku olwandiko lw’Ennanga 12:7 luyerekire enderho za Yehova (mulongo gwa 6) n’obo omu Biblia—Tafsiri ya Ulimwengu Mupya luyerekire “abagaraganda” (mulongo gwa 5)?
Emilongo eshokwire n’ekulikire eyerekine oku olo lwandiko luganirire abantu.
Omu Ennanga 12:1-4, Mashi Bible, rhusomire oku “abikubagirwa bali buhwa omu kagarhi k’abantu.” Rhuganirirage Ennanga 12:5-7, Mashi Bible, milongo eri omw’idoso lirhu.
“‘Bulya abagaraganda balenganyire
n’abakenyi balaka,
Lero Nyamuzinda aderha erhi:
‘Ka nyimukage, ngend’irhabala oyu bali bavumanga.’
Emyanzi ya Nyamuzinda eba myanzi ecîre,
Nka cuma bâmageza omw’ikombe [ifuru] kali nda.
Nyamuzinda we warhulikûza [warhulanga],
We warhulanga kw’eri iburha ensiku n’amango.”
Omulongo gwa 5 guyerekine ebi Mungu adesire lugenda abagaraganda. Adesire oku abalikûza.
Omulongo gwa 6 guyushwire oku “emyanzi ya Nyamuzinda eba myanzi ecîre,” ‘nka cuma bâmageza omw’ikombe.’ Oko kuyerekine oku rhuciyumva lugenda akanwa ka Nnâmahanga.—Enna. 18:30; 119:140.
Rhuganirirage omulongo gukulikire, Ennanga 12:7: “Nyamuzinda we warhulikûza, we warhulanga kw’eri iburha ensiku n’amango.” K’ogo mulongo guyerekire abantu erhi emyanzi ya Nyamuzinda?
Bulya omulongo gwa 7 gukulikire enderho lugenda “emyanzi ya Nyamuzinda,” bantu baguma na baguma banaderha oku oko kuyerekire enderho za Nyamuzinda. Rhunamanyire oku Mungu alanzire Ebibliya ciru akaba abakag’iyihagalika bajijire bushiru bunji lyo bayiheza n’okuyishereza.—Iz. 40:8; 1 Pt. 1:25.
Ciru akaba ntyo, ebidesirwe omu mulongo gwa 5 nabyo biri by’okuli. Ensiku zoshi, Yehova anarhabale n’okuciza “abagaraganda” n’“abalenganyire” anagendekera ajira ntyo.—Ayu. 36:15; Enna. 6:4; 31:1, 2; 54:7; 145:20.
Co cirhumire, k’omulongo gwa 7 guyerekire abantu erhi emyanzi ya Nyamuzinda?
Ebiri mw’olo lulanga biyerekine oku luganirire abantu.
Olwandiko lw’Ennanga 12:1 luganirire akanga k’“abikubagirwa” nkaba bakag’irhebwa. Enyuma z’aho, hali enderho ziyerekine oku Yehova ahana balya bakolesa olulimi lwabo kubi. Olo lulanga lurhuyemezize n’obwalagale oku Mungu ahalira abantu bage bulya emyanzi yage eba ecîre.
Co cirhumire, omulongo gwa 7 gudesire oku Yehova alanga abagaraganda bali bajirirwa kubi n’abantu babi.
Ekopi z’okulangalirwa z’Amandiko g’Ecihabraniya zal’ikolesize oluderho luyerekire abantu. Ebibliya ehamagalwa la Septante ekolesize kabirhi oluderho “rhwe” omu mulongo gwa 7, n’oko kuyerekine oku ogo mulongo guganirire abikubagirwa bali bagaraganda banalenganyire. Buzinda, omulongo gwa 7 gudesire oku ngasi muguma w’abo ‘bikubagirwa’ alangwa “kw’eri iburha,” ko kuderha abantu babi bagendekeza olugenzi lugalu-galu. (Enna. 12:7, 8) Omu mpindulo nguma y’Amandiko g’Ecihabraniya omu lulimi lw’Eciharamiya, omulongo gwa 7 gudesire ntya: “Yagirwa, NYAKASANE, walanga abashinganyanya, wabalanga kw’eri iburha libi ensiku n’amango. Ababi banayande-yande ngasi hoshi nka mushundwe gunûna omuko gwa bene bantu.” Oko kandi kuyerekine n’obwalagale oku olwandiko lw’Ennanga 12:7 lurhayerekiri enderho za Nyamuzinda.
Co cirhumire, ogo mulongo guhîre “abikubagirwa” obulangalire oku Mungu abaciza.