Gileyadi Gaba Masomo Galerhera Amashanja Goshi Obunguke

Ngasi mwaka omubalè gwa bene wirhu na bali birhu b’omw’igulu lyoshi baba omu mukolo gwago-gwago gw’akasanzi koshi banalalikwe oku Masomo g’Egeliyadi, gajirirwa oku Masomo ga Watchtower e Patterson, omu New York.a Kw’ago masomo, abanafunzi banayige gurhi bakakabamwo n’amalehe minja omu ngasi mukolo bahîrwe n’ikubuliro lya Yehova. Ago masomo ganabarhabale bahugûkwe gurhi bakakazibuhya n’okurhabala ebigamba n’amabiro g’etawi omw’igulu lyoshi.

Kobinali Gileyadi gaba masomo galerhera amashanja goshi obunguke. Kwa lwiganyo, isomo lya 147, lyajiragwa omu mwaka gwa 2019, lyalimo banafunzi 56, barhengaga omu bihugo 29. Abanafunzi basoma ago masomo banabe erhi barhanzirija omu mukolo gwago-gwago gw’akasanzi koshi, kwa lwiganyo nka babetelite, bangalizi, bamisionere, erhi ba painiya bapekee.

Amarheganyo g’ago masomo ganakajirwa embere bwenene. Kwa lwiganyo, Edepartema y’oku Biro Bikulu Eshibirira Ebintu by’Emibalamo (WHQ Travel) enagule e billets z’abanafunzi balalisirwe kuli ago masomo. Okubiyerekire isomo lya 147 ly’Egileyadi, byalihûnyire okulipira ngasi mwanafunzi warhenga omu cindi cihugo etransporo ya dolare 1 075 ly’aja e Patterson anagaluke. Abanafunzi barhenga oku Birhwa by’e Solomon balihûnyire okugenda omu avion ini lyo bahika e Patterson na buzinda omu kugaluka banaja omu avion isharhu lyo bagaluke emwababwe, ogo guli mubalamo gwa bilometre hofi 35 400! Eyo mibalamo yoshi yalihûnyire okulipira ngasi mwanafunzi dolare 2 300. Lyo rhurhagiyusa nsaranga nyinji, eyo deparatema yakolesa programe nguma y’oku Enternete ly’ebona e billets z’ibeyi lisungunu. Na ciru akaba babwine e billets z’ibeyi lisungunu, eyo progwame yagendekera yalongereza gurhi bakabonamwo e billets z’ibeyi lisungunu bwenene. Na kandi eyo departema yakolesa bwinja lula luhembo baha ba clients.

Banafunzi banji baba balagirire oku visa lyo baja e Amérique. N’omu ntyo, Edepartema y’oku Biro Bikulu Eshibirira Ebiyerekire Amarhegeko, enarhabale bene wirhu bakola omu Departema Eshibirira Ebintu by’Emibalamo ly’abanafunzi babona e visa. Dolare 510 zo bakalipira ngasi mwanafunzi n’okuyandikisa e visa yage.

Gurhi rhuyungukamwo n’okukomerezibwa abo banafunzi bakomerezibwa? Mwene wirhu Hendra Gunawan ali akola nka mugula e Asie du Sud-Est. Ali omu cigamba ciguma cibamo mulume muguma na mukage basomaga amasomo g’Egileyadi. Adesire ntya: “Embere, ecigamba cirhu cirhalimo painiya ciru n’omuguma. Cikone erhi abo banafunzi bahika, obushiru bwabo n’iroho lyabo ly’okucihâna lyashumya abandi nabo barhondera obupainiya. Enyuma z’aho, mwali wirhu muguma w’omu cigamba cirhu ahikira aha aja oku Masomo g’aba Eneza Injili bw’Obwami!”

Sergio Panjaitan okolera oku Beteli y’e Asie du Sud haguma na bene wirhu na bali birhu basomire Amasomo g’Egileyadi, adesire ntya: “Okukomerezibwa bakomerezibwe, gurhali mugisho kuli abo banafunzi bone; cikone gunali mugisho kuli rhwe. Baciyigirizize bintu binji! Cikone ahali h’okucibona oku bo bali ba bulagirire kulusha abandi, banakayereka abandi ebi baciyigirizize. Okujira ntyo kunarhume rhwahânana omurhima.”

Gurhi ikubuliro lilipamwo ensaranga zihûnwa ly’ago masomo gajirwa? Linajire ntyo kugerera oburhabale bwa bene wirhu na bali birhu b’omw’igulu lyoshi. Burhabale bunji buhânwa kugerera donate.jw.org. Rhumuvuzire omunkwa mweshi kw’er’iroho linyu ly’okuhâna. Oburhabale bwinyu bunahashise okujirwa kw’ago masomo galerhera amashanja goshi obunguke.