Muhigo muci Nnamahanga agwerhe kuyerekera igulu?

1. Bici byarhumire Nnamahanga alem’igulu?

Rhuli bene bantu, Yehova àrhuhîre igulu mpu habe ahamwirhu. Arhalemaga Adamu na Eva, omulume n’omukazi wa burhanzi, mpu balam’empingu, bulya empingu ali amayilemera bamalahika. (Ayubu 38:4, 7) Abo bantu barhanzi, Nnamahanga abahebire omu paradizo ederhwa obusâni bwa Edeni. (Omurhondêro 2:15-17) Ntyola, Yehova aha Adamu n’iburha lyage lyoshi obulangalire bw’okulama emyaka n’emyaka han’igulu.​—Osome Ennanga 37:29; 115:16.

Aha murhondero, obusâni bwe Edeni bwone bwali paradizo. Adamu na Eva, baligwasirwe baburhe, babumbe iguli. Kuhwa kwa nsiku, bankarhegesire igulu lyoshi n’okulihindula libe paradizo. (Omurhondêro 1:28) Iguli lirhakasherezibwa ciru n’olusiku luguma. Ho aha mwirhu hano, ensieku n’amango.​—Osome Ennanga 104:5.

Oyerekane evideyo edesire Bici Byarhumâga Nnamahanga Alema Igulu?

2. Bici birhumire igulu erhali paradizo ene?

Adamu na Eva barhagendereraga okukenga Yehova, na ntyo abalibirhako mpu barhenge omu ishwa lyage ly’amasima. Eyo paradizo yahera na nta muntu wankacihashire okuyigalula. Nkoku Ebibliya enadesire “igulu lyagwa omu nfune z’omubi.”​—Ayubu 9:24, NW.​—Osome Omurhondêro 3:23, 24.

Ka Yehova ayibagire ogwo muhigo gwage murhanzi kuli bene bantu? Nanga! Ali ogala byoshi. Arhankayabirwa okuhikiriza omuhigo gwage. (Izaya 45:18) Agalulira abantu akalamo kinja alibarheganyigize kurhenga emurhondero.​—Osome Ennanga 37:11, 34.

3. Mangaci eparadiso yagalulwa?

Eparadizo yagalulwa omu mango g’oburhegesi bwa Yezu bulya ye Mwami Nnamahanga ayimisire mpu arhegeke Obwami bwage. Omu ntambala ya Har-magedoni, Yezu ashokolera bamalahika omu kuhererekeza abashombanyi ba Nnamahanga boshi. Enyuma ly’aho, Yezu ashweka Shetani miaka 1 000. Abantu ba Nnamahanga bayishicira obwo buhererekeze, bulya Yezu ayishibalongola n’okubalanga. Bayishiba n’obuzine bw’ensiku n’amango omu parasizo han’igulu.​—Osome Amafulûlo 20:1-3; 21:3, 4.

4. Mangaci amalibuko gahwa?

Mangaci Nnamahanga akula amalibuko goshi han’igulu? Yezu arhuhire “ecimanyiso” c’okurhuyereka oku obuzinda buli hofi. Ebigalugalu biri omw’iguli, biribyakuyobohya, bihebire akalamo k’abantu omu madarhi na kandi biyerekine oku obuzinda buli hofi.​—Osome Mateyo 24:3, 7-14, 21, 22.

Omu cigabi c’emyaka 1 000, Yezu arhegeka igulu erhi anali empingu. Go mango ayishimala amalibuko goshi. (Izaya 9:5, 6; 11:9) Na kandi Yezu ayishiba Mwami na Mudahwa Mukulu. Ayishihorhola ebyaha by’abasima Nnamahanga. Kugerera kuli Yezu, Nnamahanga akulaho endwala, obushosi n’olufu.​—Osome Izaya 25:8; 33:24.

5. Bandi bayishilama mw’eyo paradizo?

Abantu bakenga Nnamahanga bo banalame mw’eyo paradizo. (1 Yowane 2:17) Yezu arhumire abashimbulizi bage mpu balongereze abantu birhohye, banabayigirize gurhi bankajira lyo Nnamahanga abazigira. Ene, Yehova ali arheganya emilioni y’abantu bayishilama omu paradizo omu mango gayiruka. (Sofoniya 2:3) Omu Nyumpa z’Obwami z’Abahamirizi ba Yehova, abantu banayigirizibwe gurhi bankaba balume na bakazi binja n’okuba babusi binja. Abana n’ababusi babo banaharamye Nnamahanga haguma, n’okuyiga gurhi emyanzi y’Ebibliya yankabarhabala okuba n’akalamo kinja.​—Osome Mikeyo 4:1-4.