Gurhi wankajira ly’omulala gwawe guba n’omwishingo?

1. Bulya gurhi okuyandikisa obuhya emwa leta kuli kwa bulagirire bwenene ly’omulala guba n’omwishingo?

Omwanzi mwinja gurhenzire emwa Yehova, Nnamahanga w’omwishingo. Alonzize emilala nayo ebe n’omwishingo. (1 Timoteyo 1:11) Ye warhondezagya obuhya. Okuyandikisa obuhya emwa leta kuli kwa bulagirire bwenene, bulya kunarhabale ngasi muguma omu babusi aciyumve arhuzize, n’abana balerwe omu murhula. Abakristo bakwanine bakenge amarhegeko g’ecihugo gahunyire oku obuhya buyandikwe emwa leta.​—Osome Luka 2:1, 4, 5

Myaka inga Nnamahanga alonzize obuhya bulame? Nnamahanga alonzize omulume n’omukazi barholine balame haguma akalamo kabo koshi. Yehova alonzize omulume n’omukazi barholine barhahushaga erhi kuger’embuga z’obuhya. (Abahabraniya 13:4) Yehova ashomba bwenene abarholine balekane. (Malakiya 2:16) Cikwone erhi muguma mulibo ankajira obugonyi, lyoki bankalekana, n’oyu owabo alenganyagya, erhi akalonza anashubi jira obundi buhya.​—Osome Mateyo 19:3-6, 9.

2. Gurhi omulume n’omukazi barholine bagwasirwe balame?

Yehova alemire omulume n’omukazi lyo barhabalana omu buhya, bulya ngasi muguma alagirire oku wabo. (Omurhondêro 2:18) Bulya omulume ye nnawabo w’omulala, agwasirwe okulongereza ebintu by’obulagire n’okuyigiriza abantu b’omulala gwage omwanzi gwa Nnamahanga. Omulume agwasirwe abe n’obuzigire bw’okuli kuli mukage n’okuhira amalagirire ga mukage embere z’agage. Omulume n’omukazi bagwasirwe bazigirane n’okukengana. Bulya bombi barhali bashinganyanya, bagwasirwe bacikomeze okubabalirana lyo babona omwishingo omu buhya bwabo.​—Osome Abefezi 4:31, 32; 5:22-25, 33; 1 Petro 3:7.

3. Ka mugwasirwe mulekane bulya obuhya bwinyu bulimw’embaka?

Nkaba obuhya bwinyu bulimw’embaka, muciseze mukalemberana n’okuzigirana. (1 Abakorinti 13:4, 5) Akanwa ka Nnamahanga karhayemeriri abarholine balekane mpu yo njira y’okumala ezo mbaka z’omu buhya za ngasi lusiku.​—Osome 1 Abakorinti 7:10-13.

4. Mwe bana, bici Nnamahanga amuhunyire?

Yehova alonzize mube n’omwishingo. Abahire amahano minja lyo muyunguka omu busole bwinyu. Ababusi binyu babalushire bwenge banakola babwine binji muli er’igulu, ntyola Yehova alonzize mubayiganye n’okubayumvirhiza. (Abakolosi 3:20) Yehova ye Mulemi winyu, alonzize mujire ebi ye n’Omugala wage bamuhunyire lyo muba n’omwishingo.​—Osome Omuhanûzi 11:9–12:1; Mateyo 19:13-15; 21:15, 16.

5. Mwe babusi, bici mwankajira lyo abana binyu baba n’omwishingo?

Mugwasirwe okubakolera lyo barhagibula akalyo, eciralo, n’ebi bayambala. (1 Timoteyo 5:8) Cikwone, lyo babona omwishingo, mugwasirwe mubayigirize okusima Nnamahanga n’okushimba amarhegeko gage. (Abefezi 6:4) Abana bakabalolerak’olwinganyo. Mukasima Nnamahanga bwenene nabo babayiganya. Erhi enyigirizo zinyu zankakarhenga omu Bibliya, zanabarhabala okuyoboha Nnamahanga.​—Osome Olushika 6:4-7; Emigani 22:6.

Erhi mwankakabaha omurhima n’okubavuga omunkwa oku minja bajijire, okwo kwanabaha omwishingo banaciyumve badekerire. Na kandi, mugwasirwe mubahanule n’okubalera bwinja. Okujira ntyo kwanabarhabala bacilange n’ebijiro byankababuza omwishingo omu kalamo. (Emigani 22:15) Cikwone, mumanye mwaba bakali bwenene nka ntale.​—Osome Abakolosi 3:21.

Abahamirizi ba Yehova bagwerhe bitabu binji byankarhabala ababusi n’abana, ebyo bitabu biyimangire omu mahano g’Ebibliya.​—Osome Ennanga 19:8, 12.