Mungu Alema Empingu n’Igulu

Yehova Mungu ye Mulemi wirhu. Ye walemaga ebintu byoshi, ebi rhubona n’ebi rhurhabona. Embere aleme ebintu rhubona, arhang’ilema bamalahika banji bwenene. K’omanyire bamalahika bo bandi? Bamalahika baba bantu Yehova alemire bayorha akage. Rhurhakababona, nk’oku rhurhakanabona Mungu. Malahika murhanzi Yehova alemaga ahikira okuba murhabazi wage. Oyo malahika arhabala erhi Yehova ali alema enyenyezi, amaplanete, n’ebindi bintu byoshi. Nguma ya muli ezo planete ly’er’igulu linja bwenene rhuba rhulamireko.

Enyuma z’aho Yehova arheganya igulu lyo bene bantu n’ensimba balilamako. Alema izuba lyo likamoleka okw’igulu. Alema entondo, enyanja, n’enyishi.

Gurhi byabire enyuma z’aho? Yehova aderha ntya: ‘Nkola nalema ebyasi bibishi, emirhi y’emburho, n’emirhi y’amalehe.’ Mirhi minji eri lubero y’amalehe, ebishogo-shogo, n’amauwa byarhondera byamera. Enyuma z’aho Yehova alema ensimba zoshi; ezibalala, ezilama omu mishi, ezilambagira, n’ezibululuka. Alema ensimba nsungu-ngunu nk’ensungura n’enenene nka batembo. Nsimba ehi oshagalukira bwenene?

Enyuma z’aho Yehova abwira malahika murhanzi ntya: “Rhujirage omuntu.” Abantu bakabire lubero n’ensimba. Bakakazir’ikajira bintu bilebe. Bakabire n’obuhashe bw’okuderha, okusheka, n’okusalira. Bakashibirire igulu n’ensimba. K’omanyire omuntu murhanzi ali ndi? Leki rhulabe.