Mungu Alema Omulume Murhanzi n’Omukazi Murhanzi

Yehova ajira obustani omu eneo yakag’ihamagalwa Edeni. Obo bustani bwalimwo amauwa, emirhi n’ensimba. Enyuma z’aho, Mungu alema omuntu murhanzi Adamu kurhenga omu budaka anabuhira omûka omu mazulu gage. K’omanyire gurhi byabire? Oyo mulume aba muntu ozine! Yehova aha Adamu omukolo gw’okushibirira obo bustani, anamuha omukolo gw’okuha ensimba zoshi amazino.

Yehova aha Adamu irhegeko liguma ly’obulagirire. Amubwira ntya: ‘Wanalya oku malehe g’emirhi y’obustani yoshi, ci orhalyaga amalehe ga murhi muguma gone. Bulya okalya amalehe g’ogo murhi, wanafâ.’

Enyuma z’aho Yehova aderha ntya: ‘Najirira Adamu omurhabazi.’ Ajira Adamu aj’iro ly’akadodo, anakolesa murhibadu muguma gwa Adamu ly’amulemera omukazi. Izino ly’oyo mukazi ye wali Eva. Adamu na Eva gwaba mulala murhanzi. Gurhi Adamu aciyumvirhe erhi bamuha omukazi? Adamu ashagaluka bwenene anaderha ntya: ‘Ala ebi Yehova anajijire omu kukolesa omurhibadu gwani! Oyu lero anshushire!’

Yehova abwira Adamu na Eva baburhe abana babumbe igulu. Al’ilonzize bakashagalukira okukola haguma omu kujira igulu lyoshi libe paradizo erhi bustani bwinja buli nk’oku obustani bw’e Edeni bwal’iyosire. Cikone arhali ntyo kw’ebintu byabire. Bulya gurhi? Rhwayiga binji lugenda oko omw’isomo likulikire.