Bantu Munani Barhasherezibagwa n’Enkuba y’Ecihonzi

Nuhu, omulala gwage, n’ensimba baja omu safina. Yehova ayigala olumvi n’enkuba yarhondera yania. Enkuba yania bwenene n’esafina yarhondera yayerera enyanya z’amishi. Enyuma z’aho igulu lyoshi lyabumba mishi. Abantu babi boshi bali embuga z’esafina bafâ. Cikone Nuhu n’omulala gwage bali omu bulanzi omu safina. Ka wanarhanya kunganaci bal’ishagalusire bulya barhumikire Yehova?

Enkuba yayusa nsiku 40 eri yania mushi na budufu, buzinda yahumba. Bunyi-bunyi amishi gaja gagana. Buzinda esafina yadekerera oku ntondo. Cikone haciri mishi manji bwenene okw’igulu. Ntyo Nuhu n’omulala gwage barhakarhenzire omu safina mw’ako kasanzi.

Bunyi-bunyi, igulu lyaja lyakala. Nuhu n’omulala gwage bayusize mwaka muguma na kulusha omu safina. Yehova ababwira oku banahulukaga omu safina baje embuga omw’igulu lyabonekine nka lihyahya. Bavuga Yehova omunkwa okubona abarhabire bayokoke, banayerekana oku bavuzire omunkwa omu kumuha enterekêro.

Yehova ashagalukira eyo nterekêro. Analaganya oku nta mango anacishereze ebintu byoshi okw’igulu kugerera enkuba y’ecihonzi. Ajira omutirigongo gubonekane oburhangiriza omu malunga lyo ciba cimanyiso c’eco ciragane. K’okola obwine omutirigongo?

Enyuma z’aho Yehova abwira Nuhu n’omulala gwage baburhe abana babumbe igulu.