Yehova Amacishoga Yozwe

Enyuma z’okuyusa myaka minji ali alongoza Abaisraheli, Musa ali hofi h’okufâ. Yehova amubwira ntya: ‘Arhali we wahisa Abaisraheli omu Cihugo c’Amalaganyo. Cikone nakuleka obone eco cihugo.’ Musa abwira Yehova acishoge omuntu muhyahya walongoza olubaga. Yehova amubwira ntya: ‘Oje emunda Yozwe ali, onamubwire oku ye nacishozire.’

Musa abwira olubaga oku ali hofi afê n’oku Yehova anacishozire Yozwe ly’alongoza olubaga omu Cihugo c’Amalaganyo. Buzinda Musa abwira Yozwe ntya: ‘Omanye wankayoboha. Yehova akurhabala.’ Kasanzi kasungunu enyuma z’aho, Musa aja oku Ntondo Nebo, na Yehova amuyeresa ecihugo alaganyagya Abrahamu, Izaki, na Yakobo. Musa agwerhe myaka 120 erhi afâ.

Yehova abwira Yozwe ntya: ‘Oyikire Olwishi Yordani, oje omu cihugo c’e Kanani. Nakurhabala nk’oku narhabalaga Musa. Ocihangane okasoma Amarhegeko gani ngasi lusiku. Omanye wakayoboha. Obe n’oburhwali. Ogende onajire ebi nakubwizire ojire.’

Yozwe arhuma ndolerezi ibirhi omu vile y’e Yeriko. Omu mwanzi gukulikire, rhwayiga binji lugenda ebyabire eyo munda. Erhi ezo ndolerezi zigaluka, zaderha oku ako kali kasanzi kinja k’okuja omu cihugo c’e Kanani. Olusiku lwakulikiraga, Yozwe abwira olubaga lucirheganye okugenda. Enyuma z’aho abwira bakuhani bal’ibarhwire isanduku ly’endagano bashokolere olubaga banaje omu Lwishi Yordani. Olo lwishi lwal’ibumbire mishi. Cikone erhi amagulu ga bakuhani ganaja omu mishi, ho n’aho olwishi lwaleka okuhulula n’amishi gagana! Bakuhani bayimanga oku budaka bakazire bwali mw’olo lwishi amango olubaga loshi lw’Abaisraheli lwakag’iyikira. K’orhanyize oku eco cisomerine cabakengezize ebi Yehova ajiraga omu Nyanja Ndukula?

Enyuma z’eyo myaka yoshi, Abaisraheli bahika omu Cihugo c’Amalaganyo. Bakayubasirage enyumpa n’amavile. Bakahinzirage amashwa, emizabibu, n’agandi malehe. Cali cihugo cakag’ihululamwo amarha n’obuci.