Yehova Ahîre Samusoni Emisi

Baisraheli banji kandi bashub’irhondera okuharamya ensanamu, na muli oko Yehova aleka Abafilistini barhegeke ecihugo cabo. Cikone hali Baisraheli baguma na baguma bal’izigire Yehova. Mulume muguma muli bo ali Manowa. Ye na mukage barhagwerhe bana. Lusiku luguma Yehova arhumira muka Manowa malahika. Malahika amubwira ntya: ‘Waburha omwana-rhabana. Ayish’iyokola Abaisraheli kurhenga omu maboko g’Abafilistini. Anabe Munaziri.’ K’omanyire Abanaziri bali ba ndi? Bali bakozi bago-bago ba Yehova. Abanaziri barhal’iyemerirwe okumoma emviri zabo.

Enyuma za kasanzi kalebe, mugala wa Manowa aburhwa, banamuha izino lya Samusoni. Erhi Samusoni akula, Yehova amujira mulume wa misi bwenene. Agwerhe obuhashe bw’okuniga entale n’amaboko gone. Mango maguma, Samusoni yene aniga Bafilistini 30. Abafilistini bamushomba banakalonza oku bakamunigamwo. Budufu buguma erhi Samusoni alala e Gaza, baja oku muhango gw’evile banamulinga lyo bamuniga sezi. Cikone omu kagarhi k’obudufu Samusoni azuka, aja aha bwa muhango gw’evile, anagugwikula oku bibambazi. Agubarhula oku birhugo byage anaguhêka oku busongerwe bw’entondo hofi n’e Hebroni!

Buzinda, Abafilistini baj’ibona omunyere Samusoni ajaga asheba wakag’ihamagalwa Delila, banamubwira ntya: ‘Rhwakuha ebihumbi by’ensaranga okamanya bulya gurhi Samusoni ajira misi minji. Rhulonzize rhumugwarhe n’okumuhira omu prizo.’ Bulya Delila al’isimire ensaranga, ayemera okujira ntyo. Oku murhondero, Samusomi alahira okumubwira bulya gurhi agwerhe misi minji. Cikone Delila agendekera okumuyinginga kuhika amubwira bulya gurhi ajira misi minji. Amubwira ntya: ‘Ntasag’imomwa emviri bulya mba Munaziri. Erhi nakamomwa emviri zani, emisi yani yanahwa.’ Okujira ntyo kwarhuma Samusoni agosa bwenene.

Ho n’aho Delila abwira Abafilistini ntya: ‘Manyire ihwe lyage!’ Delila agwishiza Samusoni oku bibero byage anamujisa iro ly’akadodo, na buzinda ahamagala owundi muntu amoma emviri za Samusoni. Delila ayakuza ntya: ‘Samusoni, Abafilistini bali hano!’ Samusoni azuka, cikone arhacigwerhe misi. Abafilistini bamugwarha, bamurhula amasu, banamuhira omu prizo.

Lusiku luguma ebihumbi by’Abafilistini barhimanana haguma omu hekalu ya mungu wabo Dagoni, bakayama erhi; ‘mungu wirhu anarhuhîre Samusoni! Mumuhuluse aje arhushesa.’ Bamuyimanza omu kagarhi ka mitungo ibirhi, banaja bamushekera. Samusoni asalira ntya: ‘Wekasinga Yehova, oshub’impa emisi buno lyone.’ Mw’ago mango, emviri za Samusoni zal’ikola zili zashub’ikula. Asunsunika emitungo y’eyo hekalu n’emisi yage yoshi. Eyo hekalu yoshi yashabuka, yaniga abantu balimwo na Samusoni afâ.