Yehova Amarhabala Yozafati

Yozafati, mwami w’e Yuda, ashereza amazabahu ga Baali n’ensanamu zali omu cihugo. Al’ilonzize abantu bamanye amarhegeko ga Yehova. Ntyo arhuma abaluzi na Bene-Levi omu cihugo coshi c’e Yuda lyo bayigiriza abantu amarhegeko ga Yehova.

Amashanja gali hofi gayoboha okulwisa ecihugo c’e Yuda bulya gal’imanyire oku Yehova ali haguma n’abantu bage. Banahêkera ciru Mwami Yozafati engalo. Cikone enyuma z’aho, Abamowabu, Abaamoni, n’abantu barhengaga omu eneo y’e Seyiri bayish’ilwisa e Yuda. Yozafati al’imanyire oku alagirire oku burhabale bwa Yehova. Ahamagala abalume, abakazi n’abana bayishe boshi e Yeruzalemu. Erhi ali embere zabo boshi, ashenga ntya: ‘Yehova, buzira burhabale bwawe, rhurhakahima. Wekasinga orhubwire oku rhwajira.’

Yehova ashuza ntya kw’er’isala: ‘Murhayobohaga. Namurhabala. Muyimange, murhadundaganaga, mwabona oku namuyokola.’ Gurhi Yehova abayokwiremwo?

Esezi ly’olusiku lwakulikiraga, Yozafati acishoga abimbiza anababwira bashokolere abasoda. Balambagira kurhenga e Yeruzalemu bahika ahantu h’okulwira hakag’ihamagalwa Tekowa.

Erhi abimbiza baba bali bakuza Yehova n’izu linene ly’omwishingo, Yehova akalwira abakozi bage. Yehova ahira akavulindi egarhi k’Abaamoni n’Abamowabu kuhika barhondera balwisanya bone na nnene na nta muguma muli bo wafulumusire. Cikone Yehova alanga abantu b’e Yuda, abasoda n’abakuhani. Abantu boshi b’omu bihugo byali hofi bayumva ebi Yehova anajijire, banamanya oku Yehova acikag’irhabala abantu bage. Gurhi Yehova ayokwiremwo abantu bage? Ajijire ntyo omu njira nyinji. Arhal’ilagirire oku burhabale bwa bene bantu ly’ajira ntyo.