Kw’onabone Obuzîne Nk’oku Nnamahanga Abubona?

1, 2. Luhembo luhi lwinja Yehova arhuhîre?

YEHOVA ahîre ngasi muguma wirhu oluhembo lwinja bwenene. Olo luhembo lo luhamagalwa buzîne. (Omurhondêro 1:27) Alonzize rhube n’akalamo kinja. Co cirhumire arhuhîre amakanuni garhuyigiriza gurhi rhwakarhôla emihigo minja. Rhushinganine rhugakolese bulya ganarhurhabala “rhumanye” “ebinja n’ebibi.” (Abahabraniya 5:14) Erhi rhwakakolesa ago makanuni, n’okugaleka garhukomereze, oko kwanarhurhabala rhube n’entanya nyinja. Erhi rhwakakolesa ago makanuni rhwanahikira aha rhwaba n’akalamo kinja. Na ntyo amakanuni ga Nnamahanga ganabonekana oku gali minja bwenene.

² Akalamo kanahikira aha kaba kazibu. Hali amango rhurhiganana n’akanga kazibu kalya ciru nt’irhegeko ly’Ebibliya lirhuyeresire ebi rhushinganine rhujire. Kwa lwiganyo, omu kasanzi rhulonzize okuhiga okubiyerekire okubukwa kuhunyire okukolesa omuko. Gurhi rhwakarhôla emihigo eshagalwîre Yehova? Omu Bibliya muli amakanuni garhuyigirizize gurhi Yehova abona obuzîne n’omuko. Erhi rhwakagahugûkwa bwinja, rhwanakarhôla emihigo minja n’okuba n’ezamiri nyinja. (Emigani 2:6-11) Rhukola rhwarhang’iganirira makanuni maguma na maguma.

GURHI YEHOVA ABONA OBUZÎNE N’OMUKO?

3, 4. (a) Gurhi Nnamahanga ayerekîne entanya zage lugenda omuko? (b) Bici omuko gushushanyize?

³ Ebibliya eyigirizize oku omuko guba mutagatifu/gucire bulya guba gushushanyize obuzîne. Na Yehova naye anakabona obuzîne oku buli bwa bulagirire. Erhi Kayini ayusa aniga omulumuna, Yehova amubwira ntya: “Izu ly’omuko gwa mulumuna wawe lidwirhe lyalakira emunda ndi kurhenga omu budaka.” (Omurhondêro 4:10, NWT) Omuko gwa Abeli gwâl’ishushanyize obuzîne bwage; erhi Kayini aniga Abeli, akalamo kamuhwera.

⁴ Enyuma ly’Enkuba y’ecihonzi y’oku lwa Nuhu, Nnamahanga abwira bene bantu oku bakalya enyama. Cikoki ababwira ntya: “Cikone murhalyaga enyama mukanalya obuzîne bwayo, kw’okuderha omuko gwayo.” (Omurhondêro 9:4) Iburha lya Nuhu lyâl’ishinganine likulikire elyo irhegeko, na nirhu rhuli iburha lyage. Kuli Yehova omuko gushushanyize obuzîne. Nirhu rhushinganine rhugubone nk’oku naye agubona.​— Ennanga 36:9.

5, 6. Bici Irhegeko lya Musa lirhuyigirizize lugenda oku Yehova abona obuzîne n’omuko?

⁵ Amango Yehova ahaga Musa irhegeko, Amubwira ntya: “Ngasi muntu . . . erhi akalya omuko gwa cintu cilebe, nanakunirira oyo muntu wacîshomagya alya ogo muko kandi nanamukaga muli bene wabo. Bulya obuzîne bw’ecintu omu muko gwaco bubâ.”​—Bene-Levi 17:10, 11.

⁶ Lugenda Irhegeko lya Musa erhi omuntu akanizire ecintu lyo acirya, al’ishinganine abulagire omuko gwaco okw’idaho. Oko kwakag’iyerekana oku obuzîne bw’ecintu bwâli butagatifu n’oku bwâl’ishinganine bugalukire Yehova. (Olushika 12:16; Ezekiyeli 18:4) Okubulaga omuko goshi omu cintu yone njira Yehova al’iyemerire aba Israheli, na ntyo bakalire eco cintu banagwerhe ezamiri zicire. Omu kukenga ebi irhegeko lyal’idesire lugenda omuko gw’ecintu bakayerekine oku bakenzire Yehova Wahanâga eryo irhegeko. Kandi aba Israheli bal’irhegesirwe okuhâna ensimba nterekêro lyo babalirwa ebyaha byabo.​—Olole Amahugûlo nomero 19 na 20.

7. Gurhi Daudi ayerekînemwo oku akenzire omuko?

⁷ Kandi oku Daudi ajirâga erhi aba ali alwisa Abafilisti kurhuyigirizize oku omuko guba gwa bulagirire. Erhi abasoda ba Daudi babona oku amayumva enyorha, baja omw’ikambi ly’abashombanyi babo lyo bamulerhera amishi. Daudi alahira oku arhaganywa bulya bahebire akalamo kabo omu mazibu lyo bamulerherago, “agabulâga embere za Yehova.” Aderha ntya: “Nanga waliha Yehova, ntakajira ntyola; ka kurhali kuguma n’okunywa omuko gw’abala bantu barhababaliri obuzîne bwabo?” Daudi al’imanyire oku obuzîne n’omuko biri bya bulagirire kuli Nnamahanga.​—2 Samweli 23:15-17, NWT.

8, 9. Ene gurhi Abakristu b’okuli babona omuko?

⁸ Omu kasanzi k’entumwa Abakristu barhakacihanyîre ensimba nka nterekêro. Cikone bal’ishinganine bagendekere babona omuko oku guli mutagatifu. Yehova al’ibahunyîre oku bagendekere bintu biguma na biguma by’omu Marhegeko ga Musa. Kwa lwiganyo er’irhegeko lidesire, erhi: ‘Muleke okukâlya . . . omuko.’ Er’irhegeko nalyo lyâli lya bulagirire nk’okuyaka obuhushi n’okuharamya ensanamu.​—Ebijiro by’Entumwa 15:28, 29.

⁹ Ene nalyo ntyo kobinahunyîre. Abakristu b’okuli bayishi oku Yehova y’Enshôko y’obuzîne na ngasi kantu kali mw’obuzîne kali kage. Nirhu rhuhugûsirwe oku omuko guli mutagatifu n’oku gushushanyize obuzîne. Co cirhumire rhushinganine okukolesa amakanuni g’Ebibliya lyo rhurhôla emihigo minja okubiyerekire obulenga bw’ecinganga bw’okukolesa omuko.

OKUKOLESA OMUKO OMU MUKOLO GW’ECINGANGA

10, 11. (a) Gurhi Abahamirizi ba Yehova babona okuhirwamw’omuko erhi ciguma c’omu bigabi bini binenene by’omuko? (b) Mihigo ehi ngasi Mukristu ashinganine arhôle?

¹⁰ Abahamirizi ba Yehova babà bahugûsirwe oku “okuleka . . . omuko” kurhali kugulya kone erhi kugunywa. Kuli kurhayemera okuguhirwamo, kurhaguha owundi erhi kugubika lyo buzinda bayish’irhuhiramo go. Kandi kuli kurhayemera ciru barhuhiramo ebigabi bini binenene by’omuko bihamagalwa; eglobile ndukula, eglobile nyeru, eplakete n’eplazma.

¹¹ Ebyo bigabi bini binenene by’omuko byanagabwa omu rhugabi rhusungunu-ngunu rhw’omuko. Ngasi Mukristu ashinganine ahige erhi ayemera orho rhugabi erhi arhulahira. Ngasi Mukristu ashinganine ahige erhi ayemera bamujirire obulenga bw’ecinganga bw’okuyish’imushubizamo omuko gwage. Na kandi ngasi Mukristu ashinganine ahige gurhi omuko gwage gwayish’ikolesibwa omu kasanzi aberwa erhi omu kasanzi apimwa.​—Olole Amahugûlo nomero 21.

12. (a) Bulya gurhi emihigo rhurhôla eyerekire ezamiri ya ngasi muguma eba ya bulagirire omu masu ga Yehova? (b) Bici rhushinganine rhujire embere rhurhôle muhigo mulebe lugenda eby’okubukwa?

¹² Ka Yehova anabone emihigo rhurhôla eyerekire ezamiri zirhu? Neci! Anayibone bulya eyo mihigo enayerekane bici birhuli omu ntanya. (Osome Emigani 17:3; 24:12) Omu ntyo embere rhurhôle muhigo mulebe lugenda eby’okubukwa, rhushinganine rhuhûne Yehova oburhabale lyo arhurhabaza rhujire obusagasi lyo rhurhôla emihigo minja. Enyuma z’aho rhushinganine rhuyumvirhize ezamiri zirhu nyigirize n’Ebibliya lyo rhurhôla omuhigo. Rhurhakwanini rhudose abandi ebi bohe bakajira muli kanga kalebe. Na kandi rhurhakwanini rhuseze abandi erhi kubashumya mpu barhôle muhigo mulebe. Ngasi Mukristu “anabarhulè omuzigo gwage yene.”​—Abagalasiya 6:5, NWT; Abaroma 14:12.

AMARHEGEKO GA YEHOVA GAYEREKINE OKU ABA ARHUZIGIRE

13. Bici amarhegeko n’amakanuni ga Yehova lugenda omuko garhuyigirizize?

¹³ Ngasi kantu Yehova arhuhûna mpu rhujire kuba oku bunguke bwirhu bulya aba arhuzigire. (Ennanga 19:7-11) Cikone rhurhamurhumikira mpu bulya amarhegeko gage ganakarhulerhera obunguke. Rhunamurhumikire bulya rhumuzigire. N’obo buzigire rhumugwerheko bunarhushumye rhulahire okuhirwamw’omuko. (Ebijiro by’Entumwa 15:20) Kandi oko kunalange amagala girhu. Bantu banji ene bali bahikirwa n’amazibu galerhwa n’okuhirwamw’omuko. Ciru n’abanganga banji bayishi oku okubuka buzira kukolesa omuko ko kuba kwinja bwenene. Oko kuyumvikine bulya Yehova ajira bwenge bunji anaba wabuzigire.​—Osome Izaya 55:9; Yowane 14:21, 23.

14, 15. (a) Marhegeko gahi Yehova ahîre aba Israheli lyo abalanga? (b) Gurhi wakakolesa amakanuni gayimangire kw’ago marhegeko?

¹⁴ Ensiku zoshi amarhegeko ga Nnamahanga ganakalerhera abakozi bage obunguke. Yehova ahîre aba Israheli amarhegeko lyo abalanga n’amazibu. Kwa lwiganyo, bulya hali mikolo minji yakag’ijirirwa oku nyanya ly’enyumpa zabo, irhegeko lyal’ibwizire nnanyumpa oku al’ishinganine ayubake olukuta oku nyanya entambi zoshi ly’omuntu wagera aho arhag’ihonako. (Olushika 22:8) Elindi irhegeko lyal’iyerekire oku omuntu akalanga ebishwekwa. Erhi omuntu akabîre agwerhe empanzi nkali al’ishinganine akayiyabula bwinja lyo erhag’ikatumirha abantu erhi kubaniga. (Olubungo 21:28, 29) Erhi omu Israheli akabuzîre bukenga ago marhegeko bakag’imutumuza owafîre.

¹⁵ Ago marhegeko garhuyigirizize oku obuzîne buba bwa bulagirire kuli Yehova. Gurhi oko nirhu kwakarhuhumako? Rhushinganine rhuyerekane oku rhukenzire obuzîne omu kushibirira enyumpa yirhu bwinja, omutuga, n’okucishoga bwinja ebintu by’okucishagalula. Bantu baguma na baguma banarhanye oku nta mazibu gakabahikira, ci bwenene emisole. Yehova arhalonzizi rhuyorhe ntyo. Alonzize rhubone obuzîne oku buli bwa bulagirire bwenene, kw’okuderha obuzîne bwirhu n’obw’abandi.​—Omuhanûzi 11:9, 10.

16. Gurhi Yehova abona okugeza izimi?

¹⁶ Yehova anakabona obuzîne bwa bene bantu oku buli bwa bulagirire. Ciru n’obuzîne bw’ehibonjo hirhaciburhwa buli bwa bulagirire. Lugenda Irhegeko lya Musa, erhi omuntu akahukwîre omukazi ol’izimi buzira bulonza n’oyo mukazi afê erhi izimi ligere, oyo muntu wamuhukulaga al’ishinganine afê. Ciru akaba yali aksida, oyo muntu al’ishinganine alyule ebyahezire. (Osome Olubungo 21:22, 23) Obuzîne bw’ehibonjo hirhaciburhwa buba bwa bulagirire kuli Nnamahanga. Oku ntanya zawe, gurhi Nnamahanga abona okugeza izimi? Gurhi aciyumva erhi abona emiliyoni y’amazimi gali gakûlwa ngasi mwaka?

17. Bici omukazi wagezize izimi embere amanye Yehova akayemera n’obwalagale?

¹⁷ Erhi akaba omukazi akuzire izimi embere arhacimanya entanya za Yehova okubiyerekire eco cijiro, gurhi byakaba? Akwanine ayemere n’obwalagale oku Yehova anamubabalira kugerera engombôlo ya Yezu. (Luka 5:32; Abefezi 1:7) Omukazi wajijîre eco caha embere amanye Yehova, arhakwanini agendekere aciyumva oku arhababaliragwa erhi akaba aciyunjuzize kobinali. “Yehova aba wa lukogo na wa bonjo . . . Nka kulya ebushoshokero eri kuli n’ebuzikiro, kwo Nnamahanga ahirika kuli ebyaha birhu.”​—Ennanga 103:8-14, NWT.

OLEKE ENTANYA ZIYUNJWIRE NSHOMBO

18. Bulya gurhi rhushinganine rhujire okwirhu koshi lyo rhuleka entanya mbi lugenda abandi?

¹⁸ Okukenga oluhembo lw’obuzîne Nnamahanga arhuhire kushinganine kurhenge oku murhima. Obo bukenge buhiziremo oku rhubona abandi. Entumwa Yowane yayandîka ntya: “Ngasi yeshi oshomba mwene wabo erhi ali munizi.” (1 Yowane 3:15) Embere rhuhikire aho, rhwanahikira aha rhurhacizigira lebe na buzinda rhwanamushomba. Oko kwanarhuhikira buzira kumanya. Kanji-kanji erhi rhugaya omuntu rhurhac’imukenga, rhunakamunywerhera n’okulonza ciru afê. Yehova anabone entanya zirhu z’ekandalala lugenda abandi. (Bene-Levi 19:16; Olushika 19:18-21; Mateyo 5:22) Erhi rhwakabona oku rhukola rhugwerhe obukunizi lugenda muntu mulebe, rhukwanine rhucihangane rhuleke ezo ntanya mbi.​—Yakobo 1:14, 15; 4:1-⁠3.

19. Gurhi rhwakayerekanamwo oku rhunabone obuzîne oku buli bwa bulagirire?

¹⁹ Hali eyindi njira rhwakayerekanamwo oku rhunabone obuzîne oku buli bwa bulagirire. Ennanga 11:5, NWT zirhuyigirizize oku omurhima gwa Yehova “gunakashologorhwa n’abantu bazigira eby’obuminya.” Erhi rhwakacishoga eby’okucishagalula birimo eby’obuminya, oko kwanayerekana oku nirhu rhuli baminya. Cikone, bulya gurhi rhwakakagwasa enfoto mbi n’entanya mbi omu mirhima yirhu? Rhulonzize rhubumbe emirhima yirhu entanya zicire n’ez’omurhula.​—Osome Abafilipi 4:8, 9.

ORHABAGA MUGUMA W’OMU CINYABUGUMA CIRHAKENGA OBUZÎNE

20-22. (a) Gurhi Yehova abona igulu lya Shetani? (b) Gurhi abakozi ba Nnamahanga bakayerekanamwo oku “barhali cigabi c’er’igulu?”

²⁰ Igulu lya Shetani lirhakenga obuzîne, na Yehova analibone oku ligwerhe ideni ly’omuko. Amarhegesi g’epolitike garhumîre emiliyoni y’abantu yafâ, banji mulibo bali bakozi ba Yehova. Ebibliya eshushanyize ago marhegesi n’ebiryanyi, bikali na biminya. (Daniyeli 8:3, 4, 20-22; Amafulûlo 13:1, 2, 7, 8) Omw’igulu lyoshi bimanyikine oku oburhimbuzi bw’ebunduki bunakagaza bwenene. Ciru n’abantu baguma na baguma bali bahirhi bwenene erhi burhunzi bw’ebunduki burhuma. Kobinali, “igulu lyoshi liri omu buhashe bw’omubi.”​—1 Yowane 5:19, NWT.

²¹ Abakristu b’okuli “barhaba cigabi c’er’igulu.” Abakozi ba Yehova barhacihira omu bintu by’epolitike n’ivita. Barhanigana erhi kurhabala ebinyabuguma bigalu-galu. (Yowane 15:19; 17:16) Erhi Abakristu balibuzibwa, barhacihola. Yezu arhuyigirizîze oku rhushinganine rhuzigire ciru n’abashombanyi birhu.​—Mateyo 5:44; Abaroma 12:17-⁠21.

²² Idîni nalyo liri lya niga emiliyoni y’abantu. Okubiyerekire Babiloni Mukulu, ecigusho c’amadîni goshi gw’obunywesi, Ebibliya edesire ntya: “Ye banashanzire alimwo omuko gw’abalebi, n’ogw’abatagatifu, n’ogwa ngasi boshi bafîre okw’igulu.” K’oyumvirhage bulya gurhi Yehova arhuhanizize oku “rhurhenge muli ye?” Abakozi ba Yehova barhaba cigabi c’idîni ly’obunywesi.​—Amafulûlo 17:6; 18:2, 4, 24.

23. Bici rhushinganine okujira lyo ‘rhurhenga’ omu Babiloni Mukulu?

²³ Lyo “rhurhenga” omu Babiloni Mukulu, rhushinganine rhuyerekane oku rhurhali cigabi c’idîni ly’obunywesi ciru n’eriguma. Kwa lwiganyo, rhwanayandikira abakulu b’ago madîni bazaze izino lirhu oku nfishi zabo lyo babona oku rhurhaciri bantu babo. Cikoki, arhali oko kwone rhwakajira, rhushinganine rhugaye n’okuleka ngasi kantu kabi kajirwa n’idîni ly’obunywesi. Idîni ly’obunywesi linakashumika abantu bajire eby’enshonyi n’okuciheba omu politike. (Osome Ennanga 97:10; Amafulûlo 18:7, 9, 11-17) Miliyoni minji y’abantu yafîre erhi oko kw’okurhuma.

24, 25. Gurhi okumanya Yehova kwakarhurhabala rhube n’omurhula n’ezamiri nyinja?

²⁴ Embere rhumanye Yehova ngasi muguma wirhu akag’ijira ebintu bibi birhasimisa Yehova. Cikoki erhi rhumumanya rhwahinduka. Rhwayemera engombôlo na ntyo rhwahâna akalamo kirhu emwa Nnamahanga. Rhukola rhuba rhulamire omu “mango g’oburhulirize . . . garhenga emwa Yehova ye na nnene.” Erhi rhwakasimisa Nnamahanga rhwanaba n’omurhula n’ezamiri nyinja.​—Ebijiro by’Entumwa 3:19, NWT; Izaya 1:18.

²⁵ Erhi akaba embere rhwâli omu cigusho c’abantu barhakenga buzîne, Yehova anarhubabalira kugerera engombôlo. Obuzîne luba luhembo lurhenga emwa Yehova. Rhwanayerekana oku rhushagalukire olo luhembo omu kurhabala abandi bamanye binji kuli Yehova, baciyegûle n’igulu lya Shetani n’okuba n’obwîra buzibu haguma na Nnamahanga.​—2 Abakorinti 6:1, 2.

OBWIRE ABANDI LUGENDA OBWAMI BWA NNAMAHANGA

26-28. (a) Mukolo guhi Yehova al’ihire Ezekiyeli? (b) Mukolo guhi Yehova ahire abakozi bage?

²⁶ Yehova abwîra omulebi Ezekiyeli oku ajirhônda aba Israheli oku Yeruzalemu ali hofi asherezibwe. Al’ishinganine ababwire ebi bakajira lyo bay’ifulumuka obo bushereze. Ezekiyeli acibulaga bwarhônda olubaga, Yehova akamutumuzize omuko gw’abo bantu. (Ezekiyeli 33:7-9) Ezekiyeli ajira okwage koshi ly’abwira abantu ogo mwanzi. Omu kujira ntyo ayerekana oku abwine obuzîne oku buli bwa bulagirire bwenene.

²⁷ Nirhu Yehova arhuhire omukolo gw’okuhaniza abantu oku er’igulu lya Shetani liri hofi lisherezibwe n’okubarhabala bamanye Yehova lyo bayish’icunguka. (Izaya 61:2; Mateyo 24:14) Rhushinganine rhujire okwirhu koshi lyo rhubahikiza emyanzi minja y’Obwami bwa Nnamahanga. Rhulonzize rhuderhe ak’entumwa Paolo yadêrhaga ntya: “Ndi mweru-kweru oku muko gwinyu mweshi bulyala nta mango nalesire kumubwira obulonza bwa Nnamahanga.”​—Ebijiro by’Entumwa 20:26, 27.

²⁸ Lyo rhusêra omu buzigire bwa Nnamahanga rhurhakwanini kone okuba n’entanya za Nnamahanga lugenda obuzîne n’omuko. Cikone rhukwanine rhubêre bacire omu masu gage. Ecigabi cikulikire caganirira ogo mwanzi.