Enyiganyo Ziyigiriza

Mateyo 13:34, 35

OBOFOFI: Ojire enjira yawe y’okuyigiriza ebe nyinja omu kukolesa enyiganyo nembu zakahuma oku mirhima y’abumvirhiza bawe n’okukurhabala oyigirize ebintu by’obulagirire.

OKU WAKAJIRAMWO NTYO:

• Ocishoge enyiganyo nembu. Aka Yezu, okolese ebintu bisungu ly’ohugûla ebintu binene, n’ebintu abantu banyirire ly’ohugûla ebintu bizibu. Orhayushûlaga amahugûlo garhali ga bulagirire gakarhuma olwiganyo lwawe lurhayumvikana bwinja. Omanye bwinja erhi ebintu biri omu lwiganyo lwawe kobinali bipatine n’isomo oli wayigiriza, ly’abumvirhiza bawe barhabulaga busegeza obwenge oku bintu by’obulagirire oli wayigiriza enyanya z’amahugûlo garhapatini n’ebi oli wayigiriza.

• Orhanye oku bintu byakalerhera abumvirhiza bawe obunguke. Ocishoge enyiganyo zihiziremwo emikolo y’abumvirhiza bawe n’ebintu bashagalukira. Obe masu ly’enyiganyo zawe zirharhumaga abumvirhiza bawe baciyumva kubi erhi kucitumuza.

• Oyigirize akantu k’obulagirire. Osegeze obwenge oku kuhâna enyiganyo zisegize ebintu by’obulagirire, c’arhali ebintu bisungunu-ngunu. Omanye n’obwalagale erhi omumvirhiza wawe akakengera arhali olwiganyo lone, cikone kandi n’ebintu by’obulagirire anayizire kugerera olo lwiganyo.