ISOMO LYA 14

Okusegeza Ebintu by’Obulagirire

Abahabraniya 8:1

OBOFOFI: Orhabale abumvirhiza bawe bakulikire ehotuba yawe, onayerekane n’obwalagale gurhi ngasi kantu k’obulagirire kapatine n’omuhigo n’ecirhwe c’omwanzi oli waganirira.

OKU WAKAJIRAMWO NTYO:

Obe n’omuhigo. Omanye n’obwalagale erhi ehotuba yawe eri yakuhâna emyanzi, ya kuyemeza n’obwalagale, erhi yakushumya abumvirhiza bawe, onayigeze omu njira epatine n’ogo muhigo. Ocihangane ebigabi byoshi by’obulagirire bikurhabale okuhikiriza omuhigo gwawe.

Ocidose ntya: ‘Madoso gahi abumvirhiza bani bakaba bagwerhe erhi bici bakaba barhayemiri lugenda ogu mwanzi? Enyuma z’okupata amashuzo bindi bici bakacibiyish’idosa?’ Enyuma z’aho, opange entanya zawe kushimbana n’oku amadoso gabo gakaba gakulikirine. Oko kwarhabala bakuyumvirhize bwinja, bahugûkwe ebi oli wabayigiriza n’okubiyemera.
Osegeze ecirhwe c’ehotuba yawe. Oderhe ecirhwe c’ehotuba yawe omu kasanzi oli wayigeza omu kugalukira enderho z’obulagirire ziri mw’eco cirhwe, erhi omu kukolesa ezindi nderho zishushine n’ezicirimwo.
Ojire ebintu by’obulagirire biyumvikane n’obwalagale binabe bilembu. Ocishoge ebintu by’obulagirire bipatine n’ecirhwe c’ehotuba yawe, ebi wakanahash’iyigiriza buzira kurhalusa akasanzi ohîrwe. Ebintu by’obulagirire birhabaga binji, onaganirire n’obwalagale ngasi kantu k’obulagirire. Enyuma z’okuyusa kantu kalebe k’obulagirire, wanarhuza hitya embere orhondere akandi kantu k’obulagirire. Orhanarhuzagya kasanzi kanji embere oje oku kandi kantu k’obulagirire.

Amango g’enderho zawe z’enshokolezi, wanaganirira ebintu by’obulagirire biri omu hotuba yawe ly’abumvirhiza bawe babishimbulira, erhi omu nderho zawe z’okushwinja, wanabigalukira ly’abumvirhiza bawe bakabikengera.