ISOMO LYA 10
Gurhi Entimanano z’Abahamirizi ba Yehova Zakakulerhera Obunguke?
K’okola olalisirwe oku ntimanano nguma y’Abahamirizi ba Yehova? Akaba orhasagija oku ntimanano zabo, nkaba wanayumva ehy’oboba okuja oku ntimanano zabo oburhanzi. Nkabaga onacidose ntya: ‘Bici bijirwa kw’ezo ntimanano? Bulya gurhi ziri za bulagirire? Bulya gurhi nkwanine nzijeko?’ Mw’er’isomo, wayiga gurhi okubuganana n’abandi kwakakurhabala oyegere Nnâmahanga na gurhi kwakakulerhera obunguke.
1. Ecirhumire cikulu c’okuja oku ntimanano ciba cihi?
Olole gurhi mwandisi muguma w’Ebibliya adesire lugenda ecirhumire cikulu c’okurhimanana n’abandi: “Omu ntimanano nkulu, nayishikuza Yehova.” (Ennanga 26:12, NWT) Abahamirizi ba Yehova nabo banashagalukire bwenene okubuganana. Ngasi hoshi omw’igulu, banabuganane ngasi mugobe lyo bakuza Nnâmahanga, bayimbe enyimbo n’okusalira. Mango maguma maguma omu mwaka, banaje oku ntimanano nkulu.
2. Bici wakayiga oku ntimanano?
Oku ntimanano zirhu, rhunasegeze Akanwa ka Nnâmahanga, oli wayigiriza ‘anakahugûla, n’okuyumvisa ebinwa byoshi.’ (Osome Nehemiya 8:8.) Oku ntimanano zirhu, wanayiga binji kuli Yehova n’amorhere gage minja. Erhi wakamanya binji lugenda obuzigire akujirako, oko kwanakushumya omuyegere. Na kandi, wanamanya gurhi akakurhabala obe n’akalamo k’omwishingo.—Izaya 48:17, 18.
3. Gurhi wakayunguka n’ecinyabuguma c’abandi oku ntimanano zirhu?
Yehova arhuhûnyire oku “rhurhabalane [rhushibirirane, NWT] rhwêne na rhwêne, rhunahânane omurhima omu buzigire n’omu kukola aminja, rhurhanalekaga okukâja haguma.” (Abahabraniya 10:24, 25) Oku ntimanano zirhu, wanabona abantu bashibirirana kobinali, n’akawe nabo banashagalukire okuyiga binji lugenda Nnâmahanga. Wanayishiyumva bali baganirira entanya z’okuhâna omurhima bakuzire omu Bibliya. (Osome Abaroma 1:11, 12.) Wanaba n’obulyo bw’okuganiza abandi bantu badwirhe balwisa n’oburhwali amazibu g’omu kalamo, nk’emisole n’abajîre omu buhya. Ebyo biri biguma by’omu bintu birhuma Yehova asima rhukabuganana ngasi mango!
HUMBIRIRA LY’OHUGÛKWA
Olonze okumanya ebijirwa oku ntimanano z’Abahamirizi ba Yehova na bulya gurhi haba obunguke b’okucihangana okuzijako.
4. Entimanano z’Abahamirizi ba Yehova
Omu myaka igana mirhanzi, Abakristu bakagirhimanana haguma ngasi mango lyo baharamya Yehova. (Abaroma 16:3-5) Osome Abakolosi 3:16, na buzinda oganirire er’idoso:
Gurhi Abakristu b’omu myaka igana mirhanzi bakagiharamya Yehova?
Ene, Abahamirizi ba Yehova nabo banabuganane omu Nyumpa z’Entimanano. Ly’omanya gurhi entimanano zabo zijirwa, olole EVIDEO. Buzinda, olole enfoto y’entimanano nguma y’ecigamba n’okuganirira amadoso gakulikire.
Lushangi luhi obwine luli egarhi k’ebijirwa aha Nyumpa y’Entimanano n’ebi osomire omu Abakolosi 3:16?
Omu video erhi oku nfoto, ka hali akandi kantu kakusimisize lugenda entimanano?
Osome 2 Abakorinti 9:7, na buzinda oganirire er’idoso:
Bulya gurhi Abahamirizi ba Yehova barhahûna abantu nsaranga oku ntimanano zabo?
Haguma na mwalimu wawe, olole ebyayishiganirirwa oku ntimanano nguma y’ogu mugobe.
Cigabi cihi c’entimanano cikusimisize bwenene onabwine oku canakurhabala?
K’omanyire?
Oku jw.org, wanabona ngahi na ns’inga entimanano zijirwa ngasi hoshi omw’igulu.
Omu ntimanano zirhu munajirwe ehotuba, amaonyesho n’evideo. Zinarhangire n’olwimbo n’isala n’okuhwa n’olwimbo n’isala
Hali bigabi biguma biguma bahûnamwo abali oku ntimanano oku bahâne amashuzo
Ngasi yeshi anayegerezibwe: emilala, abalamba, abashosi n’abana
Orhahûnwe kantu koshi-koshi mpu ly’omuja. Abahamirizi ba Yehova barhahûna nsaranga erhi ntûlo omu ntimanano zabo
5. Bihûnyire obushiru ly’oja oku ntimanano
Rhuganirire olwiganyo lw’omulala gwa Yezu. Ly’ogo mulala guja oku ntimanano ya ngasi mwaka, gwakagilambagira hofi bilometre 100 omu eneo y’entondo kurhenga e Nazareti kuhika e Yeruzalemu. Osome Luka 2:39-42, na buzinda oganirire amadoso gakulikire:
K’orhanyize oku omubalamo gw’okuja e Yeruzalemu gwalihûnyire bushiru bunji?
Bulya gurhi bikuhûnyire bushiru bunji ly’oja oku ntimanano?
K’orhanyize oku okujira ntyo kwanakulerhera obunguke? Bulya gurhi?
Ebibliya edesire oku okuja oku ntimanano kuli kwa bulagirire bwenene. Osome Abahabraniya 10:24, 25, na buzinda oganirire er’idoso:
Bulya gurhi kuli kwa bulagirire okukaja oku ntimanano ngasi mango?
HALI ABANTU BADERHA NTYA: “Okubuganana n’abandi kurhali kwa bulagirire. Wanasomera Ebibliya wene aha ka.”
Lwandiko luhi erhi lwiganyo luhi lwʼEbibliya luyerekine ebi Yehova alonzize?
KWA BOFOFI
Okukaja oku ntimanano kwakurhabala oyige binji kuli Yehova, ozibuhye obwîra bwawe haguma naye n’okumuharamya haguma n’abandi.
Okucikengeza
Bulya gurhi Yehova arhuhûnyire rhukabuganana n’abandi?
Bici wakaciyigiriza oku ntimanano z’Abahamirizi ba Yehova?
K’orhanyize oku entimanano zanakulerhera obunguke omu yindi njira?
OCIYIGIRIZE KWA BULÎRI
Gurhi wakajira erhi wakayumva ehy’oboba b’okuja oku ntimanano? Olole gurhi mulume muguma wakagiciyumva ntyo ahikire aha ashagalukira entimanano.
Olole gurhi musole muguma gwashagalukiraga entimanano na gurhi gwajijire lyo gugendekera okujakwo ngasi mango.
Oyige oku abandi baciyumva okubiyerekire okuja oku ntimanano.
“Bulya Gurhi Oshinganine Okaja oku Ntimanano aha Nyumpa y’Entimanano?” (Mwanzi guli oku jw.org)
Obone gurhi akalamo ka muntu muguma wali omu cikundi c’abashumûsi kashanjaga enyuma z’okuja oku ntimanano z’Abahamirizi ba Yehova.
“Nilikuwa na Bunduki Yangu Kila Mahali Nilienda” (Ilabiro ly’Akalalizi, ly’omu lusiku 1/7/2014)