ISOMO LYA 18
Gurhi Wakamanyamwo Abakristu b’Okuli?
Bantu banji bwenene banaciderhe mpu bali Bakristu. Cikone boshi barhaba bayemire ebintu bishushine barhanakenga amakanuni gashushine. Gurhigi rhwakamanyamwo Abakristu b’okuli?
1. Omukristu ye ndi?
Abakristu baba banafunzi erhi bashimbulizi ba Yezu Kristu. (Osome Ebijiro by’Entumwa 11:26.) Gurhi bayerekanamwo n’obwalagale oku bali banafunzi ba Yezu? Yezu adesire ntya: “Mukasêra oku binwa byani, mwaba baganda bani b’okunali.” (Yowane 8:31) K’okuderha oku Abakristu b’okuli bashinganine barhumikire enyigirizo za Yezu. Ebi Yezu akagiyigiriza byakagirhenga omu Bibliya, Abakristu b’okuli nabo enyigirizo zabo zinakayimangira oku Bibliya.—Osome Luka 24:27.
2. Gurhi Abakristu b’okuli bayerekanamwo obuzigire?
Yezu abwira abanafunzi bage ntya: “Muzigirane nk’oku nammuzigire.” (Yowane 15:12) Bici Yezu akagijira byayerekine oku azigire abanafunzi bage? Akagigeza akasanzi haguma nabo, akabaha omurhima, anakag’ibarhabala. Ciru ayemera n’okufâ enyanya zabo. (1 Yowane 3:16) Ko n’oko, Abakristu b’okuli barhaderha kone oku rhushinganine rhuzigirane. Cikone kugerera enderho n’ebijiro byabo banayerekane oku bazigirine.
3. Mukolo guhi Abakristu b’okuli bali bakola?
Yezu ahîre abanafunzi bage omukolo. “Abarhuma mpu baj’iyigiriza ogw’Obwami bwa Nnâmahanga.” (Luka 9:2, Mashi Bible) Arhali ahantu bakagijirira enterekêro hone Abakristu b’omu myaka igana mirhanzi bakagigend’iyigiriza. Cikone bakagigend’iyigiriza abantu ahantu bakabonekana, n’omu nyumpa z’abantu. (Osome Ebijiro by’Entumwa 5:42; 17:17.) Ko n’oko, ene nalyo Abakristu b’okuli nabo banajiyigiriza abantu ngasi hoshi bakanababona. Baba bazigire abantu, co cirhuma bakolesa akasanzi kabo n’emisi yabo lyo babaganirira omwanzi guli omu Bibliya gwakabaha obulangalire n’oburhulirize.—Marko 12:31.
HUMBIRIRA LY’OHUGÛKWA
Olole ebintu byakakurhabala omanye bandi bo Bakristu b’okuli na bandi bo Bakristu b’obunywesi.
4. Banacihangane okuhugûkwa enyigirizo z’Ebibliya
Abakristu b’omu myaka igana mirhanzi balizigire Akanwa ka Nnâmahanga
Bantu baguma baguma baciderha mpu bali Bakristu barhabona oku kuli kwa bulagirire okucihangana okuhugûkwa enyigirizo z’Ebibliya. Olole EVIDEO, na buzinda oganirire er’idoso likulikire.
Gurhi amakanisa gaciderha ga Cikristu gayabirwemwo okuyigiriza enyigirizo za Yezu?
Yezu ayigirizize abantu okuli kuba omu Kanwa ka Nnâmahanga. Osome Yowane 18:37, buzinda oganirire er’idoso:
Bici Yezu adesire oku Abakristu bali “oluhande lw’okuli” bajire?
5. Banayigirize abantu okuli kw’Ebibliya
Abakristu b’omu myaka bakag’iyigiriza abandi omwanzi mwinja
Embere Yezu aje empingu, aha abanafunzi bage omukolo gugendekire gwajirwa kuhika ene. Osome Mateyo 28:19, 20 n’Ebijiro by’Entumwa 1:8, na buzinda oganirire er’idoso:
Omukolo g’okuyigiriza gwakajijirwe kuhika ngahi na mangaci gwanahwe?
6. Banajire ebi bayigiriza
Bici byayemezize n’obwalagale mulume muguma ohamagalwa Tom oku anabwine idîni ly’okuli? Olole EVIDEO, na buzinda oganirire amadoso gakulikire.
Nk’oku wabonaga omu video, bici byarhumaga Tom arhama n’eby’idîni?
Bulya gurhi ayemire n’obwalagale oku anabwine okuli?
Ebijiro by’omuntu byo biyerekana oku ali mwanafunzi wa Yezu, ci arhali kuderha kone oku ali mwanafunzi wage. Osome Mateyo 7:21, na buzinda oganirire er’idoso:
Bici biba bya bulagirire omu masu ga Yezu—ka kuderha kone oku rhuba rhumuyemire erhi bijiro birhu?
7. Banazigirane bone na nnene
Abakristu b’omu myaka na kandi bal’izigirine bone na nnene
K’omanyire oku hali Abakristu bali babidu okufâ enyanya z’ababo Bakristu? Olole EVIDEO, na buzinda oganirire amadoso gakulikire.
Nk’oku wabonaga omu video, bici byarhumaga Mwene wirhu Lloyd aba mubidu okufîra Mwene wirhu Johansson?
K’orhanyize oku oko ajiraga kuyerekine oku ali Mukristu w’okuli?
Osome Yowane 13:34, 35, na buzinda oganirire aga madoso:
Gurhi abanafunzi ba Yezu (Abakristu b’okuli) bashinganine bakajirira abantu bagwerhe irangi ly’omubiri liri lubero n‘elyabo erhi ab’omu bûko burhali bwabo?
Gurhi bakajiramwo ntyo amango g’ivita?
HALI ABANTU BADERHA NTYA: “Abantu baciderha Bakristu bajijire bintu binji bigalugalu, ka hanaba idîni ly’okuli wani?”
Lwandiko luhi wakakolesa ly’orhabala abandi bahugûkwe oku bakamanyamwo Abakristu b’okuli?
KWA BOFOFI
Abakristu b’okuli banashimbe enyigirizo ziba omu Bibliya, banayereke abandi obuzigire na kandi banayigirize okuli kuba omu Bibliya.
Okucikengeza
Bici enyigirizo z’Abakristu b’okuli ziba ziyimangireko?
Borhere buhi rhwakamanyirako Abakristu b’okuli?
Mukolo guhi Abakristu b’okuli bajira?
OCIYIGIRIZE KWA BULÎRI
Ociyigirize binji okubiyerekire ecigusho c’abantu bacihangana okurhumikira enyigirizo za Yezu n’olwiganyo lwage.
Olole ebyarhabire masera muguma abone “omulala g’okunali gw’ekiroho.”
“Walitumia Biblia Ili Kujibu Kila Ulizo!” (Ilabiro ly’Akalalizi, ly’omu lusiku 1/4/2014)
Ociyigirize gurhi Abakristu b’okuli bayerekamwo ababo bemezi obuzigire amango balagirire oku burhabale.
Olole gurhi Abakristu b’omu myaka igana mirhanzi, n’Abakristu ba buno bahikiriza ebintu Yezu aderhaga oku byo bimanyiso by’abanafunzi bage.
“Ni Sifa Gani Njo Zinatambulisha Wakristo wa Kweli?” (Ilabiro ly’Akalalizi, ly’omu lusiku 1/3/2012)