ISOMO LYA 22
Gurhi Wakajira ly’Oganirira Abandi Omwanzi Mwinja?
Okubona oli wayiga okuli, nkaba hali amango wakarhanya ntya: ‘Kwanaba kwinja ngasi muntu amanye ebi!’ Kobinali ntyo, ngasi muntu agwerhe obulagirire bw’okumanya eyo myanzi! Cikone, nkaba wanayoboha okubwira abandi ebi oli wayiga. Olekage rhuganirire ebyakakurhabala ohime obo boba na ntyo oshagalukire okubwira abandi omwanzi mwinja.
1. Gurhi wakaganirira abantu ebi oli wayiga?
Abanafunzi ba Yezu baderha ntya: “Rhurhankahasha okurhaderha ebi rhwâbwine n’ebi rhwâyumvirhe.” (Ebijiro by’Entumwa 4:20) Bakag’ibona ezo nyigirizo z’okuli oku ziri za bulagirire bwenene n’oko kwakabashumya baziganirire abandi. Ka nawe ntyo k’obona ezo nyigirizo? Erhi akaba neci, okalonza obulyo wakaganiriramwo abantu b’omu mulala gwawe n’abîra kw’ebi okaciyigiriza, cikone wanajira ntyo n’obukenge.—Osome Abakolosi 4:6.
Oku wakarhonderamwo ntyo
Amango oli waganira n’abantu b’omulala gwawe, wanaganirira mwanzi mulebe gw’Ebibliya omu kuderha ntya: “Mw’ogu mugobe hali akantu k’okushagalusa nayizire.”
Oshangire olwandiko lw’okuhâna omurhima haguma n’omwîra wawe olwazire erhi ogayire.
Erhi abamukola mweshi bakakudosa okubiyerekire ebi wajijire oku buzinda bw’omugobe, wanabaganiza kw’ebi wayizire omw’ifunzo lyawe ly’Ebibliya, erhi oku ntimanano.
Oyerese abîra bawe esite yirhu y’e Enternete jw.org.
Olalike abandi bakaja okw’ifunzo lyawe ly’Ebibliya erhi obayereke gurhi bakahûna ifunzo ly’Ebibliya oku jw.org.
2. Bulya gurhi kuli kwa bulagirire ocihirireh’omuhigo gw’okuhubiri haguma n’ecigamba?
Abanafunzi ba Yezu barhakagiyigiriza abantu b’omulala gwabo bone erhi bîra babo bone. Yezu “abarhuma babirhi babirhi oku bamushokolere okuja omu ngasi lugo” lyo bajihubiri. (Luka 10:1, NWT) Okujira ntyo, kwarhabire bantu banji bayumve omwanzi mwinja. Na kandi okuhubiri haguma kwarhabala abanafunzi ba Yezu babe n’omwishingo. (Luka 10:17) Ka nawe wanahiga erhi kurhanya gurhi wakarhondera okuhubiri haguma n’ecigamba?
HUMBIRIRA LY’OHUGÛKWA
Oyige bintu bihi byakakurhabala oleke okuyoboha okujira omukolo gw’amahubiri na kandi obe n’obushagaluke omuntu aba nabo erhi ahubiri abandi omwanzi mwinja.
3. Yehova akurhabala
Bantu baguma baguma banasime okujira omukolo gw’amahubiri, cikone banacidose ntya: Gurhi abantu baja baderha hano babona ndi omu mahubiri? Ka bayishikayumvirhiza omwanzi nababwira?
K’onayumve oboba bw’okubwira abandi kw’ebi oli wayiga? Bulya gurhi oyumva oboba, erhi bulya gurhi orhabuyumva?
Olole EVIDEO, na buzinda oganirire idoso likulikire.
Bici byarhabire aba Bahamirizi ba Yehova baciri misole baleke okuyoboha okuhubiri?
Osome Izaya 41:10, na buzinda oganirire er’idoso:
Gurhi isala lyakakurhabalamwo amango oyobohire okuhubiri?
K’omanyire?
Bahamirizi ba Yehova banji bakagirhanya oku barhakahash’iganirira abandi omwanzi mwinja. Kwa lwiganyo, Sergey, akagicibona oku ali wabusha bwenene, anagwerhe amazibu g’okuganira haguma n’abandi. Buzinda arhondera okuyiga Ebibliya. Adesire ntya: “Ciru akaba nagwerhe oboba, narhondera okuganirira abandi kw’ebi nakag’iyiga. Nasomerwa bwenene okubona oku okuhubiri abandi kwantabire ntacikag’iyoboha. Na kandi kwazibuhya obuyemere bwani.”
4. Obe wa bukenge
WEmbere ohubiri muntu mulebe, wanarhangirhanya ebi wamubwira n’omu njira nci wabiderha. Osome 2 Timoteyo 2:24 na 1 Petro 3:15, na buzinda oganirire aga madoso:
Gurhi wakakolesamwo aga mandiko amango oli waganirira abandi kw’ebi wayizire omu Bibliya?
Hali bantu baguma baguma b’omu mulala gwawe n’abîra bawe bakalahira ebi oli wabahubiri. Gurhi wakajira? Na gurhi orhashinganini ojire?
Bulya gurhi kuli kwa bulagirire bwenene okukolesa amadoso omu njira y’obukenge ahali h’okubaseza bayemere ebi oyemire?
5. Okuganirira abandi omwanzi mwinja kunalerhe omwishingo
Yehova ye wahâga Yezu omukolo g’okuhubiri omwanzi mwinja. Gurhi Yezu abwine ogo mukolo? Osome Yowane 4:34, na buzinda oganirire aga madoso:
Okulya ebiryo binja kunarhume rhwaba n’amagala minja na kandi kunarhume rhwaba n’omwishingo. Bulya gurhi Yezu aderhaga oku okujira obulonza bwa Nnâmahanga, kwa lwiganyo nk’okuhubiri omwanzi mwinja, kuli nka kulya ebiryo?
Mwishingo gwa gurhi orhanyize omuntu akaba nago erhi akakaganirira abandi omwanzi mwinja?
Amahano gakakurhabala
Amango g’entimanano y’omu kagarhi k’omugobe, okalola njira zihi nguma nguma wakakarhondezamwo enganîro.
Ociyandikise oku liste y’abanafunzi b’ebipindi lyo nawe okabigeza. Ebipindi byanakurhabala ociyumve oli mubidu okuhubiri abandi na ntyo orhacikayumve oboba.
Okolese ebigabi biri mw’ezi nganîro bidesire “Bantu Banji Banakaderha Ntya,” na “Hali Omuntu Wakadosa Ntya” ly’ocirheganya okushuza oku madoso bantu banji bakadosa.
HALI OMUNTU WAKADOSA NTYA: “Ka hali emyanzi mihyahya warhubwira?”
Gurhi wakakolesamwo obo bulyo ly’oganirira oyo muntu okubiyerekire ebi wayizire omw’ifunzo lyawe ly’Ebibliya?
KWA BOFOFI
Okuganirira abandi omwanzi mwinja kunalerhe omwishingo. N’okurhondera ogo mukolo kuba kulembu bwenene kulusha oku okarhanya gwakaba guyosire.
Okucikengeza
Bulya gurhi kuli kwa bulagirire okuganirira abandi omwanzi mwinja?
Gurhi wakajiramwo ntyo n’obukenge?
Gurhi wakahimamw’oboba bw’okujira omukolo gw’amahubiri?
OCIYIGIRIZE KWA BULÎRI
Olole njira ini wakakolesa ly’oganirira abandi omwanzi mwinja omu kukolesa akarte ka jw.org.
Olabe morhere ani gakakurhabala oganirire abandi omwanzi mwinja.
“Kw’Oli Mubidu Okuba Mudubi w’Abantu?” (Ilabiro ly’Akalalizi, ly’Omwezi gwa 9, 2020)
Olole gurhi olwiganyo luli omu Bibliya lwakarhuhamwo oburhwali bw’okuganirira abandi omwanzi mwinja ciru akaba rhuciri bana.
Olole gurhi wakahubirimw’abantu b’omulala gwawe barhasag’irhondera okuyiga lugenda Yehova.