ISOMO LYA 48
Ocishoge Abîra Bawe Bwinja
Abîra binja banashagaluke haguma na nirhu omu mango minja, na kandi banarhurhabale omu mango g’amazibu. Cikone Ebibliya erhuhanwire oku arhali ngasi muntu oba mwîra mwinja. Gurhigi wakacishoga abîra binja? Rhuganirire aga madoso gakulikire.
1. Bici abîra ocishozire bakakushumya okujira?
Kanji-kanji rhunakalonza okushusha abantu rhuba rhukomerine nabo. Banarhushumya okujira ebinja erhi bibi. Ntyo ko binaba, rhube rhunakabonana nabo busu oku busu erhi rhube rhunakaganira nabo kugerera e Enternete. Nk’oku Ebibliya edesire, “okômerana n’ow’obumanye naye anabe wundi, cikwone okômera abahwinja kusherera asherera.” (Emigani 13:20, Mashi Bible) Abîra bazigira Yehova n’okumukolera banakurhabala ogendekere waba mwîra wa Yehova n’okurhôla emihigo minja. Cikone abîra barhazigiri Yehova banarhuma nawe waleka okumuzigira. Co cirhumire Ebibliya erhuhanwire oku rhucishoge abîra birhu bwinja! Erhi abîra birhu bakaba bantu bazigire Yehova, rhwanarhabalana na ntyo rhweshi rhwanagendekera rhwamuzigira. ‘Rhwanagendekera rhwahirana omurhima n’okuyubakana.’—1 Abatesalonika 5:11, NWT.
2. Gurhi Yehova akaciyumva lugenda abîra rhucishozire?
Yehova arhacishoga abîra bage ntya-ntya. Ebibliya edesire oku “abantu nkana [bikubagirwa] bwo arhonya.” (Emigani 3:32) Gurhigi Yehova akaciyumva erhi rhwakacishoga abîra barhamuzigiri? Anagaya bwenene! (Osome Yakobo 4:4.) Cikone, Yehova anashagaluka bwenene erhi rhwakaleka okukômerana n’abantu babi n’okujira obwîra haguma naye na haguma na bala bamuzigira.—Ennanga 15:1-4.
HUMBIRIRA LY’OHUGÛKWA
Olole bulya gurhi oku ocishozire abîra kuli kwa bulagirire, olole na gurhi wakabamwo n’abîra bakakurhabala omu kalamo.
3. Oyake okukômerana n’abîra babi
Abîra babi bali bala bantu barhazigira Yehova n’amarhegeko gage n’amakanuni gage. Olole EVIDEO, na buzinda oganirire er’idoso likulikire.
Gurhi rhwakahikira okukômera abantu babi buzira kumanya?
Osome 1 Abakorinti 15:33, na buzinda oganirire aga madoso:
Muntu ohi wakakômerana naye wakaba mwîra wawe mubi? Bulya gurhi?
Osome Ennanga 119:63, na buzinda oganirire er’idoso:
Morhere maci wakalonza omwîra wawe abe nago?
Ilehe liguma libozire linaboze agandi goshi. Gurhi abîra babi bakakushumya ojire ebintu bibi?
4. Abantu rhurhayumanini nabo banaba bîra birhu binja
Ebibliya eganirire Daudi na Yonatani, balume babirhi bal’ilamire omu ishanja ly’aba Israheli ba mîra. Barhal’iyumanine oku myaka barhanal’ilamire kanga kaguma; cikone bombi bajira obwîra bwa kidole na lupeta. Osome 1 Samweli 18:1, na buzinda oganirire er’idoso:
Bulya gurhi birhahûnyiri mpu abîra birhu bakaba bala rhuyumanine nabo erhi aba rhwakuliraga haguma nabo bone?
Osome Abaroma 1:11, 12, na buzinda oganirire er’idoso:
Gurhi abîra bazigira Yehova bakahânana omurhima?
Mw’eyi video, olole gurhi mwene wirhu muguma ociri musole abonaga abîra ahantu arhal’irhanyize oku anababona. Olole EVIDEO, na buzinda oganirire aga madoso gakulikire.
Nk’oku obwine mw’eyo video, bulya gurhi ababusi ba Akil bakagicidosa binji okubiyerekire abîra bage b’emasomo?
Bici byalirhumire azigira abo bîra bage?
Gurhi ajijire ly’arhacikag’iciyumva kahumba?
5. Bici wakajira ly’oba n’abîra binja
Olole ebi wakajira ly’oba n’abîra binja, na gurhi wakajira ly’oba mwîra mwinja. Olole EVIDEO.
Osome Emigani 18:24 na 27:17, na bunzinda oganirire aga madoso:
Gurhi abîra binja barhabalana?
K’ojira omwîra wa ntyo? Akaba orhamugwerhi, gurhi wakajira ly’oba naye?
Osome Abafilipi 2:4, na buzinda oganirire er’idoso:
Ly’oba n’abîra binja, oshinganine nawe wene orhangiba mwîra mwinja. Gurhi wakajira ly’oba mwîra mwinja?
Ly’omuntu aba n’abîra binja, ashinganine yene arhangiba mwîra mwinja
HALI ABANTU BADERHA NTYA: “Kuli kwinja okuba mwîra wa ngasi muntu ciru akaba ayosire gurhi, ahali h’okubêra buzira mwîra.”
Gurhi nawe orhanya?
KWA BOFOFI
Erhi rhucishoga abîra binja rhunashagaluse Yehova n’okujira ntyo kunarhulerhere obunguke.
Okucikengeza
Bulya gurhi Yehova aba alonzize rhucishoge abîra birhu bwinja?
Bîra ba gurhi rhushinganine rhuyake?
Gurhi wakajiramw’obwîra bwinja haguma n’abantu binja ba ngasi lubero?
OCIYIGIRIZE KWA BULÎRI
Olole gurhi abîra binja bakakurhabala amango g’amazibu.
Olole ebi wakajira ly’oba n’abîra binja.
Bici oshinganine okuhugûkwa lugenda okujira obwîra n’abantu kugerera e Enternete?
Okolese n’Obwenge Esite z’e Enternete z’Okuganira n’Abandi (4:12)
Omu mwanzi gudesire “Nilitamani Sana Kuwa na Baba,” olole ebyarhumire mulume muguma acibilabiriza bwinja bantu bahi aba akômerine nabo.
“Biblia Inabadilisha Maisha ya Watu” (Ilabiro ly’Akalalizi, ly’omu lusiku 1/4/2012)