ISOMO LYA 52
Bulya Gurhi Emyambalo Yirhu n’oku Rhuciyinjihya Biba bya Bulagirire?
Ngasi muguma wirhu ajira ebi aba azigire okubiyerekire emyambalo n’okuciyinjihya. Erhi rhwakakulikira makanuni malebe na malembu okuhugûkwa gali omu Bibliya rhurhakakayambala erhi kuciyinjihya omu njira erhushagalwire rhwenene, cikone rhwanakajira ntyo omu njira eshagalwire Yehova. Rhuganirire makanuni maguma maguma ga muli ago.
1. Makanuni gahi rhwakarhanyako nka rhukola rhwacishoga oku rhwayambala n’oku rhwaciyinjihya?
Rhushinganine rhukacishoga “emyambalo eshinganine, ya lugero na ya bwenge bwinja.” Rhushinganine rhukaca ngasi mango ly’abandi babona oku ‘rhucishwekerire kuli Nnâmahanga.’ (1 Timoteyo 2:9, 10, NWT) Rhuganirire aga makanuni ani: (1) Emyambalo yirhu ekwanine ebe “eshinganine.” Nk’oku onabona oku ntimanano, abakozi ba Yehova barhayambala n’okuciyinjihya omu njira eshushine, cikone emishangi n’okuciyinjihya kwirhu binayerekane oku rhukenzire Nnâmahanga rhuli rhwaharamya. (2) Okuyambala n’“olugero” kuhugwîre oku rhushinganine rhuyake emishangi y’okuzusa irala ly’okujira ecijiro c’obuhya erhi ya ndolako. (3) Rhunayerekane oku rhugwerhe “obwenge bwinja” erhi rhuyaka okuhêka nk’oku igulu linahêsire okubiyerekire okuyambala n’okuciyinjihya. (4) Oku rhuyambala n’oku rhuciyinjihya kushinganine kuyerekane oku ‘rhucishwekerire kuli Nnâmahanga,’ k’okuderha oku rhushinganine rhuyerese abandi oku rhunaharamye Nnâmahanga w’okuli.—1 Abakorinti 10:31.
2. Bulya gurhi rhushinganine rhurhanyize bene wirhu na bali birhu amango rhwacishoga ebi rhwayambala n’oku rhwaciyinjihya?
Rhugwerhe oluhûma lw’okucishoga ebi rhwayambala n’oku rhwaciyinjihya, ciru akaba ntyo rhushinganine rhurhanye lugenda oku abandi baciyumva kuyerekera emishangi yirhu erhi oku rhuciyinjihize. Rhushinganine rhuyake okusarhaza abandi. Na ntyo ngasi muguma wirhu ashinganine ‘asimise omulungu wage okubunguke bwage, ly’amuyubaka.’—Osome Abaroma 15:1, 2, NWT.
3. Gurhi emyambalo yirhu n’oku rhuciyinjihya yakashumya abandi bacilunge haguma na nirhu omu nterekêro y’okuli?
Rhunacihangane okuyambala bwinja ngasi mango, cikone rhunayambale bwinja bwenene amango rhwaja oku ntimanano n’oku mahubiri. Rhurhalonza abantu baje barhulolako ahali h’okuyumvirhiza omwanzi rhubadwirhire. Lubero n’oko, rhusima oku rhuyambire kubarhabale bayige okuli lugenda Nnâmahanga kunarhume “bakakenga enyigirizo z’Omuciza wirhu.”—Tito 2:10.
HUMBIRIRA LY’OHUGÛKWA
Olole gurhi rhwakamanyamwo n’obwalagale erhi emyambalo yirhu n’oku rhuciyinjihize kushinganine Abakristu b’okuli.
Oku rhuyambala n’okurhuciyinjihya kunayerekane erhi rhuba rhukenzire abakulu erhi nanga. Ciru akaba akandalala kirhu ko Yehova alola, iranga lirhu nalyo lishinganine liyerekane oku kobinali rhuba rhumukenzire
4. Erhi rhuyambala n’erhi rhuciyinjihya bwinja, rhunayerekane oku rhukenzire Yehova
Cirhumire cihi cikulu cirhushumya rhurhanye bwenene lugenda oku rhuyambala n’okurhuciyinjihya? Osome Ennanga 47:2, na buzinda oganirire aga madoso:
Gurhi okubona oku rhuba barhumwa ba Yehova kwakashumya enjira yirhu y’okuyambala?
K’orhanyize oku kuli kwa bulagirire rhukalola gurhi rhuyambire amango rhwaja omu mahubiri erhi oku ntimanano? Bulya gurhi orhanyize ntyo, erhi bulya gurhi olahire?
5. Gurhi rhwakakacishoga bwinja emyambalo yirhu n’oku rhwaciyinjihya?
Emishangi yirhu ebe y’ibeyi likali erhi nanga, eshinganine ekaba ecîre enapatine n’akanga rhwakaba rhulimo. Osome 1 Abakorinti 10:24 na 1 Timoteyo 2:9, 10. Buzinda, oganirire ebirhumire rhurhashinganini rhukayambala emishangi . . .
ya busha-busha erhi erharhuyeniri.
esezize omubiri bwenene, erhi eyerekine ebirumbu by’omubiri, erhi eri yazusa irala ly’okujira ecijiro c’obuhya.
Ciru akaba Abakristu barhaba idako ly’Irhegeko lya Musa, cikone ebiri mw’eryo Irhegeko byanabarhabala bamanye entanya za Yehova. Osome Olushika 22:5, na buzinda oganirire er’idoso:
Bulya gurhi rhushinganine rhuyake emishangi n’eby’okuciyinjihya byakarhuma omulume abonekana nka mukazi erhi omukazi abonekane nka mulume?
Osome 1 Abakorinti 10:32, 33 na 1 Yowane 2:15, 16, na buzinda oganirire aga madoso:
Bulya gurhi rhushinganine rhulabirize erhi oku rhuli rhwayambala n’oku rhuli rhwaciyinjihya kuli kwasarhaza bene wirhu b’omu cigamba erhi abantu b’omu eneo?
Gurhi abantu balugiyambala n’okuciyinjihya emunda olama?
K’orhanyize oku hali okuyambala n’okuciyinjihya kurhashinganini Abakristu? Bulya gurhi odesire ntyo, erhi bulya gurhi olahire?
Rhwanayambala n’okuciyinjihya omu njira ziri lubero zishagalusize Yehova
HALI ABANTU BADERHA NTYA: “Ngwerhe oluhûma l’okuyambala nk’oku ndonzize.”
Ka nawe ntyo k’orhanya? Bulya gurhi neci, erhi bulya gurhi nanga?
KWA BOFOFI
Erhi rhucishoga bwinja emishangi rhwayambala n’oku rhwaciyinjihya, rhunayerekane oku rhukenzire Yehova n’abandi.
Okucikengeza
Bulya gurhi Yehova aba alonzize rhucishoge bwinja ebi rhwayambala n’oku rhwaciyinjihya?
Makanuni gahi maguma na maguma gashinganine garhushumye lyo rhurhôla emihigo minja okubiyerekire oku rhwayambala n’oku rhwaciyinjihya?
Gurhi oku rhuyambala n’oku rhuciyinjihya kwakarhuma abandi babona enterekêro y’okuli?
OCIYIGIRIZE KWA BULÎRI
Olole entanya abandi bakaba nazo erhi bakalola oku oyambirhe n’oku ociyinjihize.
Olole bulya gurhi oshinganine orhangirhanya bwenene embere orhôle omuhigo gw’okucishâka-shaka omubiri (tatouage).
“Bici Ebibliya Edesire Lugenda Okucishâka-shaka Omubiri erhi Tatuwaje?” (Mwanzi guli oku jw.org)
Olole agandi makanuni gakarhulongoza lyo rhurhôla emihigo minja.
“Muvalio Wako Unamutukuza Mungu?” (Ilabiro ly’Akalalizi, ly’Omwezi 9, 2016)
Gurhi mukazi muguma mwirhohye ahikiremwo aha aba n’entanya z’olugero okubiyerekire oku abandi bayambala n’oku baciyinjihya?
“Namna ya Kuvala na Kujipamba ya Wengine Ilikuwa Nanikwaza” (Amuka!, y’omu nsiku 22/12/2003)