ISOMO LYA 53
Ocishoge eby’Okucishagalusa Bisimisize Yehova
Yehova aba “Nnâmahanga w’obushagaluke.” (1 Timoteyo 1:11, NWT) Aba alonzize nirhu rhube n’omwishingo rhunashagalukire akalamo. Anashagaluke erhi rhucihiriraho akasanzi k’okucishagalusa enyuma z’okuyusa kwajira emikolo. Mw’er’isomo, rhwabona gurhi rhwakacishagalusa omu njira zishinganine zinasimisize Yehova.
1. Bici rhushinganine rhukakengera amango rhukola rhwacishoga eby’okucishagalusa?
Bici osima okucishagalusamwo? Bantu baguma na baguma banakashagalukira okugeza akasanzi kabo k’okurhamûka ahamwababwe, lyo basoma ecitabu, lyo bayumvirhiza omuziki, lyo balola efilime erhi lyo baja oku Enternete. Abandi banashagalukire okugeza akasanzi haguma n’abîra babo, lyo balambagirira hantu halebe, bajiyoga omu nyanja, erhi lyo basharha micezo milebe. Ngasi muntu ajira ebi asima okucishagalusa nabyo. Cikone ngasi muntu ashinganine amanyirire erhi ebyo by’okucishagalusa ‘bisimisize Nyakasane [Yehova, NWT].’ (Abefezi 5:10) Kuli kwa bulagirire bwenene rhuhugûkwe ntyo bulya bintu binji by’okucishagalusa bya muli gano mango girhu, biyunjwiremo ebintu Yehova aba ashombire, kwa lwiganyo, nk’obuminya, obugonyi, n’obukurungu. (Osome Ennanga 11:5.) Bici byakarhurhabala lyo rhucishoga bwinja eby’okucishagalusa?
Erhi rhwakacishoga abîra bazigira Yehova, banarhurhabala rhukacishoga bwinja eby’okucishagalusa. Nk’oku rhwayigaga omw’isomo liguma lyali embere ly’eri, “okômerana n’ow’obumanye naye anabe wundi.” Cikone, okômera okugeza akasanzi haguma n’abantu barhasimiri amarhegeko ga Nnâmahanga “kusherera asherera.”—Emigani 13:20, Mashi Bible.
2. Bulya gurhi kuli kwa bulagirire rhukarhanya oku kasanzi rhuli rhwageza omu by’okucishagalusa?
Ciru akaba eby’okucishagalusa rhwacishozire biri binja, rhushinganine rhube masu lyo birhakagirhurhôla kasanzi kanji. Erhi rhwakakageza kasanzi kanji omu by’okucishagalusa, kwanarhuma rhwabula akasanzi k’okujira ebintu by’obulagirire bwenene. Ebibliya erhubwizire oku rhukolese “bwinja akasanzi [kirhu].”—Osome Abefezi 5:15, 16, NWT.
HUMBIRIRA LY’OHUGÛKWA
Oyige gurhi wakakacishoga bwinja eby’okucishagalusa.
3. Oyake okucishagalusa n’ebintu bibi
Bulya gurhi rhushinganine rhube masu amango rhukola rhwacishoga eby’okucishagalusa? Olole EVIDEO, na buzinda oganirire aga madoso gakulikire.
Bintu bihi byâli omu micezo y’okucishagalusa y’Abaroma ba mîra biri omu bintu binji by’okucishagalusa ene?
Nk’oku obwine mw’eyo video, bici Danny ayizire okubiyerekire eby’okucishagalusa?
Osome Abaroma 12:9, na buzinda oganirire er’idoso:
Gurhi ogo mulongo gwakakurhabala ocishoge bwinja eby’okucishagalusa?
Bintu bihi biguma na biguma Yehova aba ashombire? Osome Emigani 6:16, 17 n’Abagalasiya 5:19-21. Hano oyusa wasoma ngasi lwandiko, oganirire er’idoso:
Bintu bihi biganirirwe mw’olo lwandiko biri byabonekana ene omu bintu by’okucishagalusa?
Gurhi Wakacishoga EbyʼOkucishagalulamo nʼObwenge
Ocidose ntya:
Bintu bihi? K’omu bintu ncishagalusa nabyo, muba ebi Yehova ashomba?
Mangaci? K’eby’okucishagalusa binakantôla akasanzi nakajijiremo ebintu by’obulagirire bwenene?
Bandi naba nabo? K’eby’okucishagalusa binakarhuma nageza kasanzi kanji haguma n’abantu barhazigira Yehova?
Kuba kwa bulagirire bwenene okucilanga lyo rhurhagirhogera omu nyamanja. Co cirhumire nka rhwakarhanya oku kantu kalebe k’okucishagalusa karhali kinja, rhushinganine rhukayake
4. Okolese akasanzi kawe n’obwenge
Olole EVIDEO, na buzinda oganirire idoso likulikire.
Ciru akaba mwene wirhu oganirirwe mw’eyi video arhakagilola evideo mbi, gurhi akolesize kubi akasanzi kage k’okurhamuka?
Osome Abafilipi 1:10, na buzinda oganirire er’idoso:
Gurhi olu lwandiko lwakarhurhabala okurhanya oku kasanzi rhugeza omu by’okucishagalusa?
5. Ocishoge eby’okucishagalusa binja
Ciru akaba hali bintu bilebe by’okucishagalusa bisimisa Yehova, haligi n’ebindi bintu binji by’okucishagalusa birhamusimisa. Osome Omuhanûzi 8:15 n’Abafilipi 4:8, na buzinda oganirire er’idoso:
Bintu bihi binja by’okucishagalusa ozigira?
Wanacishagalusa n’ebintu binja
HALI ABANTU BADERHA NTYA: “Okucishagalusa n’ebintu birimo eby’obuminya, eby’obugonyi, n’eby’obukurungu kurhali kubi, bulya ciru nakabilola ntakabijira.”
Gurhi nawe orhanyize?
KWA BOFOFI
Yehova aba alonzize rhucishoge rhunashagalukire ebintu binja by’okucishagalusa.
Okucikengeza
Bintu bihi by’okucishagalusa Abakristu boshi bashinganine bayake?
Bulya gurhi rhushinganine rhurhanye lugenda akasanzi rhugeza omu by’okucishagalusa?
Bulya gurhi olonzize okucishoga eby’okucishagalusa bisimisa Yehova?
OCIYIGIRIZE KWA BULÎRI
Olole ndi oshinganine arhurhôlere emihigo okubiyerekire eby’okucishagalusa.
Olole gurhi wakacishoga bwinja ebintu by’okucishagalusa.
“Unajifurahishaka na Mambo Yenye Inafaa?” (Ilabiro ly’Akalalizi, ly’omu nsiku 15/10/2011)
Omu mwanzi gudesire “Nilifikia Kuachana na Ubaguzi,” olole bulya gurhi mulume muguma ahikire aha akacishoga bwinja eby’okucishagalusa.
“Biblia Inabadilisha Maisha ya Watu” (Ilabiro ly’Akalalizi, ly’omu lusiku 1/2/2010)
Olole gurhi muzire muguma ahikire aha arhôla omuhigo mwinja lugenda eby’okucishagalusa birimo ebintu by’obukurungu.