ENYUSHÛLO C
Oku Wakalongozamwo Amafunzo g’Ebibliya Kugerera Ecitabu Oshagalukire Akalamo Ensiku n’Amango!
Bene wirhu bashenzire bwenene banarhanya bwenene lugenda emyanzi eshinganine eje omu citabu Oshagalukire Akalamo Ensiku n’Amango! Ly’oyunguka bwenene n’eco citabu, okolese enjira ekulikire amango oli walongoza amafunzo g’Ebibliya.
Embere z’ifunzo
1. Ocirheganye bwinja. Amango oli wacirheganya, orhanye lugenda amalagirire g’omwanafunzi wawe, akanga kage, n’ebi aba ayemire. Orhanye oku bintu byakaba bizibu kuli ye okuhugûkwa erhi okukolesa. Orhanye gurhi emyanzi eri omu higabi “Ociyigirize kwa Bulîri” yakarhabala omwanafunzi wawe, onanabe mubidu okukolesa ehyo higabi amango g’ifunzo kushimbana n’obulagirire.
Amango g’ifunzo
2. Mukashenga embere z’okurhondera ifunzo n’enyuma z’okuyusa erhi akaba omwanafunzi wawe ayemire.
3. Oyake okuderha bintu binji. Osegeze obwenge oku myanzi eri omu citabu, onaleke omwanafunzi ahâne entanya zage.
4. Amango mwamarhondera ecigabi cihyahya, osome ebiri mw’eco cigabi onaganirire kwa bofofi ebirhwe by’amasomo gali mw’eco cigabi.
5. Amango mwamayusa ecigabi coshi, okolese ehigabi okucikengeza ly’orhabala omwanafunzi wawe akengere enyigirizo mwayizire mw’eco cigabi.
6. Amango muli mwayiga ngasi isomo haguma n’omwanafunzi wawe:
Musome ebifungo.
Musome amandiko goshi gashokolirwe n’oluderho “Osome.”
Musome agandi mandiko gali mw’er’isomo erhi akaba hali obulagirire bw’okujira ntyo.
Mulole ngasi video zishokolirwe n’oluderho “Olole” (erhi akaba mwanazipata).
Odose omwanafunzi ngasi idoso.
Obwire omwanafunzi wawe alole enfoto ziri omu higabi “Humbirira ly’Ohugûkwa,” onamubwire aziganirire.
Okolese ecisanduku “Omuhigo Gwani” ly’orhabala omwanafunzi wawe alabirize amajambere gage g’ekiroho. Nkaba wanamuha omurhima ahikirize omuhigo guli mw’eco cisanduku, acihirire ho eyindi mihigo, erhi ajire ebyo byombi.
Odose omwanafunzi wawe erhi anashagalukire myanzi milebe erhi video ndebe z’omu higabi “Ociyigirize kwa Bulîri” amango anakag’irheganya isomo.
Mucihangane okukayusa isomo oku ngasi ifunzo.
Enyuma z’ifunzo
7. Ogendekere warhanya lugenda omwanafunzi wawe. Oshenge Yehova agishe amajambere g’omwanafunzi wawe onamushenge akuhe obwenge ly’omanya gurhi wakamurhabalamwo.