Mwe Misole, Mugendekere Mwajira Amajambere Enyuma z’Okubatizibwa

1. Bintu binja bihi Bakristu banji baciri misole bamakahikiriza?

NGASI mwaka, ebihumbi by’Abakristu baciri misole binabatizibwe. Ka nawe wabatizibwe? Akaba neci, bene winyu na bali binyu b’ekiroho bakushagalukire, na Yehova naye akushagalukire! (Mig. 27:11) Orhanye hisungunu oku bintu binji binja wamakahikiriza. Kwa lwiganyo, nkaba wamazire myaka minji oli wayiga Ebibliya n’obushiru. Ebi wayizire byakuyemezize n’obwalagale oku Ebibliya kaba Kanwa ka Nnâmahanga. Na kandi, wahikire aha wamanya n’okuzigira Owayandikisagya eco citabu citagatifu. Obuzigire bwawe kuli Yehova bwayushuka n’oko kwarhuma wacihâna emwage n’okubatizibwa. Warhôzire omuhigo mwinja bwenene!

2. Bici rhwaganirira mw’eci cigabi?

² Embere obatizibwe, buzira karhinda obuyemere bwawe bwarhangwirwe omu njira nyinji. Cikone oku wagendekera wakula, wabuganana n’agandi marhangulo. Shetani ajira okwage koshi ly’akushumya oleke okuzigira Yehova n’okumukolera. (Ef. 4:14) Orhayemeraga ebyo bikuhikire. Bici byakakurhabala ly’ogendekera waba mwishwekerezi kuli Yehova n’okuhikiriza eciragane wamuhâga c’okumukolera? Okwanine ogendekere wajira amajambere, k’okuderha ‘ocîseze ohikire’ okuba Mukristu okuzire kiroho. (Hb. 6:1, Mashi Bible) Cikone, gurhi wakajiramwo ntyo? Oko ko rhwaganirira mw’eci cigabi.

BICI WAKAJIRA LY’OHIKIRA OKUBA MUKRISTU OKUZIRE KIROHO?

3. Bici Abakristu boshi bashinganine bajire enyuma z’okubatizibwa?

³ Enyuma z’okubatizibwa, rhweshi rhushinganine rhugendekere okurhumikira ihano entumwa Paolo yahâga ababo Bakristu b’omu Efezi. Abahîre omurhima oku bahikire okuba Bakristu “bakola bakuzire.” (Ef. 4:13, Mashi Bible) Kuli kuderha oku bal’ishinganine ‘bagendekere bajira amajambere.’ Rhwanahugûkwa ebi Paolo alonzagya okuderha erhi ashushanya okukula kw’ekiroho n’oku omwana akula. Ababusi bagwerhe omwana w’akabonjo banamuzigire n’okucidinira ye. Cikone oyo mwana arhagendekera aba kabonjo ensiku zoshi. Erhi hagera nsiku, aba ashinganine aleke “eby’eburho.” (1 Kr. 13:11) Abakristu nabo ko n’oko. Enyuma z’okubatizibwa, bashinganine bagendekere bajira amajambere. Rhuganirirage ebyakarhurhabala lyo rhujira ntyo.

4. Borhere buhi bwakarhurhabala lyo rhujiira amajambere g’ekiroho? Ohugûle. (Abafilipi 1:9)

⁴ Oyushule obuzigire bwawe kuli Yehova. Kobinali, okola oba ozigire Yehova bwenene. Cikone, wanayushula obuzigire bwawe kuli ye. Gurhi wakajiramwo ntyo? Paolo aganirire njira nguma omu Abafilipi 1:9. (Osome.) Paolo asalira oku obuzigire bw’Abafilipi “buyushûke ngasi lusiku.” Kuli kuderha oku rhwanayushula obuzigire bwirhu kuli Yehova. Rhwanajira ntyo omu kuba n’“obumanye [burhalimwo magosa] n’oburhimanya [bwinjinja].” Oku rhwagendekera rhwamanya Yehova, ko n’obuzigire bwirhu kuli ye bwagendekera bwayushuka ko rhwanagendekera rhwashagalukira amorhere gage n’oku ajira ebintu. Irala lirhu ly’okulonza okumushagalusa lyanayushuka, n’okurhalonza okujira akantu koshi-koshi kakamugayisa. Rhwanajira okwirhu koshi lyo rhumanya obulonza bwage buli buhi na gurhi rhwakajiramwo obo bulonza bwage.

5-6. Gurhi rhwakayushulamwo obuzigire bwirhu kuli Yehova? Ohugûle.

⁵ Obuzigire bwirhu kuli Yehova bwanayushuka erhi rhwakahikira aha rhwamanya Omugala bwinja, bulya ayerekine n’obwimana amorhere g’Ishe. (Hb. 1:3) Enjira nyinja y’okumanya Yezu kuli kuyiga emyanzi eri omu bitabu bini by’e Injili. Akaba orhasag’iba n’enkomêdu nyinja y’okusoma Ebibliya ngasi lusiku, wanarhonderera kw’ebyo bitabu buno. Amango oli wasoma emyanzi eganirire Yezu, okasegeza obwenge oku morhere gage. Abantu barhakag’iyoboha okumuyegera; enyanya z’obuzigire bwage abagalira abana barho omu maboko gage. (Mk. 10:13-16) Abanafunzi bage bakag’iciyumva bwinja omu kuba haguma naye; barhakag’iyoboha okumubwira entanya zabo. (Mt. 16:22) Lugenda oko, Yezu ayizire olwiganyo lw’Ishe w’omu mpingu. Yehova naye aba wa kuyegerwa buzira mazibu. Rhwanamuyegera kugerera isala. Amango rhuli rhwasalira, rhwanamubwira ngasi kantu karhuli emurhima. Rhunayemire n’obwalagale oku arhakarhutumuza lugenda oko. Aba arhuzigire ananarhushibirire.​—1 Pt. 5:7.

⁶ Yezu akag’iyumviza abantu obwonjo. Entumwa Mateyo edesire ntya: “Erhi abona orhutu rhw’abantu, obwonjo bwamugwarha, bulya bâli bahugalire banashiramire [kugongôlwa k’oluhu, NWT] nka buso burhagwerhi mungere.” (Mt. 9:36) Gurhi Yehova naye aciyumva? Yezu adesire ntya: “Burhali bulonza bwa Sho w’empingu mpu muguma muli aba barhorho ahere.” (Mt. 18:14) Oko kurhuhire omurhima bwenene! Erhi rhwakahikira aha rhwamanya Yezu bwinja, obuzigire bwirhu kuli Yehova bwanayushuka.

7. Gurhi okugeza akasanzi haguma n’Abakristu bakuzire kiroho kwakakurhabalamwo?

⁷ Kandi, okumanya bwinja bene winyu na bali binyu bakuzire kiroho omu cigamba cinyu, kwanakurhabala oyushule obuzigire bwawe n’okuba Mukristu okuzire kiroho. Okalaba omwishingo bagwerhe, barhaciyunjuza lugenda omuhigo barhôzire gw’okukolera Yehova. Okababwira bakuganirire ebi bacibwinire omu mukolo gwa Yehova. Amango bihûnyire orhôle omuhigo gw’obulagirire, okabahûna amahano. Okakengera oku, ‘obwôloloke buba omu kujira bahanûzi [banji].’​—Mig. 11:14.

8. Gurhi wakajira erhi akaba ogwerhe akarhinda okubiyerekire enyigirizo z’Ebibliya?

⁸ Oyuse akarhinda kawe. Nk’oku rhwabonaga omu cifungo ca 2, Shetani ajira okwage koshi ly’akuhanza okujira amajambere g’ekiroho. Njira nguma akajiramwo ntyo kuli kukulerhera akarhinda omu bwenge lugenda nyigirizo nguma na nguma z’Ebibliya. Kwa lwiganyo, nkaba hali abanakubwire oku Nnâmahanga arhalemaga ebintu cikone byajire byahinduka-hinduka. Amango wali murho, nkaba orharhanyagya kw’ezo nyigirizo, cikone buno okola mukulu nkaba oli waziyigirizibwa ebwa masomo. Ebi abalimu bawe baderha lugenda ezo nyigirizo z’amageuzi byanabonekana nka bipatine n’obwenge binali by’okuli. Cikone nkaba barhasag’irhanya bwenene oku bintu birhuyemezize oku haba Omulemi. Okengere akanuni kali omu lwandiko lw’Emigani 18:17 kadesire ntya: “Orhangîderha aha ngombe ye bahâ n’olubanja, erhi owabo ayisha balushubiremwo.” Ahali h’okuyemera duba-duba oku ebi wayigirizibwe ebwa masomo biri by’okuli, oshinganine oyige bwinja enyigirizo ziri omu Bibliya, Kanwa ka Nnâmahanga. Ojire obusagasi omu bicapo birhu. Wanaganiza bene wirhu na bali birhu bal’iyemire ezo nyigirizo z’amageuzi. Obadose bici byabayemezize n’obwalagale oku haba Omulemi orhuzigira. Ezo nganîro zanakurhabala obone ebyakakuyemeza oku haba Omulemi.

9. Bici olwiganyo lwa Melissa lukuyigirizize?

⁹ Mwali wirhu muguma ohamagalwa Melissa ayungusire bwenene n’obusagasi ajiraga lugenda obulemi.b Adesire ntya: “E masomo, abalimu banayigirize amageuzi omu njira erhuma abantu barhanya mpu ziri nyigirizo z’okuli. Oku murhondero, ntakag’ilonza okujira obusagasi, bulya nakag’irhanya mpu okujira ntyo kwarhuma navumbula ebiyerekine oku enyigirizo z’amageuzi ziri z’okuli. Cikone, Yehova arhaba alonzize rhuyemereze ebintu kone buzira kurhanya. Muli ntyo, narhondera okujira obusagasi. Nasoma ecitabu cidesire, Je, Kuna Muumba Anayekujali? n’ebroshire edesire, Uhai​—Ulitokana na Muumba? na Vitu Vyenye Uzima Vilianza Namna Gani?​—Maulizo 5 ya Kujiuliza. Ebyo byo nal’ilagirireko. Kwakabire kwinja ncijirage ntyo embere.”

10-11. Bici byakakurhabala ly’ogendekera waba n’olugenzi lucîre? (1 Abatesalonika 4:3, 4)

¹⁰ Oyake olugenzi lubi. Omu myaka y’omushuko, irala ly’okujira eby’enshonyi lyanaba linji bwenene, n’abandi banakushumika oku ojire eby’enshonyi. Na ntyo ko Shetani aba alonzize ojire. Bici byakakurhabala ly’ogendekera waba n’olugenzi lucîre? (Osome 1 Abatesalonika 4:3, 4.) Omu masala gawe wene, okabwira Yehova oku oli waciyumva, n’okumuhûna akuhe emisi. (Mt. 6:13) Okakengera oku Yehova aba alonzize okukurhabala, cikone arhali kukutumuza. (Enna. 103:13, 14) Kandi, wanalonza oburhabale omu Kanwa ka Nnâmahanga. Melissa, rhwaganiriraga embere, ajijire okwage koshi ly’alwisa entanya mbi. Adesire ntya: “Okusoma Ebibliya ngasi lusiku kwantabire lyo ngendekera nalwisa irala lyani libi. Kwakankengeza oku ndi wa Yehova n’oku ndozize okumukolera omu kalamo kani koshi.”​—Enna. 119:9.

¹¹ Orhakag’ilonza okulwisa amazibu gawe wenene. Okaganira n’ababusi bawe ly’obamanyisa amazibu oli walwisa. Kobinali kurhaba kulembu oku muntu okuganirira ebyo biyerekire akalamo kage, cikone kuli kwa bulagirire okujira ntyo. Melissa adesire ntya: “Nashenga Yehova ampe oburhwali na buzinda naganirira larha amazibu gani. Enyuma z’aho, naciyumva bwinja bwenene. Nal’imanyire oku Yehova anshagalukire.”

12. Bici byakakurhabala ly’okarhôla emihigo minja?

¹² Okalongozibwa n’amakanuni g’Ebibliya. Oku wagendekera wakûla, ko n’ababusi bawe bakuha oluhuma lunji lw’okurhôla emihigo yawe wenene. Cikone, hali bintu binji orhacimanya omu kalamo. Gurhi wakayakamwo okujira igosa lyashereza obwîra bwawe haguma na Yehova? (Mig. 22:3) Mwali wirhu muguma ohamagalwa Kari ahugwîre ebyamurhabire ly’arhôla emihigo minja. Ahugûkwa oku Abakristu bakuzire kiroho barhaba balagirire okw’irhegeko ly’okubalongoza omu ngasi kanga. Adesire ntya: “Nal’ishinganine mpugûkwe amakanuni g’Ebibliya ahali h’okurhumikira amarhegeko gone.” Amango oli wasoma Ebibliya, okacidosa ntya: ‘Bici olu lwandiko lunyigirizize lugenda entanya za Yehova? Ka luli mw’amakanuni gakalongoza olugenzi lwani? Akaba neci, bunguke buhi naba nabo omu kugarhumikira?’ (Enna. 19:7; Iz. 48:17, 18) Kwanaba kulembu bwenene kuli we okukarhôla emihigo yashagalusa Yehova erhi wakakasoma Ebibliya n’okurhanya bwenene oku makanuni galimwo. Omu kugendekera wajira amajambere, wabona oku orhalagiriri oku kuba n’irhegeko omu ngasi kanga bulya wahugûkwa entanya za Yehova lugenda bintu bilebe.

13. Gurhi abîra binja bakakurhabalamwo? (Emigani 13:20)

¹³ Ocishoge abîra bazigira Yehova. Nk’oku rhwabonaga embere, abîra ocishoga banakurhabala bwenene ly’oba Mukristu okuzire kiroho. (Osome Emigani 13:20.) Mwali wirhu muguma ohamagalwa Sara arhacigwerhe omwishingo. Cikone ebyamuhikiraga byamurhabala acib’iba n’omwishingo munji. Sara adesire ntya: “Napata abîra binja omu kasanzi nal’ibalagirireko. Nie na mwali wirhu muguma rhwakarhimanana ngasi mugobe lyo rhurheganya ecigabi c’okuyiga c’Ilabiro ly’Akalalizi. Owundi mwîra antabala lyo ntondera okukahâna amashuzo oku ntimanano. Enyanya z’oburhabale abo bîra bani bampâga, narhondera okurhôla isala kwa buzibu-zibu n’ifunzo lyani niene. Narhondera okujira obwîra busêzire haguma na Yehova nanarhondera okuc’ibiba n’omwishingo.”

14. Gurhi Julien acijiriremwo abîra binja?

¹⁴ Gurhi wakajiramwo obwîra haguma n’abantu bakaba lwiganyo lwinja kuli we? Julien, oli mugula ene, adesire ntya: “Amango nali musole, napasire abîra binja omu kuhubiri haguma n’abandi. Abo bîra bal’igwerhe obushiru, banantabala mbone oku omukolo gw’amahubiri gunalerhe omwishingo munji. Nacihiriraho omuhigo gw’okujira omukolo gw’akasanzi koshi. Kandi nahugûkwa oku ntal’igwerhe abîra binja banji bulya nakag’ijira obwîra haguma n’abantu bagwerhe emyaka yani bone. Buzinda, napata abandi bîra binja erhi nja oku Beteli. Olwiganyo lwabo lwantabala okucishoga ebintu binja by’okucishagalusa, n’oko kwarhuma nayegera Yehova bwenene.”

15. Gurhi Paolo arhonzire Timoteyo lugenda abîra? (2 Timoteyo 2:20-22)

¹⁵ Gurhigi wakajira erhi wakabona oku muntu mulebe omu cigamba arhali mwîra mwinja kuli we? Paolo al’imanyire oku bantu balebe b’omu cigamba c’Ecikristu c’omu myaka igana mirhanzi barhakag’irhanya n’okucigendesa nka Bakristu, n’oko kwarhuma arhonda Timoteyo oku abayake. (Osome 2 Timoteyo 2:20-22.) Obwîra bwirhu haguma na Yehova buba bwa ngulo ndarhi. Rhwajijire okwirhu koshi lyo rhuba n’obwîra haguma na Larha wirhu w’omu mpingu, co cirhumire rhurhashinganini rhuleke omuntu yeshi-yeshi ashereze obo bwîra.​—Enna. 26:4.

GURHI OKUCIHIRIRAHO EMIHIGO KWAKAKURHABALA OJIRE AMAJAMBERE G’EKIROHO?

16. Mihigo ehi wakacihiriraho?

¹⁶ Ocihirireho emihigo yakakulerhera obunguke. Ocishoge emihigo yakaseza obuyemere bwawe n’okukurhabala obe Mukristu okuzire kiroho. (Ef. 3:16) Kwa lwiganyo, wanahiga okukakenga eprograme yawe y’okusoma Ebibliya n’okujira ifunzo lyawe wene. (Enna. 1:2, 3) Erhi nkaba wanabona oku kuli kwa bulagirire okasalira kanji-kanji n’okuderha ebyarhenga oku murhima. Nkaba wanaba n’obulagirire bw’okuyerekana bwenene oborhere bw’okucihasha omu kucishoga eby’okucishagalusa n’omu kukolesa akasanzi kawe. (Ef. 5:15, 16) Erhi Yehova akabona oli wacihangana ly’ogendekera wajira amajambere g’ekiroho, anashagaluka bwenene.

17. Bunguke buhi wakaba nabo omu kurhabala abandi?

¹⁷ Wanaba Mukristu okuzire kiroho erhi wakakarhabala abandi. Yezu adesire ntya: “Haba bushagaluke bunji omu kuhâna kulusha omu kuhâbwa.” (Ebj. 20:35, NWT) Wanaba na bunguke bunji erhi wakakolesa akasanzi kawe n’emisi yawe y’obusole ly’orhabala abandi. Kwa lwiganyo, wanacihiriraho omuhigo gw’okurhabala abakola bashosi n’abagwerhe buzamba bulebe bw’omubiri omu cigamba cinyu. Nkaba wanagend’ibagulira bintu bilebe erhi kubarhabala bamanye okukolesa ebyombo by’ecielektroniki. Akaba oli mwene wirhu, ocihirireho omuhigo gw’okuba murhabazi w’abagula, ly’orhabala bwenene bene wirhu na bali birhu. (Fl. 2:4) Kandi onayerese abarhali Bahamirizi obuzigire omu kubaganirira omwanzi mwinja gw’Obwami. (Mt. 9:36, 37) Akaba bihashikine, ocihirireho omuhigo gw’okuja omu mukolo mulebe gw’akasanzi koshi.

18. Gurhi omukolo gw’akasanzi koshi gwakakurhabala ojire amajambere g’ekiroho?

¹⁸ Omukolo gw’akasanzi koshi gwanakuha bulyo bunji bw’okujira amajambere. Omukolo gw’obupainiya gwanakuyigulira enjira y’okuja oku Masomo g’Abaeneza-Injili b’Obwami. Kandi wanakola oku Beteli erhi omu yindi mikolo y’obubasi. Kaitlyn, mwali wirhu muguma ociri musole oba painiya, adesire ntya: “Okugeza akasanzi omu mahubiri haguma na bene wirhu na bali birhu bagwerhe obulenga ko kwantabire bwenene njire amajambere g’ekiroho enyuma z’okubatizibwa kwani. Olwiganyo lwabo lwantabire lyo nkayiga Ebibliya bwenene n’okukubûla obuhashe bwani bw’okuyigiriza.”

19. Migisho ehi waba nayo omu kugendekera wajira amajambere g’ekiroho?

¹⁹ Okugendekera wajira amajambere g’ekiroho kwanakulerhera migisho minji. Wanayaka okukolesa obusole bwawe omu kukulikira emihigo erhakakulerhera bunguke boshi-boshi. (1 Yn. 2:17) Orhakahikirwa n’amalumwa omuntu ayumva enyanya z’okurhôla emihigo mibi. Cikone, wanayololoka omu njira y’okunali n’okuba n’omwishingo. (Mig. 16:3) Olwiganyo lwawe lwinja lwanaha abinyu bemezi omurhima, babe misole erhi bashosi. (1 Tm. 4:12) N’akantu k’obulagirire bwenene, waba n’omurhûla n’okurhimukwa bulya oli washagalusa Yehova onagwerhe obwîra bwa hofi-hofi haguma naye.​—Mig. 23:15, 16.