Yehova Anashibirire n’Okulanga Abakozi Bage

1. Bulya gurhi Yezu ahûnaga Yehova oku alange abanafunzi bage?

OMU budufu bw’embere Yezu afê, ajijire isala lyago-lyago. Ahûna Yehova, Ishe w’omu Mpingu, oku alange abanafunzi bage. (Yn. 17:15, 20) Kobinali, ensiku zoshi Yehova analange n’okushibirira abantu bage. Cikone, Yezu al’imanyire oku Shetani akahagalisire bwenene abanafunzi bage. Kandi Yezu al’imanyire oku bakalagirire oku burhabale bwa Yehova lyo bahima ebirhero by’omubisha Shetani.

2. Kushimbana n’Ennanga 33:18-20, Mashi Bible, bulya gurhi rhurhashinganini rhuyobohe erhi amazibu gakarhuhikira?

² Er’igulu lirhambwirwe na Shetani liri lyalerhera Abakristu mazibu manji muli gano mango. Rhuli rhwarhimanana n’amazibu gakarhuvuna omurhima na ciru gakajira kube kuzibu kuli rhwe okubêra bishwekerezi kuli Yehova. Cikone, nk’oku rhwabona mw’eci cigabi, ntaco rhwakayoboha. Yehova ali arhulanga; ali abona amazibu rhuli rhwalwisa na ngasi mango aba mubidu okurhurhabala lyo rhugalwisa. Rhuganirirage nyiganyo ibirhi ziri omu Bibliya ziyerekine gurhi Yehova ‘alanga abamukenga.’​—Osome Ennanga 33:18-20, Mashi Bible.

YEHOVA ANARHURHABALE AMANGO RHULI RHWACIYUMVA KAHUMBA

3. Mangaci rhwakaciyumva rhuli kahumba?

³ Ciru akaba rhuli omu mulala munene gw’abakozi ba Yehova, hali amango rhwakaciyumva rhuli kahumba. Kwa lwiganyo, abaciri misole banaciyumva kahumba ebwa masomo amango bali baganirira ababo banafunzi obuyemere bwabo erhi amango bamahamira omu cindi cigamba. Baguma ba muli rhwe banagaya erhi kuvunika omurhima enyanya z’okurhanya oku rhushinganine rhulembere ago mazibu oku buhashe bwirhu rhwene. Rhwanarhindira okuganirira abandi gurhi rhuli rhwaciyumva bulya rhuyobohire mpu nkaba barhahugûkwe oku rhuli rhwaciyumva. N’agandi mango, ciru nkaba rhwanacidosa erhi hali omuntu yeshi-yeshi orhushibirira. Ciru rhwakaba na cirhumire cici c’okuciyumva kahumba, entanya za ntyo zanarhuma rhwaciyumva nka rhurhagwerhi buhashe boshi-boshi zananarhuyobohya. Yehova arhaba alonzize rhuciyumve ntyo ciru n’ehitya. Bulya gurhi rhudesire ntyo?

4. Bici byarhumaga omulebi Eliya aderha erhi: ‘Niene nkola nsigîre’?

⁴ Rhuganirire olwiganyo lw’omulume mwishwekerezi Eliya. Yezebeli acigasha oku kuhika amunige, na ntyo Eliya ali amayusa nsiku zirhalusire 40 ali ayaka ly’aciza obuzine bwage. (1 Bam. 19:1-9) Buzinda, erhi ali yene omu lwala, alakira Yehova ntya: ‘Niene [mulebi] nkola nsigîre.’ (1 Bam. 19:10, Mashi Bible) Hali abandi balebi omu cihugo; Obadiya ajijire okwage koshi ly’aciza balebi igana lyo barhag’inigwa na Yezebeli. (1 Bam. 18:7, 13) Bicigi byarhumaga Eliya aciyumva kahumba? K’arhanyize oku abalebi Obadiya acizagya boshi bali bamafâ? K’anaba aciyumvirhe kahumba bulya abandi barhacilungaga haguma naye omu kukolera Yehova enyuma za Yehova okuciyerekana oku ye Nnâmahanga w’okuli oku Ntondo Karmeli? K’arhanyize oku ntaye wal’ihugûsirwe amazibu alimwo, erhi kakag’irhanya oku nta muntu yeshi-yeshi omushibirire? Ogo mwanzi gurhahugwîri n’obwalagale gurhi Eliya akag’irhanya. Cikone, ebi rhumanyire n’obwalagale biri by’ebi: Yehova al’ihugûsirwe bulya gurhi Eliya akag’iciyumva kahumba anal’imanyire bwinja gurhi akamurhabiremwo.

5. Gurhi Yehova ayemezizemwo Eliya n’obwalagale oku arhali kahumba?

⁵ Yehova arhabire Eliya omu njira nyinji. Aha Eliya omurhima ly’aderha. Kabirhi koshi-koshi amudosa ntya: “Bici oli wajira aha?” (1 Bam. 19:9, 13, Mashi Bible) Ako kabirhi koshi, Yehova ayumvirhiza Eliya erhi amubwira oku akag’iciyumva. Yehova ashuza Eliya omu kumuyeresa obuhashe bwage bunji bwenene n’oku ho aba. Kandi ayemeza Eliya n’obwalagale oku hali abandi Baisraheli banji bacikag’imuharamya. (1 Bam. 19:11, 12, 18) Buzira karhinda, Eliya ayumvirhe oburhulirize enyuma z’okubwira Yehova ebyamuli omu murhima byoshi n’enyuma z’okuyumvirhiza gurhi Yehova amushuzize. Yehova aha Eliya mikolo minji y’obulagirire. Amurhuma oku aj’ishiga Hazaeli amavurha ly’aba mwami w’e Siria, Yehu ly’aba mwami w’e Israheli, na Elisha ly’aba mulebi. (1 Bam. 19:15, 16) Omu kuha Eliya eyo mikolo, Yehova amurhabala ly’asegeza obwenge oku bintu binja. Na kandi Nnâmahanga amuha omwîra mwinja, k’okuderha Elisha. Gurhi wakahâbwamwo oburhabale bwa Yehova omu mango oli waciyumva kahumba?

6. Bici wakaderha omw’isala lyawe amango oli waciyumva kahumba? (Ennanga 62:8)

⁶ Yehova akuhûnyire oku okamuyegera kugerera isala. Anabone amazibu oli walwisa, anakuyemezize n’obwalagale oku ayumvirhiza amasala gawe akasanzi koshi-koshi. (1 Ts. 5:17) Anashagaluke okuyumvirhiza amasala g’abantu bamuharamya. (Mig. 15:8) Bici wakaderha omw’isala lyawe amango oli waciyumva kahumba? Obwire Yehova oku oli waciyumva koshi, nk’oku Eliya ajiraga. (Osome Ennanga 62:8.) Omubwire ebiri byakuhangayisa byoshi n’oku biri byarhuma waciyumva. Ohûne Yehova akurhabale ly’olwisa ezo ntanya z’okuciyumva kahumba. Kwa lwiganyo, erhi akaba onayumve oboba n’okuciyumva kahumba amango oli walonza okuhâna obuhamirizi ebwa masomo, ohûne Yehova akuhe oburhwali olagirireko ly’ohash’ihubiri. Ciru wanamuhûna akuhe obwenge ly’ohash’ihugûla obuyemere bwawe omu njira y’obwirhonzi. (Lk. 21:14, 15) Erhi akaba oli walwisa entanya z’okuvunika omurhima, ohûne Yehova akurhabale oganire n’Omukristu okuzire kiroho lugenda oku oli waciyumva. Wanahûna Yehova arhabale oyo Mukristu wabwira ebikuli e murhima ahugûkwe oku oli waciyumva. Oyigulire Yehova omurhima gwawe, olabe gurhi ashuza oku masala gawe, onayemere oburhabale bw’abandi; erhi wakajira ntyo orhakaciciyumva kahumba bwenene.

7. Bici olwiganyo lwa Mauricio lukuyigirizize?

⁷ Yehova arhuhire rhweshi omukolo gw’obulagirire gw’okujira. Wanayemera n’obwalagale oku anabone ananashagalukire ebi oli wajira byoshi ly’ohikiriza emikolo yawe omu cigamba n’omukolo gw’amahubiri. (Enna. 110:3) Gurhi okujira binji mw’ogo mukolo kwakakurhabalamwo amango oli waciyumva kahumba? Rhuganirire olwiganyo lwa mwene wirhu ociri musole ohamagalwa Mauricio.b Kasanzi kasungunu enyuma za Mauricio okubatizibwa, muguma w’omu bîra bage ba hofi-hofi arhondera okuleka okuli bunyi-bunyi. Mauricio adesire ntya: “Erhi mbona aleka Yehova, ntacikag’icilangalira. Nakacidosa erhi nahasha okuhikiriza eciragane nahâga Yehova c’okumukolera n’okubêra muguma w’omu mulala gwage. Nakaciyumva ndi kahumba nanakarhanya oku nta muntu ciru n’omuguma wakahugûkwa oku ndi naciyumva.” Bici byarhabire Mauricio? Adesire ntya: “Narhondera okujira binji omu mukolo gw’amahubiri. Oko kwantabala naleka okucisegezako obwenge nanaleka okubusegeza oku ntanya zani. Erhi nakabire ndi omu mukolo gw’amahubiri haguma n’abandi nakaciyumva nshagalusire ntanacikag’iciyumva kahumba bwenene.” Kobinali, ciru n’omu mango birhahashikini okuhubiri haguma n’abandi busu oku busu, rhunahâbwe emisi omu kuhubiri haguma nabo kugerera amaruba erhi kugerera etelefone. Bindi bici byarhabire Mauricio? Acibir’iderha ntya: “Kandi, nakajira binji omu cigamba. Nakajira okwani koshi lyo nteganya n’okugeza bwinja ebipindi by’abanafunzi. Ebyo bipindi byantabala nakaciyumva oku ndi wa bulagirire omu masu ga Yehova n’abirhu bemezi.”

YEHOVA ANARHURHABALE AMANGO RHULI RHWACIYUMVA RHUVUNISIRE OMURHIMA ENYANYA Z’AMAZIBU MADARHI

8. Gurhi amazibu madarhi gakarhuma rhwaciyumva?

⁸ Rhumanyire oku rhwarhimanana n’amazibu muli zino nsiku nzinda. (2 Tm. 3:1) Cikone, rhwanasomerwa n’amazibu malebe garhuhikire n’amango garhuhikiremwo. Rhwanarhibukirwa n’amazibu g’okubula ensaranga, banarhupimamwo obulwala budarhi bwenene, erhi kandi rhwanafîrwa n’omuzigirwa wirhu. Omu kasanzi ka ntyo, rhwanaciyumva rhugogomirwe rhunavunisire omurhima, bwenene erhi byakabonekana nk’ago mazibu gakulikirine kandi erhi garhuhikire manji caligumiza. Cikone, okengere oku Yehova anarhulange, n’oku kugerera oburhabale bwage rhwanahash’ilwisa n’oburhwali ngasi mazibu gakarhuhikira.

9. Mazibu gahi maguma na maguma gahikire Ayubu?

⁹ Orhanye gurhi Yehova arhabalagamwo omulume mwishwekerezi Ayubu. Ahikirwe na mazibu manji g’okuvuna omurhima omu kasanzi kasungunu. Omu lusiku luguma lone, babwira Ayubu oku ebishwekwa byage byazimbirwe erhi kunigwa n’oku bambali bage n’abana bage bazigirwa boshi banizirwe. (Ayu. 1:13-19) Kasanzi kasungunu enyuma z’aho, amango Ayubu aciri omu mishîbo, aja kw’obulwala bw’amalumwa manji bwasherezagya omubiri gwage. (Ayu. 2:7) Akanga ka Ayubu kali kabi bwenene kuhika aderha ntya: “Ngayire akalamo kani; ntalonzizi ngendekere nalama.”​—Ayu. 7:16, NWT.

10. Gurhi Yehova ahiremwo Ayubu ebi al’ilagirireko ly’alembera amazibu gage? (Olole enfoto eri oku cijalada c’eyi gazeti.)

¹⁰ Yehova akag’ilanga Ayubu. Bulya Yehova al’izigire Ayubu, amuha ebi al’ilagirireko ly’ahash’ilembera amazibu gage n’okubêra mwishwekerezi. Yehova aganiza Ayubu, amukengeza oku ajira obwenge burhagwerhi lugero n’oku anashibirire ebiremwa byage omu njira y’obuzigire. Amubwira lugenda nsimba nyinji z’okusomeza. (Ayu. 38:1, 2; 39:9, 13, 19, 27; 40:15; 41:1, 2) Kandi Yehova akolesa mulume muguma waciri musole ohamagalwa Elihu ly’azibuhya Ayubu n’okumurhuliriza. Elihu ayemeza Ayubu n’obwalagale oku ensiku zoshi Yehova anahembe abakozi bage enyanya z’okulembera kwabo. Cikone kandi Yehova alongoza Elihu ly’aha Ayubu mahano maguma na maguma g’obuzigire. Elihu arhabala Ayubu ly’aleka okucisegezako obwenge yenene omu kumukengeza oku rhuba basungunu-ngunu bwenene erhi rhwakagererwako Yehova, Mulemi w’empingu n’igulu. (Ayu. 37:14) Kandi Yehova aha Ayubu omukolo gw’okujira; amubwira oku aj’ishengera abîra bage basharhu bajiraga ecaha. (Ayu. 42:8-10) Gurhi Yehova arhurhabalamwo ene erhi amazibu madarhi gakarhuhikira?

11. Gurhi Ebibliya erhuhâmwo oburhulirize amango rhuli rhwalwisa amazibu?

¹¹ Yehova arharhuderheza busu oku busu nk’oku aderhezagya Ayubu, cikone anarhuderheze kugerera Akanwa kage Bibliya. (Rm. 15:4) Anarhurhulirize omu kurhuha obulangalire lugenda amango gayisha. Rhuganirire ntanya nsugunu z’Ebibliya zakarhurhuliriza amango rhuli rhwalwisa amazibu. Omu Bibliya, Yehova arhuyemezize n’obwalagale oku nta kantu koshi-koshi, ciru n’amazibu madarhi, ‘kankahasha okurhunanûla oku buzigire [bwage].’ (Rm. 8:38, 39) Kandi arhuyemezize n’obwalagale oku “ali hofi ha ngasi yeshi omusengera.” (Enna. 145:18) Yehova arhubwizire oku, erhi rhwakamulangalira, rhwanahash’ilembera ngasi marhangulo na ciru rhwanaba n’omwishingo ciru akaba rhuli rhwalibuka. (1 Kr. 10:13; Yk. 1:2, 12) Kandi Akanwa ka Nnâmahanga karhukengezize oku amazibu girhu gali ga kasanzi kasungunu na mofi erhi rhwakagagerera oku luhembo lw’ensiku n’amango ayish’irhuha. (2 Kr. 4:16-18) Yehova arhuhîre obulangalire bw’okunali oku ayish’ishereza abarhulerhera amazibu boshi, k’okuderha Shetani Ibilisi n’abantu boshi bajira amabi ak’age. (Enna. 37:10) Ka wabisire omu bwenge bwawe mandiko maguma na maguma g’Ebibliya gahânyire oburhulirize lyo gakurhabala okulembera amazibu g’amango gayisha?

12. Bici Yehova aba alonzize rhujire erhi akaba rhulonzize rhuyunguke n’ebiri omu Kanwa kage?

¹² Yehova aba alonzize rhucihirireho akasanzi k’okuyiga Ebibliya ngasi mango n’okukarhanya bwenene kw’ebi rhuli rhwasoma. Erhi rhwakakakolesa ebi rhuli rhwayiga, obuyemere bwirhu bwanagendekera bwasêra bwenene na kandi rhwanagendekera rhwayegera Larha wirhu w’omu mpingu. N’oko kwanarhuha emisi y’okulembera amazibu girhu. Kandi Yehova anahe abacikubagira Akanwa kage iroho lyage litagatifu. N’er’iroho litagatifu linarhuhe ‘obuhashe burhali nk’obwirhu’ lyo rhulembera ngasi mazibu.​—2 Kr. 4:7-10, Mashi Bible.

13. Gurhi ebiryo rhuli rhwahâbwa na “mushizi mwirhonzi na mwikubagirwa” birhurhabalamwo okulembera amazibu girhu?

¹³ Kugerera oburhabale bwa Yehova, “mushizi mwirhonzi na mwikubagirwa” ali arhuha myanzi minji bwenene, amavideo, n’emiziki; ebyo byoshi byanarhurhabala rhube n’obuyemere busêzire n’okugendekera rhwaba masu kiroho. (Mt. 24:45, NWT) Rhushinganine rhujire okwirhu koshi lyo rhuyunguka na ngasi kantu Yehova ali arhuha omu kasanzi kakwanine. Mwali wirhu muguma w’omu États-Unis azindig’iderha oku avuzire omukwa bwenene kw’ebyo biryo byoshi by’ekiroho rhuli rhwahâbwa. Adesire ntya: “Omu myaka 40 namakolera Yehova, obwishwekerezi bwani kuli ye bwarhangwirwe kanji-kanji.” Ahikirwe na mazibu manji madarhi: shakulu wage agongwa n’omushoferi wal’ilalusire, ababusi bage balwala endwala ndarhi bwenene banafâ, naye yene amalwala akansere kabirhi. Bici byamurhabire ly’alembera? Adesire ntya: “Yehova anshibirire ensiku zoshi. Ebiryo by’ekiroho arhuha kugerera mushizi mwirhonzi na mwikubagirwa byantabire ngendekere nalembera. Enyanya z’ebyo biryo, nanaciyumva aka Ayubu, waderhaga ntya: ‘Kuhika nninde nfâ, ntamango nanaleke obwishwekerezi bwani!’”​—Ayu. 27:5, NWT.

14. Gurhi Yehova akolesamwo bene wihu na bali birhu lyo barhurhabala omu mango g’amazibu? (1 Abatesalonika 4:9)

¹⁴ Yehova anakomereze abakozi bage okuzigirana n’okurhulirizanya omu mango g’amazibu. (2 Kr. 1:3, 4; osome 1 Abatesalonika 4:9.) Omu kuyiga olwiganyo lwa Elihu, bene wirhu na bali birhu baba babidu okurhurhabala lyo rhugendekera rhwabêra bishwekerezi amango rhuli rhwarhimanana n’amazibu. (Ebj. 14:22) Kwa lwiganyo, rhulole gurhi ab’omu cigamba ca Diane bamuhâga omurhima banamurhabala agendekere aba mwishwekerezi kuli Yehova erh’iba alwala obulwala budarhi bwenene. Diane adesire ntya: “Birhali bilembu. Cikone rhwabwine obuzigire n’obuhashe bw’okuboko kwa Yehova muli ago mango g’amazibu. Ab’omu cigamba cirhu bajijire binji lyo barhurhabala. Bakag’irhulambagirira, bakag’irhuhamagala oku telefone, n’okurhuhobera; byo na bintu rhwal’ilagirireko lyo rhulembera amazibu girhu. Bulya ntayish’itembeza omutuga, bene wirhu na bali birhu bakag’ijira okwabo koshi lyo mpika oku ntimanano n’omu mukolo gw’amahubiri erhi nakabire ngwerhe obuhashe bw’okujira ntyo.” Guli mugisho bwenene okuba muguma wa mw’ogo mulala gw’ekiroho gugwerhe obuzigire!

RHUVUZIRE YEHOVA OMUNKWA BULYA ANARHUSHIBIRIRE OMU NJIRA Y’OBUZIGIRE

15. Bulya gurhi rhuyemire n’obwalagale oku rhwanahash’ilembera amazibu girhu?

¹⁵ Ngasi muguma wirhu arhimanana na mazibu malebe. Cikone, nk’oku rhwayizire, nta mango rhwakalwisa amazibu girhu oku buhashe bwirhu rhwene. Ensiku zoshi, Yehova anarhushibirire nka nkula ishe w’omwana ashibirira omwana wage. Aba hofi na nirhu, aba mubidu okuyumvirhiza ensengero zirhu z’okumuhûna oburhabale, anaba mubidu okurhurhabala. (Iz. 43:2) Rhuyemire n’obwalagale oku rhwanahash’ilwisa amazibu girhu bulya anarhuhe ngasi kantu rhulagirireko lyo rhugalembera. Arhuhîre engalo y’isala, Ebibliya, ebiryo binji bwenene by’ekiroho, n’omulala gulimw’obuzigire gwa bene wirhu na bali birhu lyo birhurhabala omu mango g’amazibu.

16. Gurhi rhwakajira lyo Yehova agendekera arhushibirira?

¹⁶ Rhuvuzire omunkwa okubona rhugwerhe Larha w’omu mpingu orhulanga! “Ye rhuma rhwashagaluka.” (Enna. 33:21, Mashi Bible) Rhwanayeresa Yehova oku rhuba rhushagalukire enjira y’obuzigire arhushibiriramwo omu kujira okwirhu koshi lyo rhuyunguka n’ebi arhuha byoshi. Na nirhu rhushinganine rhujire ecirhu cigabi lyo Nnâmahanga agendekera arhushibirira. Omu zindi nderho, erhi rhwakagendekera rhwajira okwirhu koshi lyo rhurhumikira Yehova n’okujira ebintu binja omu masu gage, anarhulanga ensiku n’amango!​—1 Pt. 3:12.